स्वतन्त्र समाचार सेवा / INS मुलुकले सोमबार राति राष्ट्रिय राजनीतिमा समन्वयकारी भूमिका निर्वाह गर्ने नेता सुवासचन्द्र नेम्वाङलाई गुमाएको छ। संविधानसभा अध्यक्ष तथा नेकपा (एमाले) का उपाध्यक्ष सुवासचन्द्र नेम्वाङको ७१ वर्षको उमेरमा हृदयाघातबाट निधन भएको छ।
उहाँलाई घरमै हृदयाघात भएपछि उपचारका लागि काठमाडौँ महाराजगञ्जस्थित त्रिवि शिक्षण अस्पतालमा लगिएको थियो तर उहाँको बाटोमै निधन भएको अस्पतालले जनाएको छ।
वाथरुम जाने क्रममा उहाँ ढल्नु भएको र परिवारका सदस्यले तत्कालै उपचारका लागि अस्पतालमा पुराएका थिए तर उहाँको बाटोमै निधन भएको जनाइएको छ।
शिक्षण अस्पतालका अनुसार, उहाँलाई राती १:२० बजे अस्पताल ल्याइएको थियो। अस्पतालले नियमित प्रक्रिया पूरा गरेपछि ४:२० बजे नेता सुवासचन्द्र नेम्वाङको निधनको औपचारिक घोषणा गरेको हो।
स्वच्छ र इमान्दार छवि भएका नेता सुवासचन्द्र नेम्वाङको जन्म २००९ फागुन २८ गते इलाममा भएको हो। उहाँको जन्मथलो इलामबजार नजिकै सुन्तलाबार हो । सुवासचन्द्र नेम्वाङ इलाम क्याम्पसमा पढ्दा अनेरास्ववियुमा लागेर २०२९ सालमा कम्युनिस्ट राजनीतिमा प्रवेश गर्नु भएको हो। २०३३ सालमा राजद्रोह मुद्दामा उहाँ केही समय जेल पर्नुभयो। स्नातक अध्ययनका क्रममा २०२८ सालमा अनेरास्ववियुबाट इलाम बहुमुखी क्याम्पसको स्ववियु सभापति बनेयता सुवासचन्द्र नेम्वाङ राजनीतिमा निरन्तर सक्रिय हुनुभयो।
कानुनका ज्ञाता, वरिष्ठ अधिवक्ता सुवासचन्द्र नेम्वाङले नेपाल ल क्याम्पसमा पढाउनु भएको थियो। ल क्याम्पसका सयौ विद्यार्थीका बीचमा उहाँ अहिले पनि “सुवास सर” का रूपमा लोकप्रिय हुनुहुन्छ। प्राध्यापन, कानुन व्यवसाय र राजनीतिलाई एकसाथ अघि बढाउन सफल सुवासचन्द्र नेम्वाङ नेपाल बार एसोसिएसनको महासचिव समेत हुनुभएको थियो।
सुवासचन्द्र नेम्बाङ २०५६ र ०७४ सालको संसदीय निर्वाचनमा विजयी बन्नुभएको थियो। यस्तै २०६४ र २०७० सालका दुवै संविधानसभा निर्वाचनमा पनि इलाम क्षेत्र नं. २ बाटै विजयी हुनुभएको थियो। २०४८ र २०५१ सालमा नेम्वाङ राष्ट्रियसभा सदस्य समेत बन्नुभएको थियो। उहाँ सभामुख र दुवै संविधानसभाका अध्यक्ष हुनुभयो।
एक पटक संसद्को सार्वजनिक लेखा समिति अध्यक्ष समेत बन्नुभएका नेम्वाङ कानुन, न्याय तथा संसदीय व्यवस्थामन्त्री समेत हुनुभयो।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- ‘बेलायतसँग भएको सन्धीले नेपाललाई सार्वभौम राष्ट्रका रूपमा चिनायो’
- देवघाटमा आजदेखि माघे सङ्क्रान्ति मेला
- अमेरिकी डलरको भाउ बढ्यो
- आज माघ सङ्क्रान्ति पर्व मनाइँदै
- महाकुम्भमा एक करोड भक्तजनको ऐतिहासिक स्नान
- शेन्झाउ–१९ दलद्वारा अन्तरिक्ष स्टेशनमा नयाँ प्रयोगको सुरूवात
- मुस्ताङ
- सूर्योदय
- नाम्दो गाउँ
- जिल्लामा एमबीबीएस पठनपाठन सुरू भएपछि झापावासी हर्षित
