इरानसँग सम्झौता गर्न हतार नगर्न अमेरिकी राष्ट्रपति ट्रम्पको निर्देशन

अमेरिकी राष्ट्रपति डोनाल्ड ट्रम्पले मध्यपूर्वमा जारी युद्ध अन्त्यका लागि भइरहेको प्रयास सकारात्मक दिशातर्फ उन्मुख भए पनि इरानसँग ‘हतारमा सम्झौता नगर्न’ आफ्ना वार्ताकारहरूलाई निर्देशन दिएका छन्। सामाजिक सञ्जाल ‘ट्रुथ सोसल’ मार्फत एक सन्देश जारी गर्दै राष्ट्रपति ट्रम्पले वार्ता व्यवस्थित र रचनात्मक ढङ्गले अघि बढिरहेको स्पष्ट पारेका छन्। सम्झौताको हतारो नगर्न आफ्ना प्रतिनिधिहरूलाई सचेत गराउँदै उनले पूर्ण रूपमा प्रमाणित र हस्ताक्षर नभएसम्म इरानमाथिको नाकाबन्दी पूर्ण शक्ति र प्रभावका साथ जारी रहने चेतावनी समेत दिएका छन्।

अमेरिका र इजरायलले गत फेब्रुअरी २८ देखि इरानमाथि सुरु गरेको सैन्य आक्रमणको जवाफमा तेहरानले आर्थिक रूपमा निकै महत्त्वपूर्ण मानिने ‘स्ट्रेट अफ हर्मुज’ जलमार्गको यातायातमा अवरोध सिर्जना गरेको थियो। इरानको सोही कदमको प्रतिवाद स्वरूप अमेरिकाले गत अप्रिल १३ देखि इरानी बन्दरगाहहरूमा कडा नाकाबन्दी लगाएको घोषणा गरेको थियो। हाल अमेरिका र इरानबिच नयाँ युद्ध विराम सम्झौताको खाका तयार भइरहेको समाचारहरू सार्वजनिक भइरहेका बेला राष्ट्रपति ट्रम्पको यस्तो कडा टिप्पणी आएको होइरानसँग सम्झौताको अन्तिम तयारी भइरहँदा वासिङ्टनको राजनीतिक वृत्तमा भने रातारात द्विदलीय विरोध चर्किएको छ। थुप्रै वर्तमान तथा पूर्व सांसद र सरकारी अधिकारीहरूले सम्झौताका कथित बुँदाहरूको कडा आलोचना गरिरहेका छन्। यही पृष्ठभूमिमा राष्ट्रपति ट्रम्पले सन् २०१५ मा तत्कालीन राष्ट्रपति बाराक ओबामाको पालामा इरानसँग गरिएको आणविक सम्झौताको तीव्र आलोचना गरेका छन्। विगतको गल्ती नदोहोऱ्याउन जोड दिँदै ट्रम्पले दुवै पक्षले पर्याप्त समय लिएर मात्र सम्झौतालाई सही रूप दिनुपर्ने धारणा राखेका छन्।

यता ह्वाइट हाउसले सम्भावित सम्झौताका सर्तहरूलाई अझै गोप्य नै राखेको छ। यद्यपि, इरानी विदेश मन्त्रालयका प्रवक्ता इस्माइल बघाईले शनिबार सरकारी टेलिभिजनमार्फत दुवै देश १४ वटा धाराहरू समेटिएको एक प्रकारको सम्झौताको ढाँचा अर्थात् ‘समझदारी पत्र’ को अन्तिम तयारी नजिक पुगेको दाबी गरेका छन्। वार्ता निष्कर्षोन्मुख देखिए पनि ट्रम्पको पछिल्लो अडानले सम्झौता परिपक्व हुन अझै केही समय लाग्ने सङ्केत गरेको छ।