कलाकार गोविन्दनारायण ज्या–पूले सम्पूर्ण जीवन मूर्तिकलामै बिताउनुभयो। जीवनको उत्तरार्धमा उमेरकै कारणले काम गर्न सक्ने अवस्थामा हुनुहुन्न तर उत्साह भने कम छैन। झोँछेँस्थित निवासमा किताब पढ्ने र आफैँले बनाएका कलाकृति नियालेर रमाउँदै उहाँका दिन बित्ने गरेका छन्। रोग खासै केही नभएकाले खानपानमा बारबेर पनि छैन। आगामी साउनदेखि ९६ वर्ष लाग्दै गर्नुभएका ज्या–पू जीवित नेपाली कलाकारमध्ये सबैभन्दा ज्येष्ठ हुनुहुन्छ। वि.सं. १९८४ मा तुलसीनारायण र देवमाया डङ्गोलका जेठा छोराका रूपमा उहाँको जन्म काठमाडौंको भीमसेनस्थानमा भएको हो।
उहाँ वि.सं. २०११ देखि अनवरत रूपमा नेपाल स्काउटसँग पनि आबद्ध रहँदै आउनुभयो। स्काउट छोडेको लगभग अढाइ दशक भयो होला। कला सिर्जनाका अतिरिक्त उहाँ लेखन तथा कला प्रशिक्षण …
