स्वतन्त्र समाचार सेवा / INS 
संघीय संसद्को बजेट अधिवेशन आजदेखि शुरु हुने भएको छ। मन्त्रीपरिषद्को सिफारिसमा राष्ट्रपति रामचन्द्र पौडेलले अधिवेशन आह्वान गरेका हुन्।
आज प्रतिनिधि सभा र राष्ट्रिय सभाको बैठक सुरु हुनुका साथै सरकारको वार्षिक नीति तथा कार्यक्रम प्रस्तुत गर्न संयुक्त सदनको बैठक पनि बस्नेछ। सरकारका तर्फबाट राष्ट्रपति पौडेलले अपराह्न ४ बजे नीति तथा कार्यक्रम प्रस्तुत गर्नेछन्।
विगत वर्षको तुलनामा केही ढिला अधिवेशन सुरु भएको बताइएको छ। कार्यतालिकामा दबाब रहेका यस अधिवेशनमा नियमित विधायिकी प्रक्रियासँगै संवैधानिक र कानुनी दायित्वका महत्त्वपूर्ण कार्यसूची अघि बढाइनेछन्। संविधानअनुसार सरकारले जेठ १५ गते वार्षिक बजेट प्रस्तुत गर्नुपर्नेछ भने असार मसान्तभित्र बजेट पारित र प्रमाणीकरणको प्रक्रिया पूरा गर्नुपर्नेछ।
यसअघि संसद् अधिवेशन नभएको समयमा राष्ट्रपतिबाट जारी भएका आठ वटा अध्यादेश पनि आजै संसद्का दुवै सदनमा पेश गरिने कार्यसूची छ। संवैधानिक व्यवस्थाअनुसार अध्यादेश संसद् पेश भएको ६० दिनभित्र प्रतिस्थापन विधेयक पारित गरिसक्नुपर्ने हुन्छ।
अधिवेशनमा प्रि–बजेट छलफल, विनियोजन विधेयकका सिद्धान्त र प्राथमिकतामाथि बहस, वैकल्पिक वित्त परिचालनसम्बन्धी विधेयक, राष्ट्रिय विधि विज्ञान प्रयोगशाला (स्थापना तथा सञ्चालन) विधेयक तथा चलचित्र विधेयक माथिको प्रक्रिया पनि अघि बढाइनेछ।
सरकारले पहिलो प्राथमिकतामा राखेका ४० भन्दा बढी विधेयक यस अधिवेशनमा संसद्मा दर्ता तथा प्रक्रियामा लैजाने तयारी गरेको छ। साथै, प्रतिनिधि सभा नियमावली २०८३ को मसौदा पनि यही अधिवेशनबाट स्वीकृत गर्ने तयारी छ। संसद् सचिवालयका अनुसार नीति तथा कार्यक्रममाथि वैशाख ३० गते छलफल, संशोधन, जवाफ तथा पारित गर्ने कार्यसूची तय गरिएको छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- फर्से बस्ती बगर बन्दा खल्लो बनेको दसैँ
- च्याम्पियन्स लिग: ८३ मिनेटसम्म ३-१ ले पछाडि परेको रियल म्याड्रिडको रोमाञ्चक पुनरागमन
- आज नवरात्रको पाँचौँ दिन: स्कन्दमाताको आराधना र पूजा
- आजका लागि विदेशी मुद्राको विनिमय दर
- छ वटा प्रदेशमा चट्याङ्गसहित वर्षा र हिमपातको सम्भावना
- कागजमै सीमित तनहुँका पूर्वाधार आयोजना
- नर्ड स्ट्रिम पाइपलाइन विस्फोट: युक्रेनी पूर्वसैन्य अधिकारीमाथि जर्मनीमा मुद्दा सुरु
- च्याम्पियन्स लिग: आर्सनलको शानदार जित, म्यानचेस्टर युनाइटेड पराजित
- नवरात्रको चौथो दिन आज कुष्माण्डा देवीको पूजा आराधना गरिँदै
- आजको मौसम पूर्वानुमान
