स्वतन्त्र समाचार सेवा / INS 
भैरहवाकी कमलादेवी शर्माको दायाँ खुट्टाको घुँडामा लामो समयदेखि दुखाइको समस्या थियो। जताततै धाउँदा पनि ठीक भएन। तर उहाँकोे विशेषज्ञ चिकित्सकले शल्यक्रिया गरेपछि त्यसपछि सहजता हुँदै गएको छ। ‘कहाँ–कहाँ धाइनँ तर ठीक भएन,’ उहाँले भन्नुभयो, ‘थाई चिकित्सक र सिद्धार्थनगर सिटी अस्पतालका डाक्टरको सहयोगले शल्यक्रिया भयो, अब दुखाइ नहोला भन्ने विश्वास छ।’
घर छेउमा विदेशी विशेषज्ञ चिकित्सकबाट निःशुल्क घुँडाको शल्यक्रिया गराउन पाउँदा निकै खुशी लागेको उहाँको भनाइ छ।
लुम्बिनी सांस्कृतिक नगरपालिका–१० का ७० वर्षीया चित्रबहादुर भण्डारीको ३ वर्षदेखि बायाँ खुट्टाको घुँडामा समस्या थियो। दुखाइले उठबस र हिँडडुल गर्न निकै समस्या पथ्र्यो। स्थानीय अस्पतालमा जाँच गराउँदा शल्यक्रिया गर्न चिकित्सकले सुझाए। आर्थिक अभावले भण्डारी यत्तिकै घरमा बस्नुभयो। ‘पैसा थिएन, खर्च धेरै लाग्ने भएपछि शल्यक्रियाका लागि तयार थिइनँ,’ उहाँले भन्नुभयो।
सोमबार भने उहाँको थाइल्यान्डबाट आएका विशेषज्ञ चिकित्सकको टोलीले निःशुल्क शल्यक्रिया गर्यो। दुई दिनमै भण्डारी सामान्य हिँडडुल गर्न सक्ने हुनुभएको छ। ‘खुट्टा खुम्च्याएपछि सीधा गर्न सक्दिनथेँ, सीधा गराएपछि खुम्च्याउन समस्या थियो,’ उहाँले भन्नुभयोे, ‘अहिले शल्यक्रियापछि दुई दिनमै सहज हुँदै गएको छ।’
लुम्बिनीस्थित थाई राजकीय विहारको पहल, थाइल्यान्ड सरकारको सिरिराज अस्पतालको विशेषज्ञ टिम र भैरहवास्थित सिद्धार्थनगर सिटी अस्पतालको समन्वयमा रुपन्देही, पाल्पा, काठमाडौंलगायतका जिल्लाका विपन्न परिवारजनका घुँडामा देखिएको जटिल समस्याको सोमबार र मंगलबार निःशुल्क शल्यक्रिया गरिएको छ।
स्वदेशमा शल्यक्रियाका लागि निकै महँगो हुँदा उपचार गराउन नसकेका उहाँहरु रोगका कारण खुट्टा सीधासमेत गर्न नसक्ने अवस्थामा हुनुहुन्थ्यो। अहिले विदेशी चिकित्सक नै आएर शल्यक्रिया गरेपछि खुसी हुनुभएको छ। दुई दिनसम्म भण्डारी र शर्माजस्ता ३२ जनाको निःशुल्क शल्यक्रिया भएको हो। ३२ मध्ये १७ जना महिला र १५ जना पुरुष छन्। यीमध्ये पनि ३० जना जेष्ठ नागरिक हुन्।
आठ महिना अघि लुम्बिनीस्थित थाई विहारको समन्वयमा शिविर सञ्चालन गरी थाइल्यान्ड र सिटी अस्पतालका चिकित्सकले घुँडामा समस्या भएका ८ सय बिरामी जाँच गरेका थिए। त्यसबाट शल्यक्रिया गर्नुपर्ने तर गरिब तथा विपन्न परिवारका ३६ जना बिरामी छनोट गरिएको थियो। उसबेला छनोट गरिएका बिरामीमध्ये ३२ जनाको थाइल्यान्डबाट आएका हाडजोर्नी तथा नशा रोग विशेषज्ञ चिकित्सकले निःशुल्क शल्यक्रिया गरेका हुन्।
शल्यक्रियाका लागि १२ जना विशेषज्ञ चिकित्सक, १३ जना स्वास्थ्यकर्मी र ४५ जना दातालगायत गरी ७० जनाको टिम आएको सिटी अस्पतालका प्रबन्ध निर्देशक अर्जुन पौडेलले बताउनुभयोे।
थाइ सरकारको सिरीराज अस्पतालका हाडजोर्नी तथा नशारोग विशेषज्ञ प्रा.डा.किराती सी वानिचले बुद्ध भूमिमा आएर सेवा गर्न पाएकामा आफूहरु खुसी भएको बताउनुभयो। ‘हामीले पवित्र भूमिमा आएर सेवा गर्यौं, निकै खुसी छौं,’ उहाँले भन्नुभयो, ‘समय र वातावरण मिल्यो भने आउँदा दिनमा पनि बुद्धभूमिवासीको सेवा गर्नेछौँ।’
चिकित्सकका अनुसार नेपालमै घुँडाको शल्यक्रिया गर्नु परेमा कम्तीमा तीन–चार लाख लाग्छ। गरिब तथा विपन्नका लागि यो रकम जोहो गरेर उपचार गर्न सकस पर्छ। यो शिविरबाट गरिब तथा विपन्नले लाभ लिन पाएको पौडेलको दाबी छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- सामाजिक सञ्जालको सदुपयोग गर्दा …
- ब्लू ओरिजिनको पहिलो कक्षीय रकेट प्रक्षेपण स्थगित
- ‘बेलायतसँग भएको सन्धीले नेपाललाई सार्वभौम राष्ट्रका रूपमा चिनायो’
- देवघाटमा आजदेखि माघे सङ्क्रान्ति मेला
- अमेरिकी डलरको भाउ बढ्यो
- आज माघ सङ्क्रान्ति पर्व मनाइँदै
- महाकुम्भमा एक करोड भक्तजनको ऐतिहासिक स्नान
- शेन्झाउ–१९ दलद्वारा अन्तरिक्ष स्टेशनमा नयाँ प्रयोगको सुरूवात
- मुस्ताङ
- सूर्योदय
