स्वतन्त्र समाचार सेवा / INS 
ललितपुर जिल्लामा खानेपानीको समस्या दिनानुदिन जटिल बन्दै गएको छ। भैँसेपाटी, बुङ्गमती, र कुसुन्ती क्षेत्रका बासिन्दाहरूले लामो समयदेखि खानेपानीको अभाव झेलिरहेका छन्। स्थानीयले वडा कार्यालय र काठमाडौँ उपत्यका खानेपानी लिमिटेड (केयुकेल) मा बारम्बार गुनासो गरे पनि समस्याको दिगो समाधान भएको छैन। गत वर्षको असोजमा आएको बाढीले खानेपानीको पाइपलाइनमा क्षति पुगेपछि यो समस्या थप जटिल बनेको हो।
ललितपुर महानगरपालिकाको वडा नं २५ र १८ (भैँसेपाटी क्षेत्र) मा दुई साताअघि तीन सातासम्म घरका धारामा पानी आएन। स्थानीयले रिक्त धारालाई २१ दिनसम्म कुरे, तर पानीको सट्टा निराशा मात्र हात लाग्यो। उनीहरूले दैनिक जसो ललितपुर वितरण केन्द्रमा गुनासो लिएर पुगे, तर समाधान नहुँदा हैरानी खेप्नुपर्यो। यस्तै, वडा नं २२ र २१ (बुङ्गमती क्षेत्र) का बासिन्दाहरू पनि खानेपानीको लागि घण्टौँ हिँडेर प्राकृतिक मुहान खोज्न बाध्य भए। डोकोमा गाग्री र बोतल बोकेर उनीहरू सार्वजनिक कुवा र धारामा लाइन लागे।
गत वर्ष असोजमा आएको बाढीले ललितपुरका खानेपानी पाइपलाइनहरूमा ठुलो क्षति पुर्याएको थियो। फर्पिङ र चापागाउँबाट आउने पानीको आपूर्ति बाढीले अवरुद्ध बनाएको छ। केयुकेल ललितपुर शाखाका कार्यालय प्रमुख विजय विश्वकर्माले बाढीले पाइपलाइनमा क्षति पुगेको र फर्पिङ स्टिमबाट दैनिक दुई करोड लिटर पानी ल्याउन सकिने भए पनि हाल १.२ करोड लिटर मात्र आइरहेको बताए। मेलम्ची खानेपानी आयोजना पनि बन्द हुँदा स्थानीयलाई पानीको अभाव भएको उनको भनाइ छ।
हुनेखानेले ट्याङ्करबाट पानी किनेर दैनिकी चलाएका छन्, र पहुँचवाला तथा विशिष्ट व्यक्तिका घरमा केयुकेलका ट्याङ्करले पानी पुर्याएको छ। तर, सर्वसाधारणले महँगो ट्याङ्कर किन्न नसक्दा प्राकृतिक मुहान र सार्वजनिक धारामा लाइन लाग्नुपरेको छ। ललितपुर–१३ कुसुन्तीका धनराज घिमिरेले हप्तामा एक घण्टा मात्र पानी आउने र महिनामा दुई ट्याङ्कर किनेर पनि पर्याप्त पानी नपुगेको गुनासो गरे। “महसुल तिर्छौँ, तर पानी आउँदैन। पहिले हप्तामा तीन दिन पानी आउँथ्यो, अहिले एक दिन पनि मुस्किल छ,” उनले भने।
ललितपुर–२५ का वडाध्यक्ष दौलतकुमार खत्रीले खानेपानीको हाहाकारले ठूलो समस्या भएको बताए। “दैनिक उपभोक्ता गुनासो लिएर वडामा आउँछन्। सम्बन्धित निकायमा झकझक्याउँदा पनि समाधान भएन,” उनले भने। निरन्तर प्रयासपछि २१ दिनमा धारामा पानी आएको उनको भनाइ छ। यस्तै, वडा–२१ का अध्यक्ष रवीन्द्र महर्जनले बाढीले फर्पिङको पानी आपूर्ति अवरुद्ध भएको र अस्थायी मर्मतपछि बल्ल पानी आएको बताए। उनले दुई साता पाइप जडानमा खटिएको उल्लेख गरे।
समाजसेवी देवेन्द्रकुमार गौतमले खानेपानी जस्तो संवेदनशील विषयमा सरकारको बेवास्ता र राजनीतिले जनता प्रताडित भएको बताए। ललितपुर–१८ का रामहरि थापाले तालिकाअनुसार पानी नआएको र महसुल तिर्नुपरेको गुनासो गरे। केयुकेलका अनुसार, ललितपुरमा ५० हजारभन्दा बढी धारा जडान भएका छन्। फर्पिङ, नल्लु खोला, वासुदु, र गोदावरीका मुहान व्यवस्थित गर्न सके समस्या समाधान हुने विश्वकर्माको भनाइ छ। ललितपुर–१३ का वडाध्यक्ष गणेश केसीले पुराना पाइप टुटफुट भएको र नयाँ जडानको काम भइरहेको बताए। स्थानीयले भने मन्त्री आवासमा पानी पुग्ने तर सर्वसाधारणको घरमा नआउने भन्दै आक्रोश व्यक्त गरेका छन्।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- आधुनिकता र वैदेशिक रोजगारीले बढायो सम्बन्धविच्छेद
- पच्चीस सय वर्ष देखिको जीवन्त परम्परा : बनेपाको चण्डेश्वरी महोत्सव
- आईपीएल २०२६: कोलकाताको पहिलो जित र पन्जाबद्वारा लखनउ पराजित
- १९ अर्बको दुधकोशी पाँचौं जलविद्युत् आयोजना स्वीकृत
- आजका लागि विदेशी मुद्राको विनिमयदर
- अध्ययन बिदाको दुरुपयोग : त्रिविलाई दुई अर्ब बढीको क्षति
- जोखिमपूर्ण धौलागिरिमा वसन्तयामको पहिलो सफल आरोहण
- आइपिएल २०२६: हैदराबादद्वारा चेन्नई पराजित, दिल्लीको रोमाञ्चक जित
- मधुवा रोगले आँप उत्पादनमा ठूलो धक्का, बाँकेमा किसान निराश
- आजका लागि विदेशी मुद्राको विनिमयदर
