युरोपमा डढेलोको महाविपत्ति: फ्रान्स र स्पेनमा २ लाख २० हजारभन्दा बढी विस्थापित

अत्यधिक गर्मी, खडेरी र तीव्र हावाहुरीका कारण फ्रान्स र स्पेनमा भीषण डढेलो फैलिएपछि भयावह स्थिति सिर्जना भएको छ। अवस्था नियन्त्रणबाहिर गएपछि दुवै देशबाट हालसम्म २ लाख २० हजारभन्दा बढी मानिसलाई सुरक्षित स्थानमा स्थानान्तरण गरिएको छ।

स्पेन सरकारले डढेलोको जोखिम बढेपछि राष्ट्रिय आपत्काल घोषणा गरेको छ। देशका २५ हजारभन्दा बढी नागरिकलाई घर छाडेर सुरक्षित ठाउँमा जान भनिएको छ भने करिब ४० हजार मानिसलाई घरभित्रै बस्न निर्देशन दिइएको छ।

स्पेनको राजधानी म्याड्रिडको पश्चिमी क्षेत्रमा तीन वटा ससाना डढेलो आपसमा गाभिएर ठुलो रूप लिएपछि अग्निनियन्त्रकहरूको पहुँचभन्दा बाहिर गएको छ। म्याड्रिड क्षेत्रीय सरकारका आपत्कालीन व्यवस्थापन प्रमुख कार्लोस नोभिलोका अनुसार डढेलो यति भीषण छ कि यसलाई सीधा निभाउन असम्भव भएकाले बचाउका उपायहरू मात्र अपनाउन सकिएको छ।

म्याड्रिडकी क्षेत्रीय अध्यक्ष इसाबेल डियाज अयुसोले यसलाई यस क्षेत्रको इतिहासकै “सबैभन्दा भयानक डढेलो” भनेकी छिन्। उनका अनुसार उच्च तापमान, तीव्र हावा र आपसमा जोडिएका डढेलोका कारण ‘पर्फेक्ट स्टर्म’ को स्थिति बनेको छ।

अहिलेसम्म म्याड्रिड क्षेत्रमा ६ हजार हेक्टर र छिमेकी अभिला प्रान्तमा ९ हजार हेक्टरभन्दा बढी वन क्षेत्र जलेर नष्ट भइसकेको छ। अभिलाको ठुलो डढेलो म्याड्रिडको डढेलोसँग गाभिन सक्ने खतरा बढेकाले अधिकारीहरू त्यसलाई रोक्ने प्रयासमा छन्। सुरक्षाका लागि आठ वटा नगरपालिकाहरू खाली गराइएको छ भने केही सहरहरूमा सर्वसाधारणलाई घरभित्रै लकडाउनमा राखिएको छ।

डढेलोको क्षेत्रमा सेनाको ‘मिल्ट्री इमर्जेन्सी युनिट’ परिचालन गरिएको छ। स्पेनका प्रधानमन्त्री पेड्रो सान्चेजले स्थिति अत्यन्तै नाटकीय र गम्भीर रहेको भन्दै नागरिकहरूलाई सतर्क रहन अपिल गरेका छन्।

फ्रान्सको दक्षिण-पश्चिमी क्षेत्र जिरोन्ड र लान्देसमा डढेलोले भीषण रूप लिएपछि करिब २ लाख मानिसलाई सुरक्षित स्थानमा सारिएको छ। स्थिति नियन्त्रणमा लिन फ्रान्सेली राष्ट्रपति इमानुएल म्याक्रोनले सेना परिचालन गरेका छन्।

बोर्दो (Bordeaux) सहरनजिकै फैलिएको डढेलोका कारण पछिल्लो समय चार वटा नगरका करिब ६० हजार बासिन्दालाई पूर्वसावधानीस्वरूप सुरक्षित ठाउँमा सारिएको छ। स्थानीय अधिकारीहरूले यसलाई अत्यन्तै ठुलो डढेलोको संज्ञा दिएका छन्, जसले १९ हजार हेक्टरभन्दा बढी वन क्षेत्र सखाप पारिसकेको छ भने ८० भन्दा बढी घरहरू पूर्ण रूपमा नष्ट भएका छन्।

पर्यटकीय क्षेत्र क्याप फेरेट प्रायद्वीपमा डढेलो सडक र बस्तीसम्म पुगेपछि सयौँ मानिसलाई डुङ्गामार्फत उद्धार गरिएको छ। फ्रान्सका गृहमन्त्री लरेन्ट नुनेजका अनुसार यो डढेलो “स्व-चालित” बनेको छ र यसले निरन्तर दिशा बदलिरहेको छ। डढेलो नियन्त्रणका क्रममा करिब ५० जना अग्निनियन्त्रक घाइते भएका छन्।

युरोपेली युनियनले फ्रान्स र स्पेनमा उद्धार तथा डढेलो नियन्त्रणका लागि हेलिकप्टर र विमानहरू परिचालन गरेको छ। स्लोभाकिया र चेक गणतन्त्रले दुई वटा ‘ब्ल्याक हक’ हेलिकप्टर सहयोग पठाएका छन्।

‘कोपर्निकस क्लाइमेट चेन्ज सर्भिस’का अनुसार युरोप विश्वका अन्य महाद्वीपको तुलनामा दोब्बर तीव्र गतिमा तातिरहेको छ। खडेरी र सुक्खा वनस्पतिमा एउटै सानो झिल्को वा प्राविधिक लापरबाहीले पनि भीषण रूप लिने गरेको छ। ‘युरोपेली वन डढेलो सूचना प्रणाली’ अनुसार यो वर्ष युरोपमा विगत २० वर्षको वार्षिक औसतभन्दा बढी भूभाग डढेलोले जलिसकेको छ।