इरानमाथि आक्रमण भए ‘क्षेत्रीय युद्ध’ हुने सर्वोच्च नेता खामेनीको चेतावनी

इरानका सर्वोच्च नेता आयतोल्लाह अली खामेनीले संयुक्त राज्य अमेरिकालाई कडा चेतावनी दिँदै इरानको भूमिमा कुनै पनि सैन्य हस्तक्षेप भए त्यसले सम्पूर्ण मध्यपूर्वमा भीषण ‘क्षेत्रीय युद्ध’ निम्त्याउने बताउनुभएको छ।

सोमबार तेहरानमा आयोजित एक सार्वजनिक सभालाई सम्बोधन गर्दै ८६ वर्षीय नेता खामेनीले अमेरिकी राष्ट्रपति डोनाल्ड ट्रम्पको पछिल्लो सैन्य धम्कीको कडा शब्दमा प्रतिवाद गर्नुभएको हो।

खामेनीले सम्बोधनका क्रममा भन्नुभयो, “अमेरिकी अधिकारीहरूले यो राम्ररी बुझ्नू कि यदि उनीहरूले इरानविरुद्ध कुनै पनि सैन्य दुस्साहस गरे भने, यो केवल इरानमा मात्र सीमित रहने छैन। यसले सम्पूर्ण क्षेत्रलाई युद्धको ज्वालामा धकेल्नेछ।” उहाँले इरानले कहिल्यै युद्धको पहल नगर्ने तर आफ्नो सार्वभौमसत्तामाथि आँच आए “कडा र निर्णायक प्रहार” गर्ने स्पष्ट पार्नुभयो।

पछिल्ला केही हप्तादेखि अमेरिका र इरानबिचको सम्बन्ध निकै नाजुक मोडमा पुगेको छ। राष्ट्रपति ट्रम्पले इरानको आणविक कार्यक्रम र देशभित्र भइरहेका सरकार विरोधी प्रदर्शनहरूलाई दबाउन इरानी प्रशासनले गरेको बल प्रयोगको विरोधमा सैन्य कारबाहीको चेतावनी दिनुभएको थियो।

जवाफमा इरानले पनि आफ्नो सैन्य तयारीलाई तीव्र पारेको छ। अमेरिकाले खाडी क्षेत्रमा ‘यूएसएस अब्राहम लिङ्कन’ लगायतका विमानवाहक युद्ध पोतहरू परिचालन गरेपछि इरानले पनि आफ्ना ‘रिभोलुसनरी गार्ड्स’ (IRGC) लाई उच्च सतर्कतामा राखेको छ।

इरानभित्र हालै भएका प्रदर्शनहरूलाई खामेनीले “विदेशी शक्तिद्वारा प्रायोजित कु (Coup) को प्रयास” भनी टिप्पणी गर्नुभयो। उहाँले यसमा अमेरिका र इजरायलको प्रत्यक्ष संलग्नता रहेको आरोप समेत लगाउनुभएको छ। अर्कोतर्फ, अमेरिकाले भेनेजुएलाका राष्ट्रपति निकोलस मादुरोलाई हिरासतमा लिएपछि इरान थप आक्रामक देखिएको छ।

सैन्य तनाव बढ्दै जाँदा कतार, ओमान र टर्कीले मध्यस्थताको प्रयास गरिरहेका छन्। इरानका वरिष्ठ सुरक्षा अधिकारी अली लारीजानीले ‘ब्याक च्यानल’ बाट वार्ताको खाका तयार भइरहेको बताए पनि ठोस प्रगति भने हुन सकेको छैन। युरोपेली सङ्घले इरानी सेनालाई प्रतिबन्ध लगाएपछि इरानले पनि युरोपेली सैनिकहरूलाई “आतङ्ककारी” घोषणा गरिसकेको छ।

यदि अमेरिका र इरानबिच प्रत्यक्ष सैन्य भिडन्त भएमा यसले विश्वको तेल आपूर्ति र आर्थिक स्थिरतामा ठुलो धक्का पुर्‍याउने विश्लेषण गरिएको छ। संयुक्त राष्ट्र सङ्घ र विश्वका अन्य प्रमुख शक्ति राष्ट्रहरूले दुवै पक्षलाई संयमता अपनाउन आग्रह गरिरहेका छन्।