फिफा विश्वकप २०२६: फाइनल यात्राका लागि आज इङ्ल्यान्ड र अर्जेन्टिना भिड्दै

फिफा विश्वकप २०२६ को दोस्रो सेमिफाइनल खेलमा दुई परम्परागत प्रतिद्वन्द्वी इङ्गल्यान्ड 🏴󠁧󠁢󠁥󠁮󠁧󠁿 र अर्जेन्टिना 🇦🇷 आमनेसामने हुँदै छन्। विश्व फुटबल इतिहासकै सबैभन्दा रोमाञ्चक र बहुप्रतीक्षित प्रतिद्वन्द्वीतामध्ये एक मानिने यो खेल अमेरिकाको जर्जियास्थित एटलान्टा स्टेडियममा आयोजना हुनेछ।

नेपाली समय अनुसार यो खेल बिहीबार जुलाई १६, २०२६, बिहान ठिक १२:४५ बजे सुरु हुनेछ।

सेमिफाइनलसम्मको यात्रा: समूह चरणदेखि अन्तिम चारसम्म

दुवै टोलीले यस विश्वकपमा कठिन र रोमाञ्चक चुनौतीहरू पार गर्दै सेमिफाइनलको यात्रा तय गरेका हुन्।

समूह ‘एल मा रहेको इङ्गल्यान्डले क्रोएसियालाई ४-२ ले हराउँदै, घानासँग ०-० को बराबरी खेल्दै र पानामालाई २-० ले पराजित गर्दै नकआउट चरणमा प्रवेश गरेको थियो। राउन्ड अफ ३२ मा इङ्गल्यान्डले प्रजातान्त्रिक गणतन्त्र कङ्गोलाई २-१ ले स्तब्ध पार्‍यो। त्यसपछि राउन्ड अफ १६ को कडा प्रतिस्पर्धामा मेक्सिकोलाई ३-२ ले पाखा लगाउँदै टोली अघि बढ्यो। क्वार्टरफाइनलमा इङ्गल्यान्डले नर्वेलाई अतिरिक्त समयमा २-१ ले पराजित गर्दै सेमिफाइनलमा आफ्नो स्थान पक्का गरेको हो।साबिक विजेता अर्जेन्टिना समूह ‘जे’ बाट नकआउटमा पुगेको हो, जहाँ उसले अल्जेरियालाई ३-० र जोर्डनलाई ३-१ ले पराजित गरेको थियो। राउन्ड अफ ३२ को अत्यन्तै प्रतिस्पर्धात्मक खेलमा केप भर्डलाई अतिरिक्त समयमा ३-२ ले हराउँदै अर्जेन्टिना अघि बढ्यो। राउन्ड अफ १६ मा मिश्रलाई ३-२ ले पन्छाएको अर्जेन्टिनाले क्वार्टरफाइनलमा १० खेलाडीमा समेटिएको स्विट्जरल्यान्डलाई अतिरिक्त समयमा ३-१ ले पराजित गर्दै सेमिफाइनलको टिकट काटेको हो।

विगतको प्रदर्शन: २०२२ विश्वकपको अनुभव

गत २०२२ को कतार विश्वकपमा दुवै टोलीको प्रदर्शन निकै फरक रहेको थियो ।

कतार विश्वकप २०२२ को उपाधि जित्दै अर्जेन्टिना विश्व विजेता बनेको थियो। लियोनेल मेसीको कप्तानीमा रहेको टोलीले फाइनलमा फ्रान्सलाई पेनाल्टी सुट आउटमा पराजित गर्दै तेस्रो पटक विश्वकपको ट्रफी उचालेको थियो।

इङ्गल्यान्डका लागि भने कतार विश्वकप निराशाजनक रह्यो। टोली क्वार्टरफाइनलमा उपविजेता फ्रान्ससँग २-१ ले पराजित हुँदै प्रतियोगिताबाट बाहिरिएको थियो।

खेलको पूर्व समीक्षा र टोलीको लय

थॉमस टुचेलको प्रशिक्षणमा रहेको इङ्गल्यान्ड यो पटक निकै सन्तुलित र आक्रामक देखिएको छ। युवा खेलाडीहरूको जोस र रणनीतिक अनुशासन इङ्गल्यान्डको बलियो पक्ष हो। अर्कोतर्फ, लियोनेल स्कालोनीको अर्जेन्टिना साबिक विजेताको दबाबका बिच पनि आफ्नो जादुमयी लयलाई कायम राख्न सफल भएको छ। अर्जेन्टिनासँग ठुला नकआउट खेलहरू जित्ने अनुभव र गहिरो मानसिक दृढता छ।

इङ्गल्यान्डका लागि जुड बेलिङ्घम यो टोलीका मुख्य एक्स-फ्याक्टर हुन्। मध्यपंक्तिबाट खेल नियन्त्रण गर्ने र सङ्कटको समयमा गोल निकाल्ने उनको क्षमताले नर्वे विरुद्धको खेलमा पनि इङ्गल्यान्डलाई बचाएको थियो।

अर्जेन्टिनाका लागि: सर्वकालीन महान् खेलाडी लियोनेल मेसी नै अर्जेन्टिनाका मुख्य हतियार हुन्। उनको भिजन, पासिङ र जुनसुकै क्षणमा खेलको दिशा बदल्न सक्ने क्षमता विपक्षीका लागि सधैँ घातक साबित हुन्छ।

यो खेलमा कुनै एक टोलीलाई स्पष्ट विजेता दाबी गर्न निकै कठिन छ। इङ्गल्यान्डको टोली युवा र शारीरिक रूपमा बलियो छ भने अर्जेन्टिनासँग अनुभव र प्राविधिक श्रेष्ठता छ। तर, अतिरिक्त समय र पेनाल्टी सुट आउटसम्म पुग्न सक्ने इतिहास बोकेका यी दुई टोलीको भिडन्तमा साबिक विजेता अर्जेन्टिनाको नकआउट अनुभवका कारण उसको जित्ने सम्भावना सामान्य रूपमा बढी देखिन्छ।

यो सेमिफाइनल खेलको विजेताले फिफा विश्वकप २०२६ को सुनौलो ट्रफीका लागि आगामी जुलाई २० (नेपाली समय अनुसार सोमबार बिहान १२:४५ बजे) न्युयोर्क न्युजर्सी स्टेडियममा स्पेनको सामना गर्नेछ।

त्यस्तै, पराजित हुने टोलीले तेस्रो स्थानका लागि जुलाई १९ (नेपाली समय अनुसार आइतबार बिहान २:४५ बजे) मियामी स्टेडियममा फ्रान्ससँग खेल्नेछ।