सङ्खुवासभाको मकालु वरुण राष्ट्रिय निकुञ्जमा बहुमूल्य जडीबुटी यार्सागुम्बा सङ्कलन सुरु भएको छ। मकालु वरुण राष्ट्रिय निकुञ्जमा बहुमूल्य जडीबुटीका रुपमा लिइने यार्सागुम्बा सङ्कलन जेठ २० गतेदेखि सुरु भएको मकालु वरुण राष्ट्रिय निकुञ्जका सूचना अधिकारी स्मृति पहारीले जानकारी दिनुभयो। सो निकुञ्जमा दुई प्रजातिको यार्सागुम्बा पाइन्छ।
कार्यालयले सोलुखुम्बुको महाकुलुङ र छेस्काम मध्यवर्ती उपभोक्ता समिति, सङ्खुवासभाको किमाथांका मध्यवर्ती उपभोक्ता समिति, चेपुवा, अरुण वरुण, मकालु, पाथीभरा, सेदुवा, पुखुवा, सिलिचोङ, मांतेवा, ताम्कु, बाला र सिसुवा मध्यवर्ती उपभोक्ता समितिमार्फत पुर्जी दिने व्यवस्था गरेको छ।
अनुमति लिएका व्यक्ति वा समूहले आगामी असार २० गतेसम्म यार्सागुम्बा सङ्कलन गर्न पाउने सूचना अधिकारी पहारीले बताउनुभयो। यार्सागुम्बा मकालु, भोटखोला र सिलिचोङ गाउँपालिका क्षेत्रको मकालु वरुण निकुञ्जलगायत ठाउँमा पाइन्छ। यार्सागुम्बा उच्च हिमाली क्षेत्रका बान्सिदाको मुख्य आम्दानीको स्रोत हो। यार्सागुम्बा सङ्कलनका लागि निकुञ्ज कार्यालयले मध्यवर्ती क्षेत्रभित्रका स्थानीयलाई रु पाँच, मध्यवर्ती क्षेत्र सङ्खुवासभा र सोलुखुम्बुको उपभोक्ताका लागि रु दुई हजार र जिल्ला बाहिरका व्यक्तिका लागि रु तीन हजार प्रवेश शुल्क तोकेको छ।
गुणस्तरका आधारमा पहिलो नम्बरको यार्सागुम्बा प्रतिकेजी रु ४० लाखसम्ममा बिक्री हुने गरे पनि सङ्खुवासभामा यार्सागुम्बाप्रति केजी रु पाँच लाख ५० हजारदेखि रु सात लाख ५० हजारसम्ममा किनबेच हुने गरेको व्यापारीको भनाइ छ।
सङ्कलन गरिएको यार्सागुम्बा चीनको तिब्बती तथा काठमाडौँमा बढी निकासी हुने गरेको छ। निकुञ्ज सङ्खुवासभा र सोलुखुम्बुको एक हजार पाँच सय वर्गकिलोमिटरमा फैलिएको छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- मानव बेचबिखनको शैली फेरियो : ‘कहाँ जाने बहिनी भनेर सोध्यो भने दार्जिलिङ घुम्न जान हिँडेको भन्छन् ’
- केन्याको विद्यालयमा आगलागी हुँदा १७ बालबालिकाको मृत्यु
- आशा जगाउँदैछ कृषि औजार कारखाना
- हेर्ने कथाका पात्र ‘प्रकाश तामाङ’ को घर निर्माण सुरु
- प्रतिद्वन्द्वी ट्रम्पसँग हुने बहसको तयारीमा ह्यारिस
- दलालको फन्दामा परेर बेचिएका चेलीहरु जो उद्धारपछि बन्दैछन् आत्मनिर्भर
- यातायात कार्यालय झापाद्वारा ९३ करोड राजस्व सङ्कलन
- इराकको कुर्द क्षेत्रमा ड्रोन आक्रमण, तीन जनाको मृत्यु
- मेलम्ची बाढिपीडितले पाएका छैनन् अनुदानबापतको रकम
- मासिँदै कालीगण्डकीको जलसभ्यता
![](https://ins.news/wp-content/uploads/2024/06/HemantKC_KankrebiharSurkhet_RSS_26_gelbada.jpg)