अमेरिकी राष्ट्रपतिको रूपमा ट्रम्पको शपथसँगै कार्यकारी आदेशको बाढी

 गाजा सम्झौता कायम रहने विषयमा विश्वस्त छैनन् ट्रम्प

अमेरिकी राष्ट्रपति डोनाल्ड ट्रम्पले सोमबार आफ्नो शपथग्रहणअघि युद्धविरामका लागि गरिएको कूटनीतिको प्रशंसा गर्दै गाजामा युद्धविराम सम्झौता हुने कुरामा आफू विश्वस्त नभएको बताए ।

ह्वाइट हाउस फर्किँदा एक पत्रकारले दुवै पक्षले युद्धविराम कायम राख्ने र सम्झौतामा अघि बढ्ने बारे सोध्दा उनले भने, “यो हाम्रो युद्ध होइन; यो उनीहरूको युद्ध हो । तर म विश्वस्त छैन ।”

तथापि ट्रम्पले सन् २०२३ अक्टोबर ७ मा इजरायलमा भएको अभूतपूर्व आक्रमणबाट सुरु भएको युद्धमा हमास ‘कमजोर’ भएको बताएका थिए । “मैले गाजाको एउटा तस्विर हेरेँ”, उनले भने, “गाजा एक विशाल विध्वंस स्थल जस्तै छ ।”

इजरायल र हमासले आइतबार बन्दी र कैदीहरूको आदान–प्रदान समावेश भएको युद्धविराम सम्झौता कार्यान्वयन गर्न थालेका छन् । यो योजना सुरुमा तत्कालीन राष्ट्रपति जो बाइडेनले मे महिनामा प्रस्तुत गरेका थिए र बाइडेन तथा ट्रम्पका दूतहरूको असामान्य संयुक्त कूटनीति पछि यसलाई अघि बढाइएको थियो ।

कार्यकारी आदेशको बाढी

अमेरिकी राष्ट्रपतिको रूपमा शपथ लिएको केही घण्टामै ट्रम्पले धेरै कार्यकारी आदेशहरूमा हस्ताक्षर गरे । उनले जो बाइडेन प्रशासनका ७८ निर्णयहरू खारेज गरे ।

यससँगै अमेरिकाले पेरिस जलवायु सम्झौताबाट बाहिरिने घोषणा पनि गरेका छन् । सेना र केही अन्य आवश्यक क्षेत्रहरू बाहेक सबै सङ्घीय भर्नाहरू पनि रोकेका छन् । यति मात्र होइन, ट्रम्पले अमेरिका–मेक्सिको सीमामा अवैध आप्रवासनलाई राष्ट्रिय आपतकाल घोषणा गरे ।

उनले  अमेरिकामा विदेशी गिरोह सदस्यहरूलाई लक्षित गर्न १७९८ को एलियन एनिमीज एक्ट लागू गर्ने योजना पनि घोषणा गरे । यो कानुनी अधिकार अन्तिम पटक दोस्रो विश्वयुद्धको समयमा जापानी, जर्मन र इटालियन मूलका गैर-नागरिकहरूलाई नजरबन्द शिविरहरूमा थुन्न प्रयोग गरिएको थियो ।

राष्ट्रपति बन्ने बित्तिकै, ट्रम्पले जनवरी ६ को हिंसाको लागि दोषी ठहराइएका आफ्ना समर्थकहरूलाई माफी दिएका छन् । ट्रम्पले जनवरी ६, २०२१ को हिंसाका दोषीहरूलाई माफी दिइने वाचा गरेका थिए ।

यसै क्रममा उनले अमेरिकालाई विश्व स्वास्थ्य सङ्गठन (डब्ल्यूएचओ)बाट अलग गर्ने आदेश जारी गरेका छन् । अन्य देशहरूको तुलनामा अमेरिकाले यसको लागि अनुचित मूल्य चुकाएको उनको भनाइ छ ।

ट्रम्पले मृत्युदण्डसँग सम्बन्धित आदेशमा हस्ताक्षर गरेका छन् । यस आदेश अन्तर्गत न्याय विभागलाई गम्भीर संघीय मुद्दाहरूमा दोषी ठहरिएकाहरूलाई मृत्युदण्डको माग गर्न पनि भनिएको छ । ट्रम्पले महान्यायाधिवक्तालाई सबै राज्यहरूमा अपराधीहरूलाई मृत्युदण्ड दिन पर्याप्त विषालु सुईहरू उपलब्ध गराउन निर्देशन पनि दिए ।

ट्रम्पको यो आदेशसँगै अमेरिकामा मृत्युदण्डमाथिको प्रतिबन्ध हटेको छ । अमेरिकामा महान्यायाधिवक्ता मेरिक गारल्याण्डको आदेशमा २०२१ मा मृत्युदण्डलाई निलम्बन गरेका थिए । उक्त निर्णयको ट्रम्पले कडा आलोचना गरेका थिए र गम्भीर अपराधका दोषीहरूलाई मृत्युदण्ड दिइनु पर्नेमा जोड दिएका थिए । आफू सत्तामा फर्किएपछि मृत्युदण्ड पुनः सुरु गर्ने उनले बताएका थिए ।

राष्ट्रपति बनेयता उनले लगभग २०० कार्यकारी आदेशमा हस्ताक्षर गरिसकेका छन् । यसमा कानुनी रूपमा बाध्यकारी आदेशहरू र सामान्यतया बाध्यकारी नभएका केही घोषणाहरू समावेश छन् ।