एजेन्सी 
इरान र अमेरिकाबिच दुई हप्ताका लागि सशर्त युद्धविरामको सहमति भएको छ। अमेरिकी राष्ट्रपति डोनाल्ड ट्रम्पको कडा चेतावनी र पाकिस्तानका प्रधानमन्त्री शहबाज सरिफको मध्यस्थतापछि यो महत्त्वपूर्ण उपलब्धि हासिल भएको हो।
सहमति र मुख्य सर्तहरू पाकिस्तानी प्रधानमन्त्री सरिफका अनुसार बुधबार बिहानैदेखि लागू हुने गरी यो युद्धविराम तय भएको हो। सहमतिअनुसार इरानले विश्वकै महत्त्वपूर्ण व्यापारिक मार्ग ‘हर्मुज जलसन्धि’ दुई हप्ताका लागि खुला गर्नेछ। यस अवधिमा तेल र अन्य निकासीका जहाजहरूलाई इरानी सेनाको समन्वयमा आवतजावत गर्न दिइनेछ।
राष्ट्रपति ट्रम्पले सामाजिक सञ्जाल ‘ट्रुथ सोसल’ मार्फत आफूहरूले सैन्य उद्देश्यहरू पूरा गरिसकेकाले बमबारी रोक्न सहमत भएको बताउनुभएको छ। साथै, उहाँले इरानलाई सहयोग गर्ने मुलुकहरूमाथि ५० प्रतिशत भन्सार महसुल लगाउने र इरानसँग प्रतिबन्ध हटाउने विषयमा छलफल गर्ने सङ्केत समेत दिनुभएको छ।
इरानको अडान र १० बुँदे योजना युद्धविरामको स्वागत गरे पनि इरानले १० बुँदे माग अघि सारेको छ। इरानको सर्वोच्च राष्ट्रिय सुरक्षा परिषद्का अनुसार उक्त योजनामा इरान, इराक, लेबनान र यमनमा पूर्ण युद्ध अन्त्य हुनुपर्ने, जफत गरिएका इरानी कोषहरू फुकुवा हुनुपर्ने र पुनर्निर्माणका लागि क्षतिपूर्ति पाउनुपर्ने सर्तहरू छन्। इरानले आफू आणविक हतियार निर्माणमा नलाग्ने प्रतिबद्धता समेत दोहोर्याएको छ।
लेबनानमा अन्योल र इजरायलको प्रतिक्रिया यो युद्धविराममा लेबनानको विषयलाई लिएर भने विवाद देखिएको छ। प्रधानमन्त्री सरिफले लेबनानमा पनि युद्धविराम हुने बताए पनि इजरायली प्रधानमन्त्री बेन्जामिन नेतान्याहु र ट्रम्पकी प्रेस सचिव क्यारोलिन लेभिटले लेबनान यस सम्झौतामा समावेश नरहेको प्रस्ट पारेका छन्। इजरायलले टायर र नाबातिया क्षेत्रमा आफ्नो आक्रमण जारी राखेको छ।
उता, इरानको रिभोलुसनरी गार्डले लेबनानमा आक्रमण नरोकिए कडा जवाफ दिने चेतावनी दिएको छ। युद्धविराम घोषणा लगत्तै पनि इजरायलमा इरानबाट प्रहार गरिएका मिसाइलहरूका कारण साइरन बजेका थिए, जसलाई इजरायली सेनाले निस्तेज पारेको दाबी गरेको छ।
अहिलेका लागि दुई हप्ता युद्ध रोकिए पनि लेबनानको तनाव र इरानको कडा सर्तहरूका कारण यो शान्ति कति समय टिक्छ भन्नेमा विश्व समुदाय सशङ्कित छ।
श्रोत: आइएनएस-स्वतन्त्र समाचार
एजेन्सी का अन्य पोस्टहरु:
- ट्रम्प र सीबिच बेइजिङ वार्ता सम्पन्न, सम्बन्ध सुधारको दाबी तर ठुला सम्झौता भने ओझेलमा
- फिफा विश्वकप: अमेरिकाद्वारा १५ हजार डलरको भिसा धरौटी खारेज
- डोनाल्ड ट्रम्प तीन दिने भ्रमणका लागि बेइजिङमा
- सीसँग युक्रेन युद्ध अन्त्यको विषय उठाउन ट्रम्पलाई जेलेन्स्कीको आग्रह
- फ्रान्सेली राष्ट्रपति म्याक्रोनद्वारा २७ अर्ब डलरको अफ्रिकामा लगानी योजनाको घोषणा
- इजरायली ‘सेटलर्स’ र संस्थाहरूमाथि युरोपेली सङ्घको प्रतिबन्ध
- मध्यपूर्वमा शक्ति सन्तुलन मिलाउन अमेरिकाद्वारा खाडी राष्ट्रहरूलाई अर्बौँ डलरको हतियार बिक्री
- वायु ऊर्जामा चीनको वर्चस्व: विश्वव्यापी बजार कब्जा गर्ने रणनीति
- मध्यपूर्वको युद्ध लम्बिए विश्व अर्थतन्त्रमा संकट बढ्ने
- भारत विधानसभा निर्वाचन: पश्चिम बङ्गालमा भाजपाको ऐतिहासिक जित, तमिलनाडुमा नयाँ शक्तिको उदय
