स्वतन्त्र समाचार सेवा / INS नेपालको लोकतान्त्रिक आन्दोलनका एक ख्यातिप्राप्त योद्धा, शान्ति र मानवअधिकार क्षेत्रका शिर्ष व्यक्तित्व र नागरिक समाजका अगुवा पूर्वसभामुख दमननाथ ढुङ्गानाको निधन भएको छ ।
बानेश्वरस्थित फ्रन्टलाइन अस्पतालमा उपचारका क्रममा आज ८३ वर्षको उमेरमा उहाँ दिउँसो १ः३० बजे ढुङ्गानाको निधन भएको र अहिले उहाँको पार्थिव शरीर शिक्षण अस्पताल महाराजगञ्जमा राखिएको छ ।
उहाँ वि.स २०१७ साल पछि नेपालमा लोकतन्त्रको लागि विद्यार्थीहरुलाई संगठित गर्ने अभियानबाट लोकतन्त्रको संघर्षमा जुट्नु भएको थियो । लामो लोकतान्त्रिक आन्दोलनका क्रममा पटकपटक जेल जीवन समेत बिताउनु भएका उहाँ नेपालको कानुनी र संवैधानिक क्षेत्रका पनि एक शिर्ष व्यक्तिको रुपमा प्रतिष्ठित हुनुहुन्थ्यो । नेपाल विद्यार्थी संघको वैचारिक संस्थापक मानिनु हुने उहाँ नेपाल बार एशोसियसनको पनि विभिन्न नेतृत्वदायी भूमिकामा रहनु भएको थियो ।
वरिष्ठ अधिवक्ता ढङ्गाना कलेजोसँग सम्बन्धित समस्याका कारण केही समयदेखि उपचाररत हुनुहुन्थ्यो । विसं २०४७ को संविधान तर्जुमा आयोगका सदस्यसमेत रहनु भएका उहाँ २०४८ सालमा काठमाडौँ क्षेत्र नं २ बाट नेपाली कांग्रेसका तर्फबाट प्रतिनिधिसभामा निर्वाचित हुनुभएर २०५१ सम्म प्रतिनिधि सभाको सभामुख हुनुभएको थियो ।
नेपालमा संविधान सभाको निर्वाचनको लागि महत्वपूर्ण अगुवाइ र वकालत गर्नुभएका उहाँ सशस्त्र आन्दोलनमा रहेको तत्कालिन नेकपा माओवादीलाई शान्ति प्रक्रियामा ल्याउन प्रमुख भूमिका खेल्नुहुने सहजकर्ता पनि हुनुहुन्थ्यो । नेपालको मानवअधिकार आन्दोलनको एक प्रमुख अगुवाका रुपमा उहाँ सदैव सम्मानित रहनुहुने छ । अल विदा दमननाथ ढुङ्गाना ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- हुस्सु र कुहिरोले हवाई उडान प्रभावित
- पाकिस्तानमा पृथकतावादी समूहको आक्रमणमा परी सात सैनिकको मृत्यु
- आजदेखि निर्वाचन आचारसंहिता लागू, उल्लङ्घन गरे कारबाही
- जापानको आर्थिक वृद्धिदर सुस्त
- हिउँद नलाग्दै सुक्न थाले खोला
- गौशाला धर्मशालामा मारवाडी सेवा समितिको मोहियानी हक लाग्दैन : अदालत
- पाकिस्तानमा विषाक्त धुवाँका कारण एकै दिनमा १५ हजारभन्दा बढी सङ्क्रमित
- राष्ट्रपति पौडेल र अजरबैजानका राष्ट्रपतिबीच भेटवार्ता
- कोप–२९ मा नेपालको जलवायुजन्य हानिनोक्सानीबारे चर्चा
- महिलाका लागि आम्दानीको आधार बन्दै घोँगी व्यापार
