स्वतन्त्र समाचार सेवा / INS मङ्गलवार दिउसो २ बजेर ४२ मिनेट जाँदा बझाङको तलकोट आसपास केन्द्रबिन्दु भएर ५ दशमलव ३ रेक्टर स्केलको भूकम्प गएको छ । त्यसको केही क्षणमा ३ बजेर ७ मिनेट जाँदा बझाङको सदरमुकाम चैनपुर केन्द्रबिन्दु भएर ६.३ म्याग्नेच्युटको भूकम्प गएको हो ।
भूकम्प गएपछि सदरमुकाम मार्तडी बजारमा भाग दौड र हल्ला मच्चिएको छ । सुदूरपश्चिम प्रदेश र कर्णालीसँगै पश्चिम नेपालका कयौँ जिल्लामा समेत भूकम्पको धक्का महसुस गरिएको थियो । यसबिच जयपृथ्वी राजमार्गको कचली खोलामा माथिबाट धुले पहिरो खसेर सडक अवरुद्ध भएको जनाइएको छ।
यसै गरी यो भूकम्पबाट बाजुरामा भूकम्पको प्रारम्भिक विवरण अनुसार १० घरमा पूर्ण क्षति भएको छ । खप्तड छेडे दह गाउँपालिका-३ टुनिसैनका ५ घर भत्किएका छन् भने बडिमालिका नगरपालिका ९ मा ३ घर वडा नम्बर ५ मा एक घर र त्रिवेणि नगरपालिकामा १ घरमा पूर्ण रूपमा क्षति भएको छ । त्यस्तै बुढिगंगा नगरपालिकाको महेन्द्र आधारभूत विद्यालयको भवन पनि पूर्ण रूपमा क्षति भएको विवरण आएको छ।
भूकम्पले बझाङ सहित बैतडीको सिगास गाउँपालिका, पुर्चौडी नगरपालिका, डिलासैनी गाउँपालिका र पाटन नगरपालिकामा दर्जनौँ घर र विद्यालयका भवनमा क्षति पुगेको छ । बैतडीको डिलासैनीमा एक बालिका घाइते भएकी छिन् ।
पश्चिम नेपालमा ५०० वर्षभन्दा बढी समयदेखि महाभूकम्प नगएकाले त्यहाँको भूगर्भमा धेरै ऊर्जा सञ्चित भएर बसेको भूगर्भविद्हरू बताउँछन्। तर डोटी र बाजुरामा गएका भूकम्पहरू सञ्चित ऊर्जा निष्कासनका लागि पर्याप्त नभएको उनीहरूको भनाइ छ।
नेपाल भारत र तिब्बतका बिचमा पर्ने भएकाले उच्च भूकम्पीय जोखिम भएको क्षेत्रमा पर्छ।
भारतीय उपमहाद्वीपको भूगर्भमा रहेको चट्टानहरूको तह उत्तरतिर गइरहेको छ र युरेशिएन प्लेटमा जोतिइरहेको छ। पूरै हिमालय भएको क्षेत्र ती दुई प्लेटहरू ठोक्किने स्थान हो। त्यसैले हिमालय छेउछाउ भूकम्पको सम्भावना सधैँ हुन्छ।
आवरण तस्बिर: दिउँसो ३:०७ मा भएको भूकम्पका कारण बझाङको जयपृथ्बी नगरपालिका–४ मा रहेको वाल विकास माध्यमिक विद्यालय भवनमा पुगेको क्षति । पहिलो भूकम्प आएपछि विद्यार्थीलाई घर पठाएका कारण मानवीय क्षति पुग्न पाएन ।
फोटो नरेन्द्र उपाध्यायको फेसबुक वालबाट
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- सामाजिक सञ्जालको सदुपयोग गर्दा …
- ब्लू ओरिजिनको पहिलो कक्षीय रकेट प्रक्षेपण स्थगित
- ‘बेलायतसँग भएको सन्धीले नेपाललाई सार्वभौम राष्ट्रका रूपमा चिनायो’
- देवघाटमा आजदेखि माघे सङ्क्रान्ति मेला
- अमेरिकी डलरको भाउ बढ्यो
- आज माघ सङ्क्रान्ति पर्व मनाइँदै
- महाकुम्भमा एक करोड भक्तजनको ऐतिहासिक स्नान
- शेन्झाउ–१९ दलद्वारा अन्तरिक्ष स्टेशनमा नयाँ प्रयोगको सुरूवात
- मुस्ताङ
- सूर्योदय
