स्वतन्त्र समाचार सेवा / INS 
आईसीसी पुरुष टी-२० विश्वकप २०२६ मा नेपालले आफ्नो अन्तिम समूह चरणको खेलमा स्कटल्याण्डमाथि ७ विकेटको सानदार जित दर्ता गर्दै इतिहास रचेको छ। मुम्बईको प्रतिष्ठित वानखेडे स्टेडियममा भएको यस खेलमा नेपालले विश्वकपको मुख्य इतिहासमै आफ्नो पहिलो जित दर्ता गरेको हो। यसअघि सन् २०२४ को विश्वकपमा सहभागी भए पनि नेपालले मुख्य चरणमा सफलता पाउन सकेको थिएन।जारी संस्करणका सुरुवाती तीन खेलमा हार बेहोरेको नेपालले अन्तिम खेलमा भने उत्कृष्ट प्रदर्शन गर्यो।
स्कटल्याण्डले दिएको १७१ रनको बलियो लक्ष्यलाई नेपालले १९.२ ओभरमा मात्र ३ विकेट गुमाएर पूरा गरेको थियो। नेपालको जितमा दिपेन्द्र सिंह ऐरी नायक बने, जसले मात्र २३ बलमा अविजित ५० रनको विष्फोटक इनिङ्स खेले। ओपनर कुशल भुर्तेलले ४३ र आसिफ शेखले ३३ रनको योगदान दिँदै टोलीलाई राम्रो सुरुवात दिलाएका थिए भने बलिङतर्फ सोमपाल कामीले ३ र नन्दन यादवले २ विकेट लिएका थिए।
यद्यपि, यो ऐतिहासिक जितका बावजुद नेपाल र स्कटल्याण्ड दुवै टोली प्रतियोगिताको समूह चरणबाटै बाहिरिएका छन्। नेपाल यसअघि नै इंग्ल्याण्ड, इटाली र वेस्ट इन्डिजसँग पराजित भइसकेकाले अघिल्लो चरणको दौडबाट बाहिरिएको थियो।
यसपटकको विश्वकपमा सबैभन्दा ठूलो उलटफेर भने अष्ट्रेलियाको बहिर्गमन बनेको छ। पूर्व विजेता तथा विश्व क्रिकेटको पावरहाउस मानिने अष्ट्रेलिया प्रतियोगिताबाट बाहिरिने पहिलो ठूलो टोली सावित भयो। समूह ‘बी’ मा रहेको अष्ट्रेलिया जिम्बाब्वे र श्रीलंकासँग पराजित भएपछि संकटमा परेको थियो। पल्लेकेलेमा भएको जिम्बाब्वे र आयरल्याण्डबीचको खेल वर्षाका कारण रद्द भई अंक बाँडिएपछि अष्ट्रेलियाको गणितीय सम्भावना समाप्त भएको हो।
हालसम्म सुपर-८ मा स्थान पक्का गर्ने टोलीहरूमा भारत, श्रीलंका, जिम्बाब्वे, इंग्ल्याण्ड, वेस्ट इन्डिज, दक्षिण अफ्रिका र न्युजिल्याण्ड रहेका छन्। अर्कोतर्फ नेपाल, स्कटल्याण्ड, अष्ट्रेलिया, ओमान, नामिबिया, आयरल्याण्ड, इटाली र अफगानिस्तान जस्ता टोलीहरू प्रतियोगिताबाट बिदा भइसकेका छन्।
अब समूह ‘ए’ बाट पाकिस्तान र अमेरिका मध्ये एक टोलीले सुपर-८ को अन्तिम स्थान सुरक्षित गर्ने प्रतिस्पर्धामा छन्। नेपालको लागि यस विश्वकपको यात्रा सुखद अन्त्य नभए पनि स्कटल्याण्ड विरुद्धको पहिलो ऐतिहासिक जितले नेपाली क्रिकेट र समर्थकहरूमा नयाँ उत्साह र ऊर्जा थपेको छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- ऐतिहासिक निर्वाचन सम्पन्न: प्रधानमन्त्रीद्वारा नेपाली जनता र सरोकारवालाको प्रशंसा
- मतगणना सुरु हुँदै : १६५ क्षेत्रमा निर्वाचन अधिकृतको कार्यालयमा गणना
- मतदान सकियो, मतगणना तयारी : काठमाडौंका १० क्षेत्रमा यी स्थानमा गणना
- प्रतिनिधिसभा सदस्य निर्वाचन २०८२: देशभर उत्साहजनक रूपमा मतदान सम्पन्न, करिब ६० प्रतिशत मत खस्यो
- देशभर शान्तिपूर्ण रूपमा मतदान
- किरियापुत्रीद्वारा मतदान
- राष्ट्रपति र उपराष्ट्रपति मतदानमा सहभागी भएनन्
- काठमाडौँका १० वटै निर्वाचन क्षेत्रमा शान्तिपूर्ण मतदान जारी
- पुन सञ्चालनमा आयो : इजरायलको मुख्य विमानस्थल
- १०७ वर्षीय रावतले गरे मतदान
