कृष्ण विष्ट/ बैतडी 
कृष्ण विष्ट/बैतडी
बैतडीको सिगास गाउँपालिकाको केन्द्र ‘गर्जे’ बैतडीकै दुर्गम केन्द्रका रूपमा चिनिन्छ। यहाँ न सहज सडक सञ्जाल छ न आवश्यक सेवा–सुविधा। केही सीमित व्यापारिक पसल रहेको यस गाउँपालिकाको केन्द्रमा व्यापारीले मनलाग्दी रकम असुल्ने गरेका छन्।
गत आइतबार सिगास गाउँपालिका–१ की बिन्दु बिक एक दिनको पैदल यात्रा गरेर वडा नं ८ को गर्जे पुग्नुभएको थियो। छानो मर्मतको योजना परेको र सम्झौताका लागि जानुपर्ने भन्दै वडा कार्यालयबाट सिफारिस लिएर गएकी बिन्दुले एकप्रति फोटोकपी गरेको एक सय रुपैयाँ तिर्नुपरेको बताउनुभयो।
‘लालपुर्जा, नागरिकता र मोबाइलमा खिचेर लगेको घरको फोटोलाई फोटोकपी पेपरमा राखेर प्रिन्ट गराएकी हुँ,’ बिकले भन्नुभयो, ‘एक सयका दरले ३ सय भनेपछि सोही अनुसार तीन सय रुपया तिरेँ।’ फोटोकपी गर्ने पसल नै एकमात्र रहेकाले अन्त जाने विकल्पसमेत नरहेको बताउँदै व्यापारीले भनेअनुसार नै पैसा तिरेको उहाँको भनाइ छ।
यता व्यवसायी टेकसिंह ऐरले भने आवश्यक सामग्री नै महँगोमा खरिद गर्नुपर्ने भएकाले शुल्क पनि सोहीअनुसार लिनुपरेको स्वीकार गर्नुभयो। ‘हरेक सामग्री महँगोमा यहाँ आइपुग्छ। यो महँगीमा जेनेटरबाट फोटोकपी मेसिन चलाएको छु,’ व्यवसायी ऐरले सुनाउनुभयो।
बिकले फोटोकपी गर्दाको दिन सेवाग्राहीको भीड धेरै भएको र दिनैभर जेनेटर चलाएर सेवा दिएकाले महँगो लिनुपरेको उहाँको भनाइ छ। यातायातको पहुँच नहुदा व्यापारीमा धेरै लगानी गर्नुपर्ने र सोहीअनुसार मुल्य तोक्नुपर्ने बाध्यता रहेको पनि उहाँले बताउनुभयो।
गर्जेमा सीमित पसल मात्रै भएकाले मनलाग्दी रकम असुल्ने गरेको पाइएको छ। यस विषयमा गाउँपालिका उपाध्यक्ष धाना धामीलाई सोध्दा उहाँले अनुगमन गरिने जबाफ दिनुभयो। ‘यो त अति नै रकम लिइएको रहेछ,’ धामीले भन्नुभयो, ‘दुर्गम क्षेत्रमा सेवा दिएको भन्दैमा अस्वाभाविक रकम लिन पाइँदैन, यसबारे थप बुझ्छु।’
योजना नपरेपछि रित्तो हात घर
एक दिन पैदल यात्रा गरेर गर्जे पुगेकी बिकको नाममा योजना नै नपरेको भन्दै रित्तो हात फर्काइएको छ। वडा नं १ बाट छानो मर्मतका लागि योजना परेको र सम्झौताका लागि गाउँपालिका जान भन्दै सिफारिस समेत बनाइएको भए पनि गाउँपलिका पुगेगी बिन्दु रित्तै फर्किनुपरेको छ।
रोजगार सेवा केन्द्रले योजना परेको भन्दै पठाइदिन भनेपछि सिफारिस गरिएको वडा नं १ का वडा अध्यक्ष रामचन्द्र ऐरले बताउनुभयो। ‘रोजगार सेवा केन्द्रबाट फोनमार्फत छानो मर्मतको योजना परेका भनेको थियो, तर उहाँको योजना नै नपरेको रहेछ,’ अध्यक्ष ऐरले भन्नुभयो।
गाउँपालिकाको रोजगार सेवा केन्द्रबाट गलत सूचना गएकाले बिन्दुले दुःख पाएको केन्द्रले स्वीकार गरेको छ। आफ्ना कर्मचारीले बिन्दुको नाममा योजना परेको भन्दै फोन गरेका तर योजना सोही वडाका अन्य तीन जनाको नाममा भएको केन्द्रले जनाएको छ।
श्रोत: आइएनएस-स्वतन्त्र समाचार
कृष्ण विष्ट/ बैतडी का अन्य पोस्टहरु:
- नयाँ सहरको पुरानै काम : बनेका संरचना कुरूप, मुख्य काममा प्रवेश नै पाएन
- बैतडीमा अवैधानिक मेडिकलको बिगबिगी, स्वास्थ्यमाथि चरम लापरबाही
- बैतडीमा बुझ्न र बुझाउन नसकिएको ‘मर्यादित महिनावारी’
- बैतडीमा प्रसूतिलाई प्रदूषित पानी, स्वास्थ्यचौकीकै पानीट्यांकीमा भ्यागुता र चेपागाँडा !
- कौसाडीको दलित परिवार : खानेपानी नपाउँदा तीन दिन भोकै
- परोपकारी उपमेयर कौशिला : आफ्नो पारिश्रमिक विद्यार्थीलाई पढ्न सहयोग गर्दै
- पालिकाले बलजफ्ती सडक खन्यो, महिनापछि पहिरोले आमाछोराको ज्यान गयो
- ग्रामीण बजार मदिरा पसलले भरिए, सिसाले भरियो वातावरण
- बैतडीमा बालमैत्री संरचना, हाँस्दै खेल्दै पढ्न पाएपछि दंग बालबालिका
