एनपीएल २०२६: कामिल मिश्राको कीर्तिमानी शतकमा चितवन राइनोज क्वालिफायर–२ मा, काठमाडौँ बाहिरियो

श्रीलङ्काका ब्याटर कामिल मिश्राको कीर्तिमानी अविजित शतकको मद्दतले चितवन राइनोजले नेपाल प्रिमियर लिग (एनपीएल) २०२६ को एलिमिनेटर खेलमा काठमाडौँ गोर्खाजमाथि ६१ रनको सानदार जित दर्ता गरेको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा बुधबार सम्पन्न खेलमा हासिल गरेको यो जितसँगै चितवनले दोस्रो क्वालिफायरमा स्थान सुरक्षित गरेको छ भने पराजित काठमाडौँ गोर्खाजको प्लेअफ यात्रा यहीँ समाप्त भएको छ।

अब चितवनले फाइनल प्रवेशका लागि बिहीबार हुने दोस्रो क्वालिफायरमा सुदूरपश्चिम रोयल्सको सामना गर्नेछ। यस खेलको विजेताले आगामी शनिबार उपाधिका लागि लुम्बिनी लायन्ससँग प्रतिस्पर्धा गर्नेछ।

मिश्राको कीर्तिमानी शतक र चितवनको विशाल योगफल

टस जितेर पहिले ब्याटिङ गर्ने निर्णय गरेको चितवन राइनोजले निर्धारित २० ओभरमा ४ विकेट गुमाउँदै २०४ रनको विशाल योगफल खडा गर्‍यो। चितवनको इनिङ्समा कामिल मिश्राले विस्फोटक ब्याटिङ गर्दै ५९ बलमा अविजित १२० रनको ऐतिहासिक इनिङ्स खेले। १० छक्का र ५ चौका प्रहार गरेका मिश्राले एनपीएल इतिहासकै सर्वाधिक व्यक्तिगत उच्च स्कोरको नयाँ कीर्तिमान समेत कायम गरे। यो उनको टी–२० करियरकै पहिलो शतक समेत हो।

मिश्रालाई अनुभवी ब्याटर रवि बोपाराले बलियो साथ दिए। बोपाराले ४२ बलमा ३ चौका र २ छक्काको मद्दतले ५३ रनको अर्धशतकीय योगदान दिए। यस्तै, देव खनालले १५ बलमा १७ रन जोड्दा विवेक यादवले ३ बलमा ८ रन बनाए। बलिङतर्फ काठमाडौँका कप्तान करण केसी र राशिद खानले समान २–२ विकेट लिए पनि अन्य बलरहरू महँगा साबित हुँदा चितवनलाई रोक्न सकेनन्।

रिजन र उसामाको घातक बलिङसामु काठमाडौँ निरीह

२०५ रनको विशाल लक्ष्य पछ्याउँदै जवाफी ब्याटिङमा उत्रिएको काठमाडौँ गोर्खाजले निर्धारित २० ओभरमा ९ विकेट गुमाउँदै १४३ रन मात्र जोड्न सक्यो। काठमाडौँका शीर्ष क्रमका ब्याटरहरू सस्तैमा समेटिएपछि टोली सुरुवातदेखि नै दबाबमा परेको थियो।

काठमाडौँका लागि विल बोसिस्टोले सर्वाधिक ३७ रन बनाए। उनले २८ बलमा ३ चौका र २ छक्का प्रहार गरे। यस्तै, भीम सार्कीले आक्रामक ब्याटिङ गर्दै १७ बलमा ३ छक्काको मद्दतले ३० रन जोडे भने सहान आराचिगेले १३ बलमा २४ रनको योगदान दिए। तर, अन्य ब्याटरले दोहोरो अङ्कमा रन जोड्न नसक्दा काठमाडौँ ६१ रनको फराकिलो अन्तरले पराजित हुँदै प्रतियोगिताबाट बाहिरिन बाध्य भयो।

काठमाडौँको ब्याटिङ लाइनअप ध्वस्त पार्न चितवनका बलर रिजन ढकाल र उसामा मिरले उत्कृष्ट बलिङ गरे। रिजनले ४ ओभरमा मात्र १६ रन खर्चेर ४ विकेट लिए भने उसामा मिरले ४ ओभरमा १५ रन दिँदै ३ महत्त्वपूर्ण विकेट हात पारे। यस्तै, सलाहुद्दिन खान र कुशल मल्लको नाममा १–१ विकेट रह्यो।

व्यक्तिगत कीर्तिमानभन्दा टोलीको जित महत्त्वपूर्ण

खेलको ‘प्लेयर अफ द म्याच’ घोषित भएका कामिल मिश्राले खेलपछि प्रतिक्रिया दिँदै व्यक्तिगत कीर्तिमानभन्दा टोलीको जित आफ्ना लागि महत्त्वपूर्ण रहेको बताए। उनले बिहीबार सुदूरपश्चिम रोयल्सविरुद्ध हुने दोस्रो क्वालिफायरमा पनि उत्कृष्ट प्रदर्शन गर्दै चितवनलाई पहिलो पटक एनपीएलको फाइनलमा पुर्‍याउने लक्ष्य रहेको स्पष्ट पारे।

श्रोत: आइएनएस-स्वतन्त्र समाचार

स्वतन्त्र समाचार सेवा / INS का अन्य पोस्टहरु:
Independent News Service (INS)

सम्पर्क
आदर्श मार्ग, थापाथली, काठमाडौ
इमेल : freedomnews2022@gmail.com

सोसल मिडिया

© 2021 Freedom News Service Pvt Ltd. All rights reserved

Copy link