स्वतन्त्र समाचार सेवा / INS 
सोलुखुम्बुमा निरन्तरको वर्षासँगै खसेको पहिरोका कारण दुई वटा वडा कार्यालय भवन उच्च जोखिममा परेका छन् भने ११ घरपरिवार विस्थापित भएका छन्।
जिल्लाको सोलुदूधकुण्ड नगरपालिका–३ तामाखानी र सोताङ गाउँपालिका–४ को वडा कार्यालय भवन पहिरोको उच्च जोखिममा परेका हुन्। पहिरोका कारण वडा कार्यालयका संरचनासँगै आसपासका बस्तीसमेत जोखिममा परेका छन्।
जिल्ला विपद् व्यवस्थापन समितिका संयोजक एवं प्रमुख जिल्ला अधिकारी कमानसिं थापामगरका अनुसार सोलुदूधकुण्ड नगरपालिका–३ को वडा कार्यालय भवन गत शनिबार राति गएको पहिरोका कारण जोखिममा परेको हो।
यस्तै, सोताङ गाउँपालिका–४ को वडा कार्यालय भवन केही दिनअघि गएको पहिरोका कारण जोखिममा परेको छ। “निरन्तर वर्षात् भइरहेकाले जिल्लाका अन्य सरकारी संरचनामा समेत सामान्य क्षति पुगेको छ”, प्रमुख जिल्ला अधिकारी थापामगरले भने।
सोलुदूधकुण्ड नगरपालिका–३ तामाखानीस्थित वडा कार्यालय भवनभन्दा ठिक माथिबाट विस्तार गरिएको सडक क्षेत्रमा पहिरो जाँदा वडा कार्यालयको शौचालय बगाएको छ। पहिरोका कारण नजिकै रहेको प्रशासनिक भवनसमेत उच्च जोखिममा रहेको वडाध्यक्ष ल्हाक्पागेलु शेर्पाले बताए। उनका अनुसार वडा कार्यालयको माथिल्लो भिरबाट ठुलो पहिरो खसेको छ। पहिरोले सडकसहित आसपासका संरचनामा क्षति पुर्याएको छ भने पहिरो थप विस्तार हुनसक्ने जोखिम छ।
“पहिरो निकै ठुलो भएकाले तत्काल रोकथाम गर्न सकिने अवस्था छैन”, वडाध्यक्ष शेर्पाले भने। पहिरो थप बढेमा वडा कार्यालय भवनसँगै स्वास्थ्यचौकीसमेत प्रभावित हुनसक्ने उनले बताए। वडा कार्यालयभन्दा माथिल्लो क्षेत्रमा रहेको भिरबाट पहिरो निरन्तर खसिरहेकाले आसपासको भूभाग थप जोखिमपूर्ण बन्दै गएको उनको भनाइ छ।
त्यसैगरी, सोताङ गाउँपालिका–४ को वडा कार्यालय भवन पनि पहिरोको उच्च जोखिममा परेको छ। पहिरोले वडा कार्यालय परिसरको पर्खाल बगाएको छ। यस्तै वडा कार्यालय भवन र कर्मचारी आवाससमेत जोखिममा परेका वडाध्यक्ष दीपबहादुर राईले बताए।
पहिरो निरन्तर बढ्दै गएकाले कुनै पनि बेला वडा कार्यालय भवनसमेत तान्न सक्ने अवस्था रहेको उनले बताए। वडा कार्यालयभन्दा तल रहेका पाँच घरपरिवार पहिरोका कारण विस्थापित भएका छन्। घर जोखिममा परेपछि उनीहरू सुरक्षित स्थानमा पाल टाँगेर बसिरहेका छन्।
“पहिरो बढ्दै गएको छ। वडा कार्यालय त जोखिममा छ नै, यसले बस्तीसमेत धरापमा पारेको छ। ठुलो पानी परेको समयमा मलाई राति निद्रा लाग्दैन”, वडाध्यक्ष राईले भने, “झरी निरन्तर छ। वडा कार्यालय आसपासको जमिन पहिरोले थिलथिलो भएको छ। असाध्यै चिन्ता लाग्छ, कुन बेला के घटना हुने हो थाहा छैन।”
