एजेन्सी 
युक्रेनको दक्षिणी सापोरिज्जिया क्षेत्रमा रहेको एक मानवीय सहायता वितरण केन्द्रमा रुसी सेनाले शक्तिशाली हवाई बम प्रहार गर्दा कम्तीमा २६ जनाको मृत्यु भएको छ। युक्रेनी राष्ट्रपति भोलोडिमिर जेलेन्स्कीले यस आक्रमणलाई “अत्यन्तै भयानक” भन्दै कडा शब्दमा भर्त्सना गरेका छन्।
प्राप्त विवरण अनुसार, सापोरिज्जिया क्षेत्रको कोमिसुभाखा गाउँमा सोमबार रुसले कम्तीमा नौ वटा ३,००० किलोग्राम तौलका ‘गाइडेड’ हवाई बम खसालेको थियो। यस आक्रमणमा ५ जना घाइते भएका छन् भने २४ भन्दा बढी मानिसहरू अझै बेपत्ता रहेको बताइएको छ।
राष्ट्रपति जेलेन्स्कीका अनुसार रुसी हवाई फौजले पहिलो प्रहार स्थानीय एक विद्यालय भवनमा गरेका थिए, जुन भवनलाई सर्वसाधारणलाई साप्ताहिक सहायता सामग्री वितरण गर्न प्रयोग गरिँदै आइएको थियो। पहिलो विस्फोटपछि मानिसहरू ज्यान बचाउन नजिकैको आश्रय स्थल (सेल्टर) तिर भागेका थिए। त्यस लगत्तै रुसले पुनः सोही आश्रय स्थललाई नै लक्षित गरी दोस्रो पटक बमबारी गरेको थियो।
जेलेन्स्कीले सामाजिक सञ्जालमा एक भिडियो सन्देश जारी गर्दै ध्वस्त भएका संरचना र भग्नावशेषबिच उद्धारकर्ताहरूले गरिरहेको खोजी कार्यको दृश्य सार्वजनिक गरेका छन्। भिडियो सन्देशमा बोल्दै उनले भनेका छन्:
“रुसलाई राम्रोसँग थाहा थियो कि कोमिसुभाखाका स्थानीय बासिन्दाहरूले प्रत्येक सोमबार सोही स्थानबाट मानवीय सहायता प्राप्त गर्दथे। यो आक्रमणले रुस कुनै पनि युद्धविराम वा तनाव कम गर्ने पक्षमा छैन भन्ने पुष्टि गर्छ।”
उद्धार टोली र सङ्कटकालीन सेवाले सुरुमा १८ जनाको मृत्यु भएको जनाए तापनि भग्नावशेषबाट थप शवहरू निकालिएपछि मृतकको सङ्ख्या २६ पुगेको पुष्टि गरेको छ। मृतकहरूमा दुई जना उद्धारकर्मी र चार जना पुलिस अधिकारीसमेत रहेका छन्।
यो आक्रमण अमेरिकी प्रथम महिला मेलानिया ट्रम्पको मध्यस्थतामा भएको अल्पकालीन युद्धविराम पश्चात् भएको हो। उक्त युद्धविरामका क्रममा रुसको कब्जामा रहेको ओलेस्की सहरबाट सर्वसाधारणलाई सुरक्षित बाहिर निकालिएको थियो। जेलेन्स्कीका अनुसार सो सफल उद्धारपछि शान्ति सम्झौताका लागि अगाडि बढ्ने अवसर सिर्जना भएको थियो। तर, यो भयानक हत्याकाण्ड गराएर रुसले शान्तिको सट्टा थप हिंसा र हत्या चाहन्छ भन्ने स्पष्ट सन्देश दिएको युक्रेनको आरोप छ।
सापोरिज्जिया क्षेत्रीय प्रशासनका प्रमुख माइखाइलो सेमिकिनले घटनालाई गाउँका लागि “भयावह त्रासदी” भनेका छन्। उद्धार कार्य जारी रहेकै समयमा पनि रुसी ड्रोनहरू सो क्षेत्रमा घुमिरहेकाले धेरै पटक खोजी तथा उद्धार कार्य रोक्नुपरेको सेमिकिनले बताएका छन्। त्रासदीको शोकमा सापोरिज्जिया क्षेत्रभरि मङ्गलबार शोक दिवस घोषणा गरिएको छ।
फेब्रुअरी २०२२ मा रुसले युक्रेनमाथि पूर्ण स्तरको सैन्य आक्रमण सुरु गरेयता हजारौँ सर्वसाधारणले ज्यान गुमाइसकेका छन्। पछिल्लो समय युक्रेनसँग रुसी क्षेप्यास्त्र रोक्ने पश्चिमी रक्षा प्रणाली (इन्टरसेप्टर) को अभाव भएपछि रुसले आफ्ना हवाई आक्रमणहरू तीव्र पारेको छ।
संयुक्त अरब इमिरेट्सको आबु धाबीमा युक्रेन, रुस र अमेरिकाका प्रतिनिधिहरूबिच पुनः शान्ति वार्ता सुरु हुने तयारी भइरहेका बेला यो आक्रमण भएको हो। यद्यपि, रुसले आक्रमण नरोकेकाले आगामी वार्ताबाट ठुलो कूटनीतिक प्रगति हुने अपेक्षा भने कमै गरिएको छ। रुसी सेनाले भने यस आक्रमणका सम्बन्धमा हालसम्म कुनै सार्वजनिक टिप्पणी गरेको छैन।
श्रोत: आइएनएस-स्वतन्त्र समाचार
एजेन्सी का अन्य पोस्टहरु:
- अमेरिकाको मध्यावधि चुनावपछि प्रविधि शेयरमा ठुलो पहिरो: एआई क्षेत्रमा मन्दी आउने त्रास
- अमेरिकी मध्यावधि निर्वाचन: ट्रम्पलाई ठुलो धक्का, कङ्ग्रेसका दुवै सदनमा डेमोक्र्याटको कब्जा
- युरोपमा हवाई सुरक्षामा तरङ्ग: सात वटा यात्रुवाहक विमानमा बमको झूटो धम्की, बेलायतबाट उडेका जहाज पनि प्रभावित
- फ्रान्समा प्रदर्शनकारीद्वारा प्रहरीमाथि पेट्रोल बम प्रहार: अनुसन्धान सुरु
- ‘हामी नर्कबाट फर्कियौँ’: रुसी कब्जामा रहेको सहरबाट ज्यान जोगाएर फर्किएका युक्रेनी नागरिकको पीडा
- अमेरिकाद्वारा युक्रेनलाई ५०० प्याट्रियट क्षेप्यास्त्र बिक्री गर्न स्वीकृति
- नेतान्याहुमाथि चुनावी जनादेश अवमूल्यन गरेको आरोप, विपक्षी र अरब नेताहरू आक्रोशित
- स्पेनमा भयानक उच्च-गति रेल दुर्घटना: कम्तीमा ६८ जनाको मृत्यु, दर्जनौँ घाइते
- युक्रेनको खेरसोन क्षेत्रमा युद्धविराम विस्तार, मानवीय सहायता र उद्धारको बाटो खोल्ने प्रयास
- इजरायल र अमेरिकामा निर्वाचन: विश्व राजनीतिमा पार्ने प्रभाव र यसका आयामहरू
