प्रतिनिधि सभाको उपसभामुखका लागि आज निर्वाचन

प्रतिनिधि सभाको रिक्त उपसभामुख पदका लागि आज निर्वाचन हुँदैछ। यस पदका लागि राष्ट्रिय प्रजातन्त्र पार्टी (राप्रपा) की सरस्वती लामा र श्रम संस्कृति पार्टीकी रुबी कुमारी ठाकुर चुनावी मैदानमा उत्रिएका छन्।

सङ्घीय संसद् सचिवालयका अनुसार बिहीबार बिहान ११ बजेदेखि दिउँसो २ बजेसम्म उम्मेदवारी दर्ताको समय तोकिएको थियो, जसमा दुई जनाको मात्र उम्मेदवारी परेको हो।

सत्तारुढ दल रास्वपासँग सदनमा स्पष्ट बहुमत (झन्डै दुई तिहाइ) रहेकाले श्रम संस्कृति पार्टीकी उम्मेदवार ठाकुरको जित सहज देखिएको छ।

आज दिउँसो ४ बजे बस्ने प्रतिनिधि सभाको बैठकमा उपसभामुख चयनको औपचारिक कार्यसूची रहेको छ। बैठकमा प्रस्तावकले प्रस्ताव गर्ने र समर्थकले समर्थन गरेपछि मतदान प्रक्रिया अघि बढ्नेछ।

आजको निर्वाचनले प्रतिनिधि सभाले नयाँ उपसभामुख पाउनेछ, जसले सभामुखको अनुपस्थितिमा सदनको कार्यभार सम्हाल्ने जिम्मेवारी पाउनेछन्।