स्वतन्त्र समाचार सेवा / INS 
माङसेबुङ गाउँपालिका-२, रत्नबस्तीका किसान राजेश राईले कफीको बिरुवा बिक्रीबाट राम्रो आम्दानी गरिरहेका छन्। यस वर्ष उनले कफीका बिरुवा बिक्रीबाट १३ लाख ५० हजार रुपैयाँ कमाए। पाँच वर्षअघि ‘वाङदेल नर्सरी सेन्टर’ स्थापना गरी कफीको बिरुवा उत्पादन सुरु गरेका राई माङसेबुङमा एक कुशल बिरुवा उत्पादकका रूपमा परिचित छन्।
फेवाखोला नजिकै गजुरमुखी-इभाङ-चतुरे सडक छेउमा पाँच रोपनी जग्गामा उनले बिरुवा उत्पादन गरिरहेका छन्। यस वर्ष उनले ४५ हजार कफीका बिरुवा बिक्री गरे।
राईका अनुसार, कफीको बिरुवा उत्पादनमा कम समय, श्रम र लगानीमा राम्रो आम्दानी हुने भएकाले उनले यसलाई प्राथमिकता दिएका छन्। उनका बिरुवा इलाम, सङ्खुवासभा, भोजपुर र भारतको सिक्किमसम्म पुग्छन्। विभिन्न पालिका, वडा कार्यालय, फार्म र किसानले यी बिरुवा खरिद गर्छन्।
“बिरुवा उत्पादनमा धेरै मेहनत र समय लाग्दैन,” उनले भने, “यहाँका बिरुवा इलाम र बाहिर पनि बिक्री हुन्छन्।” कफीको बिरुवा प्रतिगोटा ३० रुपैयाँमा नर्सरीबाटै बिक्री हुन्छ। राईले कफीका साथै लाम्पाते, सिमल, पानीसाज, खमारी, उतिसजस्ता वन पैदावार र आँप, लिची, कटहरजस्ता फलफूलका बिरुवा पनि उत्पादन गर्छन्। यी बिरुवा प्रतिगोटा ४० रुपैयाँमा बिक्री हुन्छन्।
“कफीको बिरुवालाई मुख्य प्राथमिकता दिए पनि अन्य बिरुवा पनि उत्पादन गर्छु,” उनले भने, “ग्राहकले एकै ठाउँमा सबै बिरुवा पाउँदा सजिलो भएको छ।” बिरुवाको स्याहार, उखेल्ने र बिक्री गर्ने काममा राई आफैं खटिन्छन्।
उनले छोटो समयमा राम्रो आम्दानी हुने भएकाले बिरुवा उत्पादनमा जोड दिएको बताए। कोशी प्रदेश सरकारबाट उनको नर्सरीलाई राम्रो सहयोग प्राप्त भएको छ।
दुई वर्षअघि कृषि ज्ञान केन्द्र इलाममार्फत नर्सरी प्रवर्द्धनका लागि लागत साझेदारीमा २ लाख रुपैयाँ अनुदान प्राप्त भएको थियो, जसबाट व्यवस्थित टनेल निर्माण गरिएको छ। कृषि ज्ञान केन्द्रका अनुसार, इलाममा १३५ हेक्टर क्षेत्रमा कफीको व्यावसायिक खेती भइरहेको छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- ऐतिहासिक निर्वाचन सम्पन्न: प्रधानमन्त्रीद्वारा नेपाली जनता र सरोकारवालाको प्रशंसा
- मतगणना सुरु हुँदै : १६५ क्षेत्रमा निर्वाचन अधिकृतको कार्यालयमा गणना
- मतदान सकियो, मतगणना तयारी : काठमाडौंका १० क्षेत्रमा यी स्थानमा गणना
- प्रतिनिधिसभा सदस्य निर्वाचन २०८२: देशभर उत्साहजनक रूपमा मतदान सम्पन्न, करिब ६० प्रतिशत मत खस्यो
- देशभर शान्तिपूर्ण रूपमा मतदान
- किरियापुत्रीद्वारा मतदान
- राष्ट्रपति र उपराष्ट्रपति मतदानमा सहभागी भएनन्
- काठमाडौँका १० वटै निर्वाचन क्षेत्रमा शान्तिपूर्ण मतदान जारी
- पुन सञ्चालनमा आयो : इजरायलको मुख्य विमानस्थल
- १०७ वर्षीय रावतले गरे मतदान
