स्वतन्त्र समाचार सेवा / INS 
सिद्धार्थ बैङ्क नेपाल प्रिमियर लिग (एनपिएल) २०८२ को उपाधिका लागि आज लुम्बिनी लायन्स र सुदूरपश्चिम रोयल्स भिड्दै छन्। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा दिउँसो ३ः३० बजे सुरु हुने फाइनल खेलमा नेपाली राष्ट्रिय टोलीका कप्तान रोहित पौडेल नेतृत्वको लुम्बिनी र उपकप्तान दीपेन्द्रसिंह ऐरीको कप्तानीमा रहेको सुदूरपश्चिमबिच कडा प्रतिस्पर्धा हुने अपेक्षा गरिएको छ।
यो सिजन नयाँ च्याम्पियन बन्ने पक्का भएको छ किनकि गत संस्करणको विजेता जनकपुर बोल्ट्स प्लेअफबाटै बाहिरिएको छ। साबिक उपविजेता सुदूरपश्चिमले पहिलो क्वालिफायरमा विराटनगर किंग्सलाई ७७ रनले हराउँदै फाइनलमा स्थान पक्का गरेको हो। लुम्बिनीले भने इलिमिनेटरमा काठमाडौँ गोर्खाजलाई हराएर र दोस्रो क्वालिफायरमा विराटनगरलाई ४० रनले पराजित गर्दै फाइनलमा पुगेको हो।
सुदूरपश्चिमले लिग चरणमा उत्कृष्ट प्रदर्शन गर्दै आठ खेलमध्ये सातमा जित हात पारेको थियो। टोलीका प्रमुख खेलाडीहरूमा अभिनाश बोहरा (१६ विकेट), विनोद भण्डारी (२६४ रन), हर्मित सिंह (१२ विकेट र १२३ रन) तथा दीपेन्द्रसिंह ऐरी (१४९ रन र ८ विकेट) रहेका छन्।
यता लुम्बिनीले लिग चरणमा चार जितसहित प्लेअफमा स्थान बनाएको थियो। कप्तान रोहित पौडेलले २६० रन बनाउँदै टोलीको मुख्य हतियार बनेका छन् भने शेर मल्ल (१४ विकेट), डार्सी शर्ट (२४२ रन) र रुबेल ट्रम्पेलम्यानले पनि महत्त्वपूर्ण योगदान दिएका छन्।
विजेताले १ करोड १० लाख र उपविजेताले ५१ लाख रुपैयाँ पुरस्कार प्राप्त गर्नेछन्। नेपाल क्रिकेट सङ्घ (क्यान) को आयोजनामा मङ्सिर १ गतेदेखि सुरु भएको प्रतियोगितामा आठ टोली सहभागी थिए। दर्शकहरूको उत्साहपूर्ण उपस्थितिसँगै फाइनल खेलले नेपाली क्रिकेटको रौनक बढाउने विश्वास गरिएको छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- जुनार खेतीबाट दोहोरो कमाइ, विदेशबाट फर्केका युवाको नयाँ बाटो
- त्रिविको आग्रह : समस्या वार्ता र संवादबाट समाधान गरौँ, हडताल-तोडफोड नगर्नू
- सहिद दिवसमा व्यास नगर अल्ट्रा म्याराथन
- शक्तिराष्ट्रहरूले विश्व सहयोगलाई कमजोर पार्दै : गुटेर्रेस
- आजबाट राष्ट्रिय सभाको अधिवेशन
- लोपोन्मुख पुर्ख्यौली संस्कृति जोगाउन, मालिका गाउँपालिकामा ऐतिहासिक प्रतियोगिता
- बागमती प्रदेश सरकारको बजेट कार्यान्वयन कमजोर
- आर्थिक वर्ष २०८३/८४ को बजेट निर्माण प्रक्रिया सुरु
- फागुन २१ निर्वाचन : तनहुँमा निर्वाचन प्रहरी भर्नामा कम चासो, समय थप
- मस्कको आफ्नै बच्चाकी आमाद्वारा एक्सएआई ग्रोक विरुद्ध मुद्दा दायर
