स्वतन्त्र समाचार सेवा / INS 
जारी नेपाल प्रिमियर लिग (एनपीएल) क्रिकेटको दोस्रो संस्करणअन्तर्गत आज बिहीबार कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा दिउँसो ४ बजे फाइनल प्रवेशका लागि दोस्रो क्वालिफायर खेल हुँदैछ। यो खेलमा विराटनगर किङ्स र लुम्बिनी लायन्सबीच सिधै आमनेसामने हुनेछन्, जसको विजेताले शनिबार हुने फाइनलमा सुदूरपश्चिमसँग उपाधिका लागि प्रतिस्पर्धा गर्नेछ।
लिग चरणमा लुम्बिनी लायन्ससँग ५ विकेटले पराजित भएको विराटनगर किङ्सले आज त्यसको बदला लिँदै फाइनलको यात्रा पूरा गर्ने दृढ सङ्कल्प गरेको छ। पहिलो क्वालिफायरमा सुदूरपश्चिमसँग ७७ रनले हारे पनि विराटनगरले दोस्रो मौकामा कमब्याक गर्ने अपेक्षा गरिएको छ। यता, गत सिजनको तुलनामा यस वर्ष उत्कृष्ट प्रदर्शन गरिरहेको लुम्बिनी लायन्सले उपाधि जित्ने लक्ष्यसहित यो महत्त्वपूर्ण खेलमा जित सुनिश्चित गर्न मैदान उत्रिने तयारी गरेको छ।
लुम्बिनीले हिजो बुधवार भएको एलिमिनेटर खेलमा काठमाडौँ गुर्खाजलाई ४ विकेटले रोमाञ्चक तरिकाले हराएर दोस्रो क्वालिफायरमा स्थान बनाएको हो। यसैबिच, पहिलो क्वालिफायरको विजयी टिम सुदूरपश्चिमले फाइनलमा सिधै स्थान पक्का गरिसकेको छ।
यो खेलले एनपीएलको फाइनल चरणलाई थप रोमाञ्चक बनाउने अपेक्षा गरिएको छ। दुवै टिमका खेलाडीहरूले उत्कृष्ट प्रदर्शनका लागि तयारीमा छन्, तर लुम्बिनीको बलिङ र ब्याटिङ लाइनअपले विराटनगरलाई कडा चुनौती दिन सक्ने विश्लेषण गरिएको छ।
फाइनल शनिबार नै त्रिवि मैदानमा हुने आयोजकले जानकारी दिएको छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- सरकारी विज्ञापन निषेधको निर्णय सर्वाेच्चद्धारा खारेज
- फिफा विश्वकप २०२६: पहिलो सेमिफाइनलमा फ्रान्स र स्पेनबिच महाभिडन्त
- विकासको मूल प्रवाहबाट टाढा डडेलधुराको पलगडी गाउँको कथा
- सबैले वन बढेको देख्छन्, तर वनको छेउमा बस्नेको पीडा कसैले देख्दैनन्
- तीन जिल्लाको सङ्गमस्थलमा रहेको विश्वकै ठूलो शालिग्राम शिला डुबानमा
- एआईको आगामी ठुलो क्रान्ति: सिलिकन भ्यालीबाट होइन, उदीयमान बजारबाट हुने सङ्केत
- खाद्य लेबलिङ विवाद: युरोपेली सङ्घको पारदर्शितामाथि प्रश्न उठाउँदै सर्वोच्च अदालतमा मुद्दा
- कोसीमा जलस्तर बढेपछि ब्यारेजका ५६ मध्ये २० वटा ढोका खुल्ला
- आजका लागि विदेशी मुद्राको विनिमय दर
- मौसम अपडेट: आज कहाँ-कहाँ हुँदैछ भारी वर्षा?
