वर्षाका कारण कोलकाता र पन्जाबबिचको खेल रद्द

इन्डियन प्रिमियर लिग २०२६ अन्तर्गत कोलकाता नाइट राइडर्स र पन्जाब किंग्सबिचको खेल वर्षाका कारण रद्द भएको छ। कोलकातास्थित इडेन गार्डेनमा सोमबार राति तय भएको यो खेलमा वर्षा बाधक बनेपछि दुवै टोलीले १–१ अङ्क बाँडेका छन्।

खेलमा टस जितेर कोलकाताले पहिले ब्याटिङ गर्ने निर्णय गरेको थियो। तर, खेल सुरु भएको केही समयमै वर्षा भएपछि ३.४ ओभर मात्र खेल हुन सक्यो। खेल रोकिनुअघि कोलकाताले २ विकेट गुमाएर २५ रन बनाएको थियो। कोलकाताको सुरुवात निकै खराब रह्यो। ओपनर फिन एलेन ६ रन र क्यामरुन ग्रीन मात्र ४ रन बनाएर पेभिलियन फर्किएका थिए। पन्जाबका बलर जाभियर बार्टलेटले दुवै विकेट लिएर कोलकातालाई दबाबमा राखेका थिए।

लामो समयसम्मको वर्षा र भिजेको मैदानका कारण खेल पुनः सुरु हुन सकेन। राति करिब ११ बजे अम्पायरहरूले खेल रद्द गर्ने निर्णय गरे। यो नतिजासँगै पन्जाब किंग्स तालिकाको शीर्ष स्थानमा उक्लिएको छ। पन्जाबले ३ खेलबाट ५ अङ्क जोडेको छ।

अर्कोतर्फ, सुरुवाती दुई खेलमा पराजित भएको कोलकाता नाइट राइडर्सले यस खेलबाट लिगमा आफ्नो पहिलो अङ्क प्राप्त गरेको छ। ३ खेलमा १ अङ्कका साथ कोलकाता अहिले तालिकाको आठौँ स्थानमा छ।

अब कोलकाताले आफ्नो आगामी खेल बिहीबार लखनउ सुपर जायन्ट्ससँग खेल्नेछ भने पन्जाबले अप्रिल ११ मा सनराइजर्स हैदरावादको सामना गर्नेछ। इडेन गार्डेनमा खेल हेर्न पुगेका हजारौँ दर्शक भने वर्षाका कारण खेल पूरा हुन नसक्दा निराश भएर फर्किएका थिए।