रोनाल्डो विरुद्ध मोड्रिच: अन्तिम यात्रा हो कि अमरताको अर्को अध्याय?

साढे तीन दशक होइन, मात्र साढे तीन वर्षअघि कतारको भूमिमा जब लियोनेल मेसी र क्रिस्टियानो रोनाल्डोले आफ्नो फुटबलको अलौकिक जादु छरे, तब आम मानिसले एउटा स्वर्णिम युगको अवसानको कल्पना गरेका थिए। ३५ हिउँद पार गरेका मेसीले विश्वकपको ऐतिहासिक ट्रफी चुम्दै आफूलाई ‘सर्वकालीन महानायक’को रूपमा स्थापित गरेर खेल जीवनको गोधुली साँझमा विश्राम लिने लख काटिएको थियो। उता रोनाल्डो पनि साउदी अरबको मरुभूमिमा आफ्नो खेल जीवनको अन्तिम तथा सर्वाधिक महँगो सुखद विसर्जनको तानाबाना बुन्दै थिए।

क्रोएसियाको फुटबललाई विश्व मञ्चमा तेस्रो स्थानको गौरव दिलाएका लुका मोड्रिच पनि नेसन्स लिगको सानो आँगनबाट आफ्नो खेल जीवनको विसर्जन गर्ने सोचमा थिए। तर नियतिको खेल, हामी पूर्णतः भ्रममा थियौँ!

आज अर्को विश्वकपको महाकुम्भ आफ्नो उत्कर्षमा पुग्दै गर्दा यी कालजयी योद्धाहरू अझै पनि फुटबल साम्राज्यको सिंहासनमा विराजमान छन्। उनीहरू खेल जगतका ती अमरत्व प्राप्त गर्न खोज्ने प्रविधि संसारका खर्बपति जस्तै लाग्छन्, जसको ऊर्जा कहिल्यै समाप्त हुँदैन।

जीवनको ३९ औँ वसन्तमा हिँडिरहेका मेसीले उत्तर अमेरिकी मैदानमा फेरि एक पटक आफ्नो पदचाप छाडिसकेका छन्। तर हाम्रा बाँकी दुई नक्षत्र—रोनाल्डो र मोड्रिचका लागि यो यात्राको आरम्भ उति सहज रहेन। ४० को सङ्घारमा उभिएका मोड्रिचले इंग्ल्याण्डविरुद्धको खेलमा जुन गल्ती गरेर पेनाल्टी सुम्पे, त्यो फुटबल इतिहासकै सबैभन्दा भद्र खेलाडीको छवि विपरीत थियो। त्यो दृश्य उमेरको पाबन्दीलाई भुलेर नवयुवकहरूसँग कुद्ने एउटा छटपटी जस्तो भान हुन्थ्यो।

यता रोनाल्डोको सङ्घर्ष झन् दारुण देखियो। कङ्गो विरुद्धको फिका प्रदर्शनपछि आक्रोशित आलोचकहरूले टिप्पणी गरे—”प्रशिक्षक रोबर्टो मार्टिनेज मेरुदण्डविहीन छन्, जसले मैदानको आवश्यकता भन्दा खेलाडीको प्रतिष्ठालाई महत्त्व दिइरहेका छन्।” तर, विगत दुई दशकदेखि विश्व फुटबलमा राज गरिरहेका मोड्रिचले तुरुन्तै आफ्नो वास्तविक जादु देखाए, र उज्बेकिस्तानविरुद्ध दुई शानदार गोल गर्दै रोनाल्डोले पनि विश्वसामु गर्जन गरे—”म अझै मैदानमै जीवित छु।”

रियल म्याड्रिडको त्यो स्वर्णिम युग: जहाँ उनीहरूले सँगै इतिहास लेखे

आज मैदानमा एक अर्काको अस्तित्व मेटाउन उत्रिएका यी दुई योद्धा, कुनै समय एउटै साम्राज्यका दुई सबैभन्दा बलिया खम्बा थिए। रियल म्याड्रिडको सेतो जर्सीमा रोनाल्डो र मोड्रिचले २२२ पटक सँगै मैदानमा पाइला टेकेका थिए। त्यो एउटा यस्तो स्वर्णिम युग थियो, जहाँ मोड्रिचको जादुमयी पास र रोनाल्डोको अमानवीय फिनिसिङले युरोपलाई आफ्नो मुठ्ठीमा राखेको थियो।

