स्वतन्त्र समाचार सेवा / INS अरनिको राजमार्गअन्तर्गत काभ्रेपलान्चोकको धुलिखेल–खावा सडक खण्डको स्तरोन्नति कार्य अलपत्र अवस्थामा रहँदा यो वर्षायाममा यात्रुले ठुलो सास्ती खेप्नुपरेको छ। करिब चार वर्षदेखि निर्माणले गति नलिँदा सडक डिभिजन कार्यालय भक्तपुरले ठेक्का रद्द गरेको छ, तर नयाँ ठेक्का प्रक्रियामा ढिलाइ र कानुनी जटिलताले समस्या थपिएको छ।
सडक डिभिजन कार्यालय भक्तपुरका अनुसार, धुलिखेल–खावा सडक खण्डको स्तरोन्नतिका लागि २०७९ जेठ २० गते ‘गौरी–पार्वती निर्माण सेवा’ले २२ महिनाभित्र निर्माण सम्पन्न गर्ने गरी २० करोड १९ लाख ४६ हजार रुपैयाँको ठेक्का लिएको थियो। तर, ठेकेदारको आलटालका कारण समय सीमा सकिएको ११ महिनापछि पनि २५ प्रतिशत मात्र काम भएको थियो। फलस्वरूप, कार्यालयले गत फागुन १५ गते ठेक्का रद्द गरेको थियो।
ठेक्का रद्द भएपछि निर्माण कम्पनीले उच्च अदालत पाटनमा मुद्दा दायर गरेको थियो। अदालतले ‘निर्माण कम्पनीलाई कालोसूचीमा राख्ने, धरौटी जफतलगायत कारबाही नगर्न र सडकलाई हालको अवस्थामा राख्न’ अन्तरिम आदेश जारी गरेपछि निर्माण कार्य पूर्ण रूपमा अवरुद्ध भएको छ। कार्यालय प्रमुख सिडिई सुमन योगेशले अदालतको आदेशले नयाँ ठेक्का प्रक्रियामा बाधा नपर्ने बताए पनि नयाँ ठेक्काका लागि दुईदेखि साढे दुई महिना लाग्ने र भदौ अन्तिम साता वा असोजबाट मात्र काम सुरु हुने जानकारी दिए। नयाँ ठेक्काका लागि ४२ करोड रुपैयाँको स्रोत सुनिश्चित भएको छ।
हालसम्म धुलिखेल बसपार्कदेखि जिपलाइनसम्म डाँडा काट्ने र केही स्थानमा नाली तथा ‘ड्रेन–वाल’ बनाउने काम मात्र भएको छ। जिपलाइनदेखि खावासम्म सडक भत्काइए पनि एक किलोमिटर खण्डमा ‘कटिङ’ बाँकी छ। गत जेठमा बेस र सब–बेस हाल्ने काम सुरु भए पनि वर्षाले बगाउँदा सडक खण्डहरजस्तै बनेको छ। खाल्डाखुल्डी पुर्ने काम अहिले भइरहेको छ, तर यो अस्थायी समाधानले यात्रुको सास्ती कम भएको छैन।
यो सडक खण्ड अरनिको राजमार्गको महत्वपूर्ण हिस्सा हो, जुन सिन्धुपाल्चोकको तातोपानी नाकासहित दोलखा र रामेछाप जिल्ला जोड्छ। मालवाहक सवारीको भारवहन क्षमतालाई ध्यानमा राखी सडकलाई १२ मिटर फराकिलो बनाएर नेपालमै पहिलो पटक २० सेन्टिमिटर बाक्लो सिमेन्ट मिसिएको बेस र दुई चरणको ‘डिबिएम र आस्फाल’ कालोपत्रे गर्ने योजना छ। तर, समयमै काम नहुँदा सवारी दुर्घटना र यात्रुको सास्ती बढेको छ।
“दुई वर्षदेखि सडकको अवस्था जीर्ण छ, खाल्डाखुल्डीले सवारी चलाउन गाह्रो छ, दुर्घटनाको जोखिम छ,” स्थानीय यात्रु रमेश श्रेष्ठले गुनासो गरे। कार्यालय प्रमुख योगेशले यो सडकलाई उच्च प्राथमिकतामा राखिएको बताए पनि निर्माणमा भएको ढिलाइ र कानुनी अड्चनले स्थानीयको आक्रोश बढाएको छ।
नयाँ ठेक्का प्रक्रिया चाँडै सुरु गर्ने र वर्षायामपछि निर्माणले गति लिने कार्यालयको दाबी छ। तर, जबसम्म निर्माण सम्पन्न हुँदैन, यो सडक खण्डले यात्रुलाई सास्ती दिइरहने निश्चित छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- पूर्वी चितवनमा २८ जातका केराको परीक्षण गरिंदै
- करोडौंको लगानीमा बन्धाताल पूर्वाधार निर्माण गरिंदै
- घट्दै छन् दुर्लभ सुनौलो तोप चरा
- ट्रम्पले युक्रेनलाई मिसाइल र हतियार दिने, रुसलाई ५० दिनको अल्टिमेटम
- दक्षिण सुडानमा गैरआवासीय नेपाली संघको नयाँ कार्यसमिति चयन
- देशभर ५९ प्रतिशत धान रोपाइँ सम्पन्न
- वर्षा नहुँदा धान ब्याडमै सुक्न थाले
- चेल्सीले जित्यो २०२५ फिफा क्लब विश्वकप
- इजरायली सेनाको आक्रमणमा मध्य गाजामा पानी लिन गएका बालबालिका सहित प्यालेस्टाइनीहरूको मृत्यु
- कफीको बिरुवा – साढे १३ लाख कमाई
