फिफा विश्वकप २०२६: राउन्ड अफ १६ को अन्तिम दिन, अर्जेन्टिना-इजिप्ट र स्विट्जरल्याण्ड-कोलम्बिया भिड्दै

विश्व फुटबलकै सबैभन्दा ठुलो महाकुम्भ, फिफा विश्वकप २०२६ को नकआउट चरण अन्तर्गत ‘राउन्ड अफ १६’ को अन्तिम दिन आज दुई खेलहरू हुँदै छन्। आजको खेल जित्ने टोलीले क्वार्टरफाइनलमा आफ्नो स्थान पक्का गर्नेछन् भने पराजित हुने टोलीको विश्वकप यात्रा यहीँ सकिनेछ।

आज हुने पहिलो महाभिडन्तमा साबिक विजेता अर्जेन्टिनाले अफ्रिकन पावरहाउस इजिप्टको सामना गर्दैछ भने दोस्रो खेलमा युरोपेली रक्षात्मक टोली स्विट्जरल्याण्ड र दक्षिण अमेरिकी आक्रामक टोली कोलम्बिया आमनेसामने हुँदै छन्।

अर्जेन्टिना विरुद्ध इजिप्ट — मेसी भर्सेस सालाहको टक्कर

• स्थान: मर्सिडीज-बेन्ज स्टेडियम, एटलान्टा, संयुक्त राज्य अमेरिका।
• समय: नेपाली समय अनुसार आज राति ९:४५ बजे ।

लियोनेल मेसीको कप्तानीमा रहेको अर्जेन्टिनाले समूह ‘जे’ मा आफ्नो वर्चस्व कायम गर्‍यो। टोलीले आफ्ना सबै ३ खेल जित्दै, १० गोल गरेर र मात्र १ गोल खाँदै ९ अङ्कका साथ समूहको शीर्ष स्थान हासिल गरेको थियो।अर्जेन्टिनाले राउन्ड अफ ३२ मा केप भर्डे को सामना गरेको थियो। निर्धारित ९० मिनेटको खेल १–१ को बराबरीमा सकिएपछि अतिरिक्त समयमा पुगेको उक्त खेलमा अर्जेन्टिनाले ३–२ को रोमाञ्चक जित दर्ता गर्‍यो। खेलमा लियोनेल मेसी र लिसान्ड्रो मार्टिनेजले गोल गरेका थिए।

मोहम्मद सालाहको नेतृत्वमा रहेको इजिप्ट समूह ‘जी’ को उपविजेता बन्दै नकआउटमा पुगेको हो। इजिप्टले समूह चरणमा १ जित र २ बराबरी खेल्दै ५ अङ्क जोडेको थियो।इजिप्टले राउन्ड अफ ३२ मा अस्ट्रेलियालाई पेनाल्टी सुटआउटमा पराजित गर्दै ऐतिहासिक यात्रा तय गर्‍यो। निर्धारित र अतिरिक्त समयको खेल १–१ को बराबरीमा सकिएपछि पेनाल्टी सुटआउटमा इजिप्ट ४–२ ले विजयी भएको थियो।

यो खेललाई धेरैले विश्व फुटबलका दुई सुपरस्टार—लियोनेल मेसी र मोहम्मद सालाहबिचको व्यक्तिगत टक्करका रूपमा पनि हेरेका छन्। साबिक विजेता अर्जेन्टिना कागजमा निकै बलियो र उपाधिको प्रमुख दाबेदार देखिन्छ। अर्जेन्टिनाको आक्रामक पङ्क्ति र मिडफिल्ड विश्वस्तरीय छ। यद्यपि, राउन्ड अफ ३२ मा केप भर्डे विरुद्ध टोलीको रक्षापङ्क्तिमा केही कमजोरी देखिएको थियो, जसको फाइदा इजिप्टले उठाउन सक्छ।

अर्कोतर्फ, इजिप्ट इतिहास रच्ने दाउमा छ। हालसम्म विश्वकपको क्वार्टरफाइनलमा पुग्न नसकेको इजिप्ट सालाहको व्यक्तिगत जादु र काउन्टर-अट्याक रणनीतिमा निर्भर रहनेछ।

स्विट्जरल्याण्ड विरुद्ध कोलम्बिया — रक्षापङ्क्ति र आक्रमणको भिडन्त

• स्थान: लस एन्जलस स्टेडियम , क्यालिफोर्निया, संयुक्त राज्य अमेरिका।
• समय: नेपाली समय अनुसार भोलि बिहान बुधबार  १:१५ बजे।

स्विट्जरल्याण्डले समूह ‘बी’मा उत्कृष्ट प्रदर्शन गर्दै २ जित र १ बराबरीका साथ ७ अङ्क जोडेर समूह विजेता बन्दै नकआउट चरण प्रवेश गरेको थियो।राउन्ड अफ ३२ को खेलमा स्विट्जरल्याण्डले अल्जेरियालाई २–० को सहज गोल अन्तरले पराजित गर्दै अन्तिम १६ मा आफ्नो स्थान सुरक्षित गरेको हो। खेलमा ब्रिल एम्बोलो र ड्यान न्दोएले गोल गरेका थिए।

दक्षिण अमेरिकी टोली कोलम्बिया समूह ‘के’ को विजेता हो। उसले २ जित र १ बराबरीसहित ७ अङ्क जोड्दै बलियो पोर्चुगललाई समेत पछि पारेर शीर्ष स्थान ओगटेको थियो।कोलम्बियाले राउन्ड अफ ३२ को कठिन खेलमा अफ्रिकी राष्ट्र घानालाई १–० को झिनो अन्तरले पराजित गर्दै यो चरणमा प्रवेश गरेको हो। कोलम्बियाका लागि जोन अरियासले निर्णायक गोल गरेका थिए।

यो खेल यस चरणकै सबैभन्दा प्रतिस्पर्धात्मक र अनुमान गर्न कठिन खेलमध्ये एक हुने अपेक्षा गरिएको छ। स्विट्जरल्याण्ड आफ्नो बलियो सङ्गठित डिफेन्स र अनुशासित खेलका लागि चिनिन्छ। उसले समूह चरण र राउन्ड अफ ३२ मा निकै कम गोल खाएको छ।

कोलम्बिया भने एकदमै आक्रामक र तीव्र गतिको फुटबल खेल्ने टोली हो। उनीहरूको शारीरिक शक्ति र विङ्ग्जबाट हुने आक्रमणलाई रोक्न स्विस डिफेन्सलाई हम्मे हम्मे पर्नेछ। ऐतिहासिक रूपमा कोलम्बियाले स्विट्जरल्याण्ड विरुद्धका पछिल्ला भेटहरूमा राम्रो नतिजा निकालेको छ।

आजका यी दुई खेलले विश्वकप २०२८ को क्वार्टरफाइनलको समीकरणलाई पूर्णता दिनेछन्, जसले गर्दा विश्वभरका फुटबल प्रेमीहरूको नजर आज एटलान्टा र लस एन्जलसका रङ्गशालामा रहनेछ।