स्वतन्त्र समाचार सेवा / INS 
पपुवान्युगिनीलाई ५० रनले पराजित गर्दै घरेलू टोली नेपाल ट्राइनेशन टी–२० क्रिकेट सिरिजको उपाधि जित्न सफल भएको छ । उत्कृष्ट लयमा देखिएका ब्याट्सम्यान दिपेन्द्रसिंह ऐरी ब्याटसँगै बलिङमा पनि चम्किएपछि यो सिरिजमा नेपालले पपुवान्युगिनीलाई लगातार तेस्रोपटक हराउन सफल भयो । उपाधिसँगै दिपेन्द्रसिंहले अन्तराष्ट्रिय टी–२० क्रिकेटमा हजार रन पूरा गर्ने पहिलो नेपाली खेलाडीको व्यक्तिगत उपलव्धि समेत आत्मसात गरे ।
टस हारेर पहिले ब्याटिङको निम्तो पाएको नेपालको शुरूवात खास रहेन । ओपनर कुशल भुर्तेल र आसिफ शेखले पहिलो विकेटका लागि ४.४ ओभरमा ३७ रनको साझेदारी गरे । भुर्तेल २५ रन बनाएर आउट भए भने आसिफले २९ रन बनाए । रोहित पौडेल मात्र २ रन बनाएर आउट भए भने आरिफ शेख र दिलिप नाथले खाता नै खोल्न सकेनन् ।
नियमित रुपमा विकेट झर्दै गएपछि एक समय नेपाल दवाव परेको नेपाललाई पुनः एकपटक दिपेन्द्रसिंह ऐरीले सम्हालेका थिए । उनले संयमित भएर खेल्दै अर्धशतक पूरा गरेपछि मात्र नेपाल १६८ रनको सम्मानजनक योगफल तयार पार्न सफल भएको थियो । दिपेन्द्रले संयमित खेल खेल्दै ३८ बलमा ५ चौकाको सहयोगमा ५४ रनको अविजित पारी खेले भने इनिङको अन्त्यतिर करण केसीले विष्फोटक खेल खेल्दै १२ बलमा ३३ रन बनाए ।
पीएनजीका लागि सेमो कामियाले ३ विकेट लिए भने चाड सोपर, काबुआ मोरिए र रिले हेकुरेको नाममा समान १–१ विकेट रह्यो ।
प्रत्युत्तरमा १६९ रनको लक्ष्य पछ्याएको पपुवान्युगिनी १६.१ ओभरमा १२७ रन बनाएर अलआउट भयो । पीएनजीलाई कम स्कोरमा समेट्ने क्रममा दिपेन्द्रसिंह ऐरीले ४ विकेट आफ्नो नाम गराए भने करन केसी ३ विकेट हात पार्न सफल रहे । कप्तान सन्दिप लामिछानेको नाममा २ विकेट रह्यो ।
फाइनलका ‘म्यान अफ दी म्याच’ दिपेन्द्रसिंह ऐरी चुनिए । प्रतियोगितामा दुई अर्धशतक र एक शतकसहित २५५ रन पूरा गर्दै ७ विकेट समेत लिएका दिपेन्द्रसिंह निर्विवाद रुपमा ‘म्यान अफ दी सिरिज’ समेत घोषित भए । दिपेन्द्रले ३४ खेल खेल्दै टी–२० क्रिकेटमा १ हजार ३३ रन बनाइसकेका छन् ।
कुल १३ विकेट लिँदै करन केसी प्रतियोगिताको सवोत्कृष्ट बलर विकेट घाेषित भए ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- सार्कको विकल्पमा उदाएको बिम्स्टेकको छैटौँ सम्मेलन बैङ्ककमा जारी
- नेपाली चलचित्रका लागि अविष्मरणीय वर्ष ‘२०८१’
- चितुवाको निसानामा बालबालिका, डेढ महिनामा एकको मृत्यु, दुई घाइते
- चन्दा सङ्कलन गरी पदमार्ग निर्माण
- म्यान्मा भूकम्प प्रभावितलाई सहायता निरन्तर जारी : संयुक्त राष्ट्रसङ्घ
- तीनकुने घटनामा दिवङ्गत पत्रकार रजकलाई लुम्बिनीमा श्रद्धाञ्जली
- बिपी राजमार्ग : वैकल्पिक सडक निर्माण गरिँदै
- किच्चकबधमा उत्खननका क्रममा ‘दरबारको जग’ भेटियो
- म्यान्मामा भूकम्पः मृतक सङ्ख्या दुई हजार नाघ्यो, एक हप्ताको राष्ट्रिय शोक घोषणा
- नागरिकतासहित तीनवटा विधेयक छलफलका लागि समितिमा पठाइयो
