फेरि स्थगित भयाे प्रतिनिधि सभा बैठक

चितवनको भरतपुरमा जारी राष्ट्रिय स्वतन्त्र पार्टी (रास्वपा) को प्रथम महाधिवेशन लम्बिएका कारण प्रतिनिधि सभाको बैठक पुनः सूचना टाँसेर स्थगित गरिएको छ।

सङ्घीय संसदका महासचिव पदमप्रसाद पाण्डेयद्वारा जारी सूचना अनुसार, यसअघि असार ११ गतेका लागि निर्धारित बैठक पहिलो पटक स्थगित गरी आज (शुक्रबार) दिउँसो १ बजेका लागि तोकिएको थियो। तर, रास्वपाको महाधिवेशन अझै नसकिएका कारण सभामुख डोलप्रसाद अर्यालले प्रतिनिधि सभा नियमावली, २०८३ को नियम ६ को उपनियम ३ बमोजिम आजको बैठक पनि स्थगित गरेका हुन्। अब अर्को बैठक भोलि असार १३ गते शनिबार बिहान ११ बजे बस्ने गरी तय गरिएको छ।

असार ७ गतेदेखि चितवनको भरतपुरमा सुरु भएको रास्वपाको पहिलो ऐतिहासिक महाधिवेशनको प्रक्रिया लम्बिनु नै बैठक स्थगित हुनुको मुख्य कारण रहेको छ। २७५ सदस्यीय प्रतिनिधि सभामा रास्वपाका १८२ सांसद रहेका कारण सो पार्टीको उपस्थिति बिना संसद चलाउन सहज नभएपछि बैठक सार्नुपरेको हो।