स्वतन्त्र समाचार सेवा / INS 
सिद्धार्थ बैङ्क नेपाल प्रिमियर लिग (एनपिएल) टी-२० क्रिकेटको दोस्रो संस्करणअन्तर्गत बिहीबार कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा भएको दोस्रो क्वालिफायर खेलमा लुम्बिनी लायन्सले विराटनगर किङ्सलाई ४० रनले पराजित गर्दै पहिलो पटक फाइनलमा स्थान पक्का गरेको छ। लुम्बिनीले यो जितसँगै शनिबार हुने फाइनलमा सुदूरपश्चिमसँग उपाधिका लागि भिड्नेछ।
टस हारेर पहिले ब्याटिङ गरेको लुम्बिनीले निर्धारित २० ओभरमा ८ विकेट गुमाउँदै १३४ रनको मध्यम स्कोर बनायो। ओपनर डार्सी शर्टले ४१ बलमा ३ चौका र १ छक्कासहित ४५ रनको योगदान दिए भने कप्तान रोहित कुमार पौडेलले ३० बलमा २ चौका र २ छक्का प्रहार गर्दै ३४ रन थपे। विकेटकिपर नरोशन डिक्वेलाले २२ बलमा ४ चौकासहित २९ रन बनाए। अन्य ब्याट्सम्यानहरू दिपक अधिकारी (१), दिलिप नाथ (१), शेर मल्ला (७), सन्दीप जोरा र जे जे स्मिथ (शून्य) ले खासै योगदान दिन सकेनन्।
विराटनगरका बलरहरूले मध्य ओभरमा कडा दबाब दिए। सुबास भण्डारीले ४ ओभरमा १६ रन खर्चेर ३ विकेट लिए भने प्रतिश जायसीले ४ ओभरमा २५ रनमा ३ विकेट हात पारे। कप्तान सन्दीप लामिछानेले ४ ओभरमा १८ रनमा २ विकेट लिए।
१३५ रनको लक्ष्य पछ्याउने क्रममा विराटनगरका ब्याट्सम्यानहरूले निराशाजनक प्रदर्शन गरे र १७.५ ओभरमा सम्पूर्ण टिम ९४ रनमा अलआउट भयो। साम हजलेटले २८ बलमा २ चौका र २ छक्कासहित ३४ रनको उच्च स्कोर बनाए भने नरेन भट्टले २१ र मर्चेन्ट डे लाङ्गेले १७ रन थपे। अन्य ब्याट्सम्यानहरू दोहोरो अंकमा पुग्न सकेनन्। विराटनगरको इनिङ्स सुरुवातमै कमजोर भयो, जसमा पावरप्लेमा ६/३ र ३०/४ को स्थितिमा पुग्यो। हजलेट र डे लाङ्गेबि २८ रनको साझेदारी मात्र थियो।
लुम्बिनीका बलर तिलक भण्डारीले ४ ओभरमा १५ रनमा ३ विकेट लिँदै उत्कृष्ट प्रदर्शन गरे भने रुबेन ट्रम्पेलम्यानले ३ ओभरमा ९ रनमा २ विकेट र अभिषेक गौतमले ४ ओभरमा २२ रनमा २ विकेट लिए। जे जे स्मिथले पनि २ विकेट चटकाए भने शेर मल्लाले १ विकेट लिए।
यो जितसँगै लुम्बिनीले एनपिएलको दोस्रो संस्करणमा पहिलो पटक फाइनल यात्रा पूरा गरेको छ। पहिलो क्वालिफायरमा सुदूरपश्चिमले विराटनगरलाई ७७ रनले हराएर सिधै फाइनलमा स्थान बनाएको थियो।
फाइनल खेल शनिबार नै त्रिवि मैदानमा हुनेछ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- जुनार खेतीबाट दोहोरो कमाइ, विदेशबाट फर्केका युवाको नयाँ बाटो
- त्रिविको आग्रह : समस्या वार्ता र संवादबाट समाधान गरौँ, हडताल-तोडफोड नगर्नू
- सहिद दिवसमा व्यास नगर अल्ट्रा म्याराथन
- शक्तिराष्ट्रहरूले विश्व सहयोगलाई कमजोर पार्दै : गुटेर्रेस
- आजबाट राष्ट्रिय सभाको अधिवेशन
- लोपोन्मुख पुर्ख्यौली संस्कृति जोगाउन, मालिका गाउँपालिकामा ऐतिहासिक प्रतियोगिता
- बागमती प्रदेश सरकारको बजेट कार्यान्वयन कमजोर
- आर्थिक वर्ष २०८३/८४ को बजेट निर्माण प्रक्रिया सुरु
- फागुन २१ निर्वाचन : तनहुँमा निर्वाचन प्रहरी भर्नामा कम चासो, समय थप
- मस्कको आफ्नै बच्चाकी आमाद्वारा एक्सएआई ग्रोक विरुद्ध मुद्दा दायर
