एजेन्सी 
अमेरिकामा हालै सम्पन्न मध्यावधि निर्वाचनको नतिजासँगै सेयर बजारमा अमेरिकी प्रविधि (टेक) क्षेत्रका विशाल कम्पनीहरूको सेयर मूल्यमा भारी गिरावट आएको छ। डेमोक्र्याटिक पार्टीले अमेरिकी संसद् (काँग्रेस) र विभिन्न राज्यहरूमा अनपेक्षित सफलता हासिल गरेपछि एआई तथा डेटा सेन्टर प्रवर्धनमा कडा नियमन र मन्दी आउने आशङ्काले लगानीकर्ताहरूमा त्रास फैलाएको हो।
बिहीबारको कारोबारमा ठुला प्रविधि कम्पनीहरू संलग्न ‘म्याग्निफिसन्ट सेभेनको बजार पुँजीकरणबाट मात्रै एकै दिनमा १ ट्रिलियन (१० खर्ब) अमेरिकी डलरभन्दा बढी रकम खेर गएको छ।
अमेरिकी चुनावको नतिजा आएसँगै डेमोक्र्याट सिनेटर बर्नी स्यान्डर्सले सामाजिक सञ्जाल एक्समा एक कडा वक्तव्य जारी गर्दै राष्ट्रिय स्तरमै एआई डेटा सेन्टर निर्माणमा रोक लगाउन माग गरेका छन्।
“अमेरिकी जनता ठुला प्रविधिका महासामन्तहरूले वातावरण विनाश गरेको, रोजगारी खोसेको र मानव सभ्यताको भविष्यलाई नै जोखिममा पारेको हेर्न चाहँदैनन्। त्यसैले, राष्ट्रिय डेटा सेन्टर मोराटोरियम (निर्माण स्थगन) तुरुन्त लागू गरिनुपर्छ,” स्यान्डर्सले लेखेका छन्।
भर्जिनिया तथा टेक्ससजस्ता राज्यहरूमा अत्यधिक बिजुली खपत गर्ने डेटा सेन्टरहरूको द्रुत विस्तारमाथि लगाम लगाउने र कडा नीति ल्याइने त्रासले बजारमा ‘पैनिक सेलिङ’ (घबराहटपूर्ण बिक्री) सुरु भएको विश्लेषण गरिएको छ।
एआई प्रविधि र डेटा सेन्टरका लागि अत्यावश्यक मानिने चिप निर्माता तथा सेमिकन्डक्टर कम्पनीहरू यो गिरावटबाट सबैभन्दा बढी प्रभावित बनेका छन्।
यसै क्रममा, एआई चिपको क्षेत्रमा अग्रणी मानिने एनभिडियाको सेयर मूल्यमा ९ प्रतिशतभन्दा बढीको गिरावट आउँदा कम्पनीले आफ्नो बजार मूल्यबाट ४०० अर्ब डलरभन्दा बढी रकम गुमाउन पुगेको छ। त्यसै गरी, अन्य प्रमुख चिप निर्माता कम्पनीहरू एएमडी र माइक्रोन दुवैका सेयरहरूमा १७ प्रतिशतभन्दा बढीको भारी गिरावट दर्जा भएको छ। मेमोरी कार्ड निर्माता स्यानडिस्कको सेयर २२ प्रतिशतभन्दा बढीले तल झरेको छ भने इन्टेलको सेयर पनि १०.३ प्रतिशतले घटेको छ। यस व्यापक गिरावटका कारण ३० वटा ठुला सेमिकन्डक्टर कम्पनीहरूको कार्यसम्पादन मापन गर्ने फिलाडेल्फिया सेमिकन्डक्टर इन्डेक्स समेत एकै दिन १२ प्रतिशतभन्दा बढीले ओरालो लागेको छ।
चुनावको नतिजाले अरबपति उद्योगी इलोन मस्कका कम्पनीहरूलाई पनि ठुलो धक्का पुर्याएको छ। मस्कले रिपब्लिकन उम्मेदवारहरूको प्रचारका लागि करिब ४५ करोड (४५० मिलियन) डलर खर्च गरेका थिए, जसमा टेक्ससको सेनेट सिटका लागि केन प्याक्सटनको समर्थनमा मात्रै कम्तीमा ४ करोड ५० लाख डलर खर्च गरिएको थियो।
तर, मङ्गलवार रातिको निर्वाचनमा टेक्ससमा डेमोक्र्याटहरूको ब्लु वेभ आएपछि रिपब्लिकनहरूले पराजय भोग्नुपर्यो, जसको प्रत्यक्ष प्रभाव मस्कका कम्पनीहरूमा देखियो। यस क्रममा स्पेसएक्सको सेयर मूल्य ८ प्रतिशत र टेस्लाको सेयर करिब ११ प्रतिशतले घटेको छ भने यी दुई कम्पनीले मात्र बिहीबार ३०० अर्ब डलरभन्दा बढी बजार मूल्य गुमाएका छन्।
न्यु योर्क स्टक एक्सचेन्ज तथा नास्डाकमा प्रविधि क्षेत्र मात्र नभई बजारका प्रमुख सूचकहरू व्यापक रूपमा प्रभावित भएका छन्। एआई प्रविधिको अत्यधिक मूल्याङ्कन र नयाँ अमेरिकी सरकारको नीतिगत कडाइका कारण आगामी दिनहरूमा प्रविधि क्षेत्र थप सङ्कटमा पर्न सक्ने लगानीकर्ताहरूको बुझाइ छ।
श्रोत: आइएनएस-स्वतन्त्र समाचार
एजेन्सी का अन्य पोस्टहरु:
- अमेरिकी मध्यावधि निर्वाचन: ट्रम्पलाई ठुलो धक्का, कङ्ग्रेसका दुवै सदनमा डेमोक्र्याटको कब्जा
- युरोपमा हवाई सुरक्षामा तरङ्ग: सात वटा यात्रुवाहक विमानमा बमको झूटो धम्की, बेलायतबाट उडेका जहाज पनि प्रभावित
- युक्रेनको मानवीय सहायता केन्द्रमा रुसी बमबारी: २६ जनाको मृत्यु, कीभद्वारा घोर भर्त्सना
- फ्रान्समा प्रदर्शनकारीद्वारा प्रहरीमाथि पेट्रोल बम प्रहार: अनुसन्धान सुरु
- ‘हामी नर्कबाट फर्कियौँ’: रुसी कब्जामा रहेको सहरबाट ज्यान जोगाएर फर्किएका युक्रेनी नागरिकको पीडा
- अमेरिकाद्वारा युक्रेनलाई ५०० प्याट्रियट क्षेप्यास्त्र बिक्री गर्न स्वीकृति
- नेतान्याहुमाथि चुनावी जनादेश अवमूल्यन गरेको आरोप, विपक्षी र अरब नेताहरू आक्रोशित
- स्पेनमा भयानक उच्च-गति रेल दुर्घटना: कम्तीमा ६८ जनाको मृत्यु, दर्जनौँ घाइते
- युक्रेनको खेरसोन क्षेत्रमा युद्धविराम विस्तार, मानवीय सहायता र उद्धारको बाटो खोल्ने प्रयास
- इजरायल र अमेरिकामा निर्वाचन: विश्व राजनीतिमा पार्ने प्रभाव र यसका आयामहरू