यसैबिच पहिरोका कारण जिल्लाको थुलुङ दूधकोशी गाउँपालिका–९ मा पाँच घरपरिवार विस्थापित भएका छन्। जिल्ला प्रहरी कार्यालय सोलुखुम्बुका प्रमुख प्रहरी नायब उपरीक्षक नविनराजा बुढाथोकीका अनुसार पहिरोका कारण घर जोखिममा परेपछि उनीहरूलाई नजिकै रहेको विद्यालय भवनमा स्थानान्तरण गरिएको छ।
त्यस्तै लिखुपिके गाउँपालिका–३ चौलाखर्कमा पनि पहिरोका कारण एक घरपरिवार विस्थापित भएको प्रहरीले जनाएको छ। घर पहिरोको जोखिममा परेपछि उक्त परिवारलाई विद्यालय भवनमा स्थानान्तरण गरिएको प्रहरी नायब उपरीक्षक बुढाथोकीले बताए।
जिल्लाका विभिन्न क्षेत्रमा पहिरोका कारण हालसम्म ११ घरपरिवार विस्थापित भएका छन्। विस्थापित परिवारलाई जोखिमयुक्त घरमा बस्न नदिई सुरक्षित स्थानमा स्थानान्तरण गरिएको प्रहरीले जनाएको छ। निरन्तर वर्षाका कारण जिल्लाका ग्रामीण सडक, सरकारी संरचना तथा बस्ती आसपासका क्षेत्रमा पहिरोको जोखिम बढेको छ। विशेष गरी भिरालो भूभागमा सडक विस्तार गरिएका क्षेत्र तथा पहिरोको पुरानो जोखिम रहेका क्षेत्रमा थप सतर्कता आवश्यक देखिएको छ।
जिल्ला प्रशासन कार्यालय तथा स्थानीय तहले वर्षाका कारण उत्पन्न हुनसक्ने जोखिमलाई मध्यनजर गर्दै जोखिमयुक्त स्थानमा रहेका बस्ती तथा संरचनाको अवस्थाबारे निगरानी गरिरहेको जनाइएको छ। वर्षा निरन्तर भइरहेकाले पहिरोको जोखिम तत्काल घट्ने अवस्था नरहेको स्थानीय जनप्रतिनिधिको भनाइ छ। जोखिमयुक्त क्षेत्रमा रहेका नागरिकलाई सतर्क रहन तथा सम्भावित विपद्को अवस्थामा सुरक्षित स्थानमा जान जिल्ला विपद् व्यवस्थापन समितिले आग्रह गरेको छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- च्याम्पियनसिप लिग: पहिलो चरणका खेलहरूमा बार्सिलोना र पिएसजीको सानदार जित, आर्सनल र लिभरपुलको पनि विजयी सुरुआत
- दुर्गमको प्रसूति व्यथा: न सडक, न चेतना
- नेपालमा बाढी पहिरो पीडितको सहयोगार्थ एएस रोमा र डब्लुएफपीबिच सहकार्य
- आज संसद्का दुवै सदनको बैठक बस्दै
- हतुवागढीका किसान अदुवा खेतीतर्फ आकर्षित
- मौसम अपडेट: पाँच प्रदेशमा भारी वर्षाको जोखिम
- आजका लागि विदेशी मुद्राको विनिमय दर
- महिला अधिकार आन्दोलनकी ‘दीपशिखा’ ग्लोरिया स्टाइनम: ९२ वर्षको ऐतिहासिक यात्रा र अझै अधुरा कार्यभारहरू
- युइएफए च्याम्पियन्स लिग: घरेलु मैदानमा रियल म्याड्रिडको विजयी सुरुवात, इन्टर मिलान २-१ ले पराजित
- राप्ती प्रादेशिक अस्पतालमा शय्याको हाहाकार
