फिफा विश्वकप २०२६: क्वार्टरफाइनलमा इङ्गल्यान्ड, एस्टेका स्टेडियममा मेक्सिकोको बिदाइ, बेलिङ्घम चम्किए

फिफा विश्वकप २०२६ को अन्तिम १६ को खेलमा सह-आयोजक मेक्सिको इङ्गल्यान्डसँग ३-२ गोल अन्तरले पराजित हुँदै प्रतियोगिताबाट बाहिरिएको छ। मेक्सिको सिटीस्थित ऐतिहासिक एस्टेका स्टेडियममा भएको उक्त खेलमा इङ्गल्यान्डका डिफेन्डर जरेल क्वान्साले ५४औँ मिनेटमा रातो कार्ड पाएपछि टोलीले ४० मिनेटभन्दा बढी समय १० खेलाडीमा सीमित भएर खेलेको थियो। तर, मेक्सिकोले त्यसको फाइदा उठाउन सकेन।

खेलमा इङ्गल्यान्डका लागि जुड बेलिङ्घमले सनसनीपूर्ण प्रदर्शन गर्दै दुई गोल गरे भने कप्तान ह्यारी केनले पेनाल्टीमार्फत निर्णायक गोल गरे। मेक्सिकोका तर्फबाट जुलियन क्विनोनेस र राउल जिमेनेजले गोल फर्काए पनि टोलीलाई हारबाट जोगाउन पर्याप्त भएन।खेलको सुरुवातदेखि नै घरेलु दर्शकको बलियो समर्थन पाएको मेक्सिकोले इङ्गल्यान्डमाथि दबाब बनाउन खोजेको थियो। तर, इङ्गल्यान्डका जुड बेलिङ्घमले ३६औँ र ३८औँ मिनेटमा लगातार दुई गोल गर्दै इङ्गल्यान्डलाई २-० को बलियो अग्रता दिलाए। पहिलो हाफ सकिनुअघि ४२औँ मिनेटमा मेक्सिकोका जुलियन क्विनोनेसले गोल गर्दै खेललाई २-१ को स्थितिमा ल्याए।

दोस्रो हाफको ५४औँ मिनेटमा खेलले नयाँ मोड लियो। इङ्गल्यान्डका जरेल क्वान्साले जेसुस गालार्डोमाथि खराब ट्याकल गरेपछि भीएआरको समीक्षा गर्दै रेफ्रीले उनलाई सिधै रातो कार्ड देखाए। १० खेलाडीमा खुम्चिएपछि इङ्गल्यान्ड पूर्ण रूपमा रक्षात्मक रणनीतिमा जान बाध्य भयो। तथापि, ६०औँ मिनेटमा एन्थोनी गोर्डनलाई पेनाल्टी बक्समा लडाएपछि इङ्गल्यान्डले पेनाल्टी पायो, जसमा ह्यारी केनले गोल गर्दै अग्रता ३-१ बनाए। यो उनको प्रतियोगिताको छैटौँ गोल थियो।

६९औँ मिनेटमा मेक्सिकोले पनि पेनाल्टीको अवसर पायो, जसलाई राउल जिमेनेजले गोलमा परिणत गर्दै खेललाई ३-२ को रोमाञ्चक स्थितिमा पुर्‍याए। त्यसपछिको समयमा मेक्सिकोले बलियो दबाब सिर्जना गरे पनि इङ्गल्यान्डको बलियो रक्षापङ्क्ति र गोलकिपर जोर्डन पिकफोर्डले उत्कृष्ट बचाउ गर्दै खेल आफ्नो पक्षमा पारे।

इङ्गल्यान्डका प्रशिक्षक थोमस टुचेल

खेल जितेर क्वार्टरफाइनलमा स्थान सुरक्षित गरेपछि इङ्गल्यान्डका मुख्य प्रशिक्षक थोमस टुचेलले आफ्ना खेलाडीहरूको मानसिकताको खुलेर प्रशंसा गरे।

“हामीलाई आजको खेल जित्न आफ्नो सम्पूर्ण शक्ति र स्रोत लगाउनु पर्‍यो। यो खेल अत्यन्तै कठिन थियो। जब-जब हामीले खेलमा लय समात्न खोज्यौँ, तब-तब हामीले चुनौती र बाधाहरूको सामना गर्नुपर्‍यो। तर हाम्रा खेलाडीहरूले उत्कृष्ट मानसिकता प्रदर्शन गरे। जब परिस्थिति कठिन हुन्छ, तिनीहरू कहिल्यै हार मान्दैनन् र आफ्नो विश्वास गुमाउँदैनन्। हामीले क्वार्टरफाइनलतर्फ अर्को एक कदम चालेका छौँ। अब हामीलाई दुई दिन आराम चाहिन्छ र यो जितको खुसीलाई आत्मसात् गर्नुपर्छ।”

रोमाञ्चक जितसँगै इङ्गल्यान्ड अब जुलाई ११ मा मियामी स्टेडियममा हुने क्वार्टरफाइनल खेलमा नर्वेको सामना गर्न तयार भएको छ भने मेक्सिकोको घरेलु मैदानमा विश्वकप यात्रा समाप्त भएको छ।