स्वतन्त्र समाचार सेवा / INS राष्ट्रिय विभूति अरनिको स्मृति दिवसका अवसरमा कलाकार र कलालेखकहरू सम्मानित तथा पुरस्कृत भएका छन् । काठमाडौँ महानगरपालिकाका उपमेयर सुनिता डङ्गोलको प्रमुख आतिथ्यमा सो कार्यक्रम सम्पन्न भएको थियो ।
नेपाल व्यावसायिक कलाकार सङ्घद्वारा आयोजित कार्यक्रममा वरिष्ठ कलाकार हरिप्रसाद शर्मा, विजय थापा, सन्तकुमार शाक्य, श्यामबहादुर श्रेष्ठसहित १५ जना सम्मानित तथा पुरस्कृत भएका हुन् । सोही समारोहमा ‘नारायणदेवी कला लेखन पुरस्कार’ कला लेखक तथा निबन्धकार ज्ञानेन्द्र विवशलाई प्रदान गरिएको थियो ।
विवश स्वतन्त्र समाचार अनलाइनका स्तम्भ लेखकसमेत हुनुहुन्थ्यो । त्यसै गरी मूर्तिकलामा लक्ष्मण भुजेल, चित्रकलामा सुजनवीर बज्राचार्य, ग्राफिक्स डिजाइनमा प्रकाश थापा ‘प्रथा’ लगायत मोफसलका कलाकारहरू महेन्द्र राई, गणेश लामा ‘आँसु’, श्रवणकुमार चौधरी आदि लाई उपमेयरले सम्मान पत्रसहित पुरस्कार प्रदान गरेकी थिइन् ।
उपमेयर डङ्गोलले पुरस्कारदाताहरूलाई राष्ट्रिय विभूति अरनिको आकृति अङ्कित मायाको चिनो पनि प्रदान गरेकी थिइन् । कलाकारहरूलाई सम्मान पत्रसहित नगद राशिको शैली र फूलमाला अर्पण गरिएको थियो । विभिन्न दाताहरूले स्थापना गरेको १५ वटा पुरस्कार तथा सम्मान १५ जना कलासर्जकहरुलाई सोही समारोहमा प्रदान गरिएको थियो ।
कार्यक्रममा सङ्घका अध्यक्ष आईबि मल्ल, नेपाल ललितकला प्रज्ञा–प्रतिष्ठानका उपकुलपति लालकाजी लामा, भोला पौडेल, रोशन श्रेष्ठले आ–आफ्नो मन्तव्य प्रकट गरेका थिए । पुरस्कृतहरूका तर्फबाट कलाकार लक्ष्मी लामिछानेले आभार प्रकट गरेकी थिइन् ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- रियल म्याड्रिडलाई ३६ औं ला-लिगा उपाधि
- वर्षामा तरकारी गाईभैँसीलाई खुवाउनु पर्ने बाध्यता
- सरकारले अनुदान नबढाउँदा निराश छन् मौरीपालक किसान
- अझै विश्वस्त भएन घरजग्गा कारोबार
- काठमाडौँको वायु अझै अस्वस्थ
- बल्ल खुल्यो सरकारको आँखाः अग्निपीडितलाई २ किस्तामा ५० हजार
- वायु प्रदुषण बढ्यो, विशेष सावधानी अपनाउनु: सरकार
- वर्षा माग्दै कालो नागलाई कुखुराको बली
- बालबालिका गाउँमा नबस्दा संस्कार र संस्कृति लोप हुने चिन्ता
- जङ्गलका स्रोत जोगाउनै मुस्किल
