एजेन्सी 
वासिङ्टन डीसी — क्यानाडासँगको व्यापारिक वार्ता भङ्ग भई तनाव चुलिएपछि अमेरिकी राष्ट्रपति डोनाल्ड ट्रम्पले दुवै देशको सीमामा रहेको प्रसिद्ध लेक ओन्टारियोको नाम फेरेर लेक अमेरिका राख्ने कार्यकारी आदेशमा हस्ताक्षर गरेका छन्।
राष्ट्रपति ट्रम्पले ह्वाइट हाउसको ओभल अफिसमा बिहीबार उक्त आदेशमा हस्ताक्षर गर्दै यो निर्णय तत्काल प्रभावकारी हुने घोषणा गरे। अमेरिकी गृह मन्त्रालयलाई देशको आधिकारिक भौगोलिक नामको अभिलेख जियोग्राफिक नेम्स इन्फर्मेशन सिस्टममा आगामी ३० दिनभित्र यो नाम अध्यावधिक गर्न निर्देशन दिइएको छ।
व्यापार युद्ध र ट्रम्पको दाबी
अमेरिका र क्यानाडाबीच हालै २० अर्ब अमेरिकी डलर बराबरको क्यानेडियन सामानमा ५० प्रतिशत भन्सार महसुल (ट्यारिफ) लगाउने निर्णय भएपछि दुई देशको सम्बन्धमा ठूलो दरार आएको छ। जवाफमा क्यानाडाले पनि आगामी महिनादेखि अमेरिकी वस्तुहरूमा ‘डलरको बदला डलर’ बराबरको प्रतिशोधात्मक महसुल लगाउने घोषणा गरिसकेको छ।
पत्रकारहरूसँग कुरा गर्दै ट्रम्पले भने, “क्यानाडाले व्यापारका क्षेत्रमा लामो समयदेखि अमेरिकाको फाइदा उठाइरहेको छ। यो आदेश क्यानाडालाई पठाइएको सिधा सन्देश नभए पनि उनीहरूको व्यवहार राम्रो छैन”। उनले ठट्टा गर्दै थपे, “अहिले हामीसँग एउटा खाडी (गल्फ) र एउटा तालको नाम अमेरिका छ। अब हामीलाई एउटा महासागर चाहिएको छ, त्यसैले सायद हामीले एट्लान्टिक वा प्यासिफिक महासागरको नाम पनि फेर्नुपर्ने हुन सक्छ”।
क्यानाडाको कडा आपत्ति
क्यानाडाका प्रधानमन्त्री मार्क कार्नीले ट्रम्पको यस कदमको तीव्र आलोचना गर्दै ‘ओन्टारियो’ नाम ४०० वर्षभन्दा पुरानो आदिवासी भाषा (इरोक्वोन/वेन्डाट) बाट आएको र यो क्यानाडाको एकीकरण तथा अमेरिकाको स्वतन्त्रताको घोषणाभन्दा अघिको इतिहास भएको बताएका छन्। उनले सामाजिक सञ्जालमा लेखेका छन्, “अमेरिकाले आफ्ना व्यापारिक सम्बन्ध र भौगोलिक नामहरू परिवर्तन गरिरहेको छ, तर क्यानेडियनहरूलाई थाहा छ कि वस्तुलाई उसको सही नामले नै बोलाउनुपर्छ। यो ताल आज र सधैंका लागि ‘लेक ओन्टारियो’ नै रहनेछ”।
त्यस्तै, ओन्टारियो प्रान्तका प्रिमियर डग फोर्ड र अन्य उच्च क्यानेडियन अधिकारीहरूले ट्रम्पको यो कदमलाई “मूर्खतापूर्ण” भन्दै क्यानाडाले नयाँ नाम कहिल्यै स्वीकार नगर्ने स्पष्ट पारेका छन्।
अन्तर्राष्ट्रिय मान्यता र अमेरिकी आन्तरिक विरोध
अन्तर्राष्ट्रिय कानुनअनुसार दुई वा सोभन्दा बढी देशले सेयर गर्ने सीमावर्ती जलक्षेत्रको नाम कुनै एक देशले एकतर्फी रूपमा फेर्न मिल्दैन। ट्रम्पको यो आदेश अमेरिकी सरकारी निकायहरूका लागि मात्र बाध्यकारी हुनेछ, तर क्यानाडा वा अन्य अन्तर्राष्ट्रिय संस्थाहरूले पुरानै नाम प्रयोग गर्न पाउनेछन्।
यसअघि सन् २०२५ मा पनि ट्रम्पले गल्फ अफ मेक्सिकोको नाम फेरेर गल्फ अफ अमेरिका राख्ने आदेश दिएका थिए। उक्त समयमा मेक्सिकोले नाम मान्न अस्वीकार गरेपछि गुगल म्याप्सले अमेरिकी प्रयोगकर्तालाई ‘गल्फ अफ अमेरिका’ र मेक्सिकन प्रयोगकर्तालाई ‘गल्फ अफ मेक्सिको’ देखाउने व्यवस्था गरेको थियो।
ट्रम्पको यो कदमको अमेरिकाभित्रै पनि विरोध सुरु भएको छ। लेक ओन्टारियोसँग सीमा जोडिएको न्युयोर्क राज्यकी गभर्नर क्याथी होचुलले न्युयोर्कले नयाँ नाम स्वीकार नगर्ने बताएकी छन् भने डेमोक्र्याटिक सांसदहरूले राष्ट्रपतिको यो कार्यकारी आदेशलाई खारेज गर्न कंग्रेसमा विधेयक प्रस्तुत गर्ने तयारी गरेका छन्।
श्रोत: आइएनएस-स्वतन्त्र समाचार
एजेन्सी का अन्य पोस्टहरु:
- अमेरिका–हुथी द्वन्द्व र ट्याङ्कर आक्रमणपछि कच्चा तेलको मूल्य प्रति ब्यारेल १०० डलर पुग्यो
- ठुला प्रविधि कम्पनीहरूलाई नियन्त्रण गर्न अदालतलाई धौ-धौ !
- तुकाराम मुण्डे: सामाजिक सञ्जालमा भाइरल बनेका भारतको महाराष्ट्रका खाद्य सुरक्षा अधिकारी
- प्रतीकात्मकताले भरिएको शान्ति वार्ता: रुस र युक्रेनबिचका आधारभूत मतभेद अझै कायम
- रुस-युक्रेन युद्ध: शान्ति वार्ताका लागि अमेरिकी टोलीले भेट्यो पुटिनलाई
- रसिया-युक्रेन युद्ध रोक्ने अमेरिकी प्रयास: ट्रम्पका दूत कुश्नर र विटकाफ मस्को र किभ भ्रमण गर्दै
- इरान युद्धमा सहयोग नगरेको भन्दै फकल्यान्ड टापु विवादमा बेलायतलाई साथ नदिने ट्रम्पको सङ्केत
- जर्मनीको लाइपजिगमा ‘विस्फोटक ड्रोन’ आक्रमणको प्रयासपछि रुसविरुद्ध कडा कदम चाल्न युरोपेली सङ्घ र नेटो प्रतिबद्ध
- अमेरिकाद्वारा इरानमा बमबारी, जवाफमा मध्यपूर्वका अमेरिकी सैन्य अखडामा क्षेप्यास्त्र प्रहार
- रसियाद्वारा तीव्र गतिको जेट-ड्रोन प्रहार: किभमा घण्टौँसम्म हवाई आक्रमणको चेतावनी, ३८ को मृत्यु
