स्वतन्त्र समाचार सेवा / INS 
पर्यावरण संरक्षणमा हात्तीको महत्त्वपूर्ण भूमिकालाई मध्यनजर गर्दै हात्ती संरक्षणमा विशेष ध्यान दिनुपर्नेमा सरोकारवालाहरूले जोड दिएका छन्। चौधौँ अन्तर्राष्ट्रिय हात्ती दिवसको अवसरमा चितवनको सौराहामा आयोजित हात्ती वनभोज कार्यक्रममा सहभागीहरूले हात्ती संरक्षणबिना पर्यावरण संरक्षण असम्भव रहेको बताएका छन्।
चितवन राष्ट्रिय निकुञ्जका प्रमुख संरक्षण अधिकृत गणेश पन्तले हात्तीविना वन र वन्यजन्तुको संरक्षणको कल्पना गर्न नसकिने उल्लेख गरे। “हात्ती बुद्धिमान् र संवेदनशील जनावर हो। यसको संरक्षण नगरी वन-जङ्गल र अन्य वन्यजन्तुको रक्षा सम्भव छैन,” उनले भने। हात्तीले वनको पारिस्थितिक प्रणालीमा सन्तुलन कायम राख्न महत्त्वपूर्ण योगदान पुर्याउने भन्दै उनले हात्ती संरक्षणमा सबैको सहकार्य आवश्यक रहेको बताए।
कार्यक्रममा वरिष्ठ पशु चिकित्सक डा. विजयकुमार श्रेष्ठले हात्ती संरक्षणमा देखिएका चुनौतीहरूलाई सबै पक्ष मिलेर समाधान गर्नुपर्नेमा जोड दिए। “हात्तीले वन क्षेत्रको संरक्षणमा मात्र नभई वन्यजन्तुको सुरक्षामा पनि महत्त्वपूर्ण भूमिका खेल्छ। यो भूमिकालाई कसैले पनि बिर्सनु हुँदैन,” उनले भने। हात्तीको बासस्थान सङ्कुचन, अवैध सिकार र मानव-हात्ती द्वन्द्व जस्ता समस्याहरूले हात्तीको अस्तित्वमाथि खतरा उत्पन्न भएको भन्दै उनले यी समस्याहरूको समाधानका लागि सामूहिक प्रयास आवश्यक रहेको बताए।
हात्ती वनभोज कार्यक्रममा स्थानीय समुदाय, संरक्षणकर्मी, र निकुञ्ज कर्मचारीहरूको सहभागिता रहेको थियो। हात्तीको संरक्षणले जैविक विविधता र पर्यावरणीय सन्तुलन कायम राख्न मद्दत गर्ने भएकाले यस्ता कार्यक्रमले जनचेतना फैलाउन महत्त्वपूर्ण भूमिका खेल्ने सहभागीहरूको भनाइ थियो।
हात्ती संरक्षणका लागि चितवन राष्ट्रिय निकुञ्जले विभिन्न पहलहरू गरिरहेको छ। हात्तीको बासस्थान संरक्षण, मानव-हात्ती द्वन्द्व न्यूनीकरण, र अवैध सिकार नियन्त्रणका लागि निकुञ्जले स्थानीय समुदायसँग सहकार्य गर्दै आएको छ। यस्ता प्रयासहरूले हात्तीको संरक्षणमा सकारात्मक प्रभाव पार्ने अपेक्षा गरिएको छ।
अन्तर्राष्ट्रिय हात्ती दिवसले हात्तीको महत्त्व र संरक्षणको आवश्यकताबारे विश्वव्यापी रूपमा जनचेतना फैलाउने उद्देश्य राख्छ। नेपालमा पनि यो दिवसले हात्ती संरक्षणप्रति सबैको ध्यानाकर्षण गराउन महत्त्वपूर्ण भूमिका खेलेको छ। हात्ती संरक्षणले पर्यावरण र जैविक विविधताको रक्षा गर्नुका साथै पर्यटन प्रवर्द्धनमा समेत योगदान पुर्याउने विश्वास गरिएको छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- ऐतिहासिक निर्वाचन सम्पन्न: प्रधानमन्त्रीद्वारा नेपाली जनता र सरोकारवालाको प्रशंसा
- मतगणना सुरु हुँदै : १६५ क्षेत्रमा निर्वाचन अधिकृतको कार्यालयमा गणना
- मतदान सकियो, मतगणना तयारी : काठमाडौंका १० क्षेत्रमा यी स्थानमा गणना
- प्रतिनिधिसभा सदस्य निर्वाचन २०८२: देशभर उत्साहजनक रूपमा मतदान सम्पन्न, करिब ६० प्रतिशत मत खस्यो
- देशभर शान्तिपूर्ण रूपमा मतदान
- किरियापुत्रीद्वारा मतदान
- राष्ट्रपति र उपराष्ट्रपति मतदानमा सहभागी भएनन्
- काठमाडौँका १० वटै निर्वाचन क्षेत्रमा शान्तिपूर्ण मतदान जारी
- पुन सञ्चालनमा आयो : इजरायलको मुख्य विमानस्थल
- १०७ वर्षीय रावतले गरे मतदान