सान्टियागो बर्नबाउको त्यो ऐतिहासिक साझेदारी

उनीहरूले सँगै मिलेर रियल म्याड्रिडलाई ४ पटक च्याम्पियन्स लिगको उपाधि दिलाए, जसमा २०१६ देखि २०१८ सम्मको ऐतिहासिक ‘ह्याट्रिक’ उपाधि समावेश थियो। मोड्रिच मैदानको मियो बनेर खेलको लय नियन्त्रण गर्थे भने रोनाल्डो विपक्षीको रक्षापंक्ति ध्वस्त पार्दै गोलको वर्षा गर्थे। सन् २०१८ मा जब मोड्रिचले ब्यालोन डी’ओर जिते, उनले मेसी र रोनाल्डोको १४ वर्ष लामो साम्राज्यलाई विश्राम दिएका थिए। तिनीहरू केवल सहकर्मी थिएनन्, उनीहरू आधुनिक फुटबल इतिहासकै सबैभन्दा सफल र घातक जोडी थिए।

समयको गति र बदलिएको संसार

यिनीहरूको खेल जीवन कति लामो छ भन्ने कुरा समयको गतिबाटै प्रस्ट हुन्छ। मोड्रिचले मार्च २००६ मा डेब्यु गर्दा युट्युब भर्खर केही महिनाको मात्र भएको थियो। त्यति बेला अर्जेन्टिनाको टोलीमा मेसी आफ्नो सातौँ खेल खेल्दै थिए।

रोनाल्डो त त्योभन्दा पनि अगाडि, अगस्ट २००३ मा काजकिस्तानविरुद्ध मैदान छिरेका थिए। त्यति बेला पोर्चुगलको कप्तान लुइस फिगो थिए। रोनाल्डोका तत्कालीन साथीहरू—हुगो भियाना (म्यानचेस्टर सिटी), डेको (बार्सिलोना), र रुई कोस्टा (बेन्फिका)—आज वर्षौँदेखि सुट-बुट लगाएर फुटबल प्रशासन चलाइरहेका छन्। तर ३९ र ४० को उमेरमा पनि रोनाल्डो र मोड्रिच अझै आफ्नो देशको जर्सी लगाएर मैदानमा पसिना बगाउँदै छन्।

एक भावुक अन्त्यको सँघारमा

क्यानडाको मैदानमा हुन गइरहेको पोर्चुगल र क्रोएसियाबिचको यो भिडन्त अद्वितीय छ। अन्तर्राष्ट्रिय फुटबलमा २०० भन्दा बढी क्याप जितेका दुई महान खेलाडीहरू यसरी आमनेसामने भएको यो इतिहासमै पहिलो पटक हो।

तर यो भिडन्त जति रोमाञ्चक छ, त्यति नै हृदयविदारक पनि छ। यो खेल सकिएपछि दुईमध्ये एक महान खेलाडीको अन्तर्राष्ट्रिय यात्रा सधैँका लागि अन्त्य हुन सक्छ। रोनाल्डोसँग अझै पनि १,००० करियर गोल पूरा गर्ने र आफ्नै छोरासँग एउटै टिमबाट खेल्ने सपना बाँकी नै छ, त्यसैले उनी क्लब फुटबलमा टिकिरहने छन्। तर मोड्रिचसँग अब त्यस्तो कुनै ठुलो लोभ छैन। क्रोएसियाको यो यात्रा जहाँ टुङ्गिन्छ, मोड्रिचको खेल जीवन पनि सायद त्यहीँ समाप्त हुनेछ।

भोलि बिहान नेपाली समय अनुसार ठ्याक्कै ७ बजे जब यो खेलको अन्तिम सिट्ठी बज्नेछ, तब सायद एउटा युगकै अन्त्य हुनेछ। यदि ती दुईमध्ये कुनै एक महान योद्धाको खेल जीवनको बत्ती निभ्यो भने, फुटबलको यो सुन्दर संसार सधैँका लागि अलिकति रित्तो र खल्लो बन्नेछ। किनकि इतिहास साक्षी छ, यस्ता जादुगरहरू संसारमा फेरि कहिल्यै नजन्मन सक्छन्।