फ्रान्स र स्पेनमा भीषण डढेलो: बोर्दो सहर जोखिममा, राष्ट्रपति म्याक्रोनद्वारा आपत्कालीन बैठक आह्वान

दक्षिण-पश्चिम फ्रान्सको पर्यटकीय तथा प्रमुख सहर बोर्दो नजिकै भीषण डढेलो फैलिएपछि फ्रान्सेली राष्ट्रपति इम्यानुएल म्याक्रोनले सोमबार उच्चस्तरीय आपत्कालीन मन्त्रिपरिषद् बैठक आह्वान गर्नुभएको छ। अत्यधिक तातो हावा (लु) र खडेरीका कारण अनियन्त्रित बनेको डढेलो बोर्दो सहरबाट करिब १५ किलोमिटरको दूरीमा पुगेपछि स्थिति थप चिन्ताजनक बनेको छ।

बोर्दोका नगरप्रमुख थोमस काजेनेभका अनुसार भीषण तापक्रमका कारण अग्नि नियन्त्रण प्रयास जटिल बन्दै गएको छ। हाल करिब ८ लाख ५० हजार जनसङ्ख्या रहेको सो सहरबाट तत्काल मानिसहरूलाई स्थानान्तरण गर्ने योजना नरहे पनि अवस्थाको सूक्ष्म अनुगमन भइरहेको छ।

फ्रान्समा ‘अग्नि-चट्याङ’ को अनौठो र खतरनाक दृश्य

फ्रान्सको नेसनल फाइटरफेडेरेसनका अनुसार जिरोन्द क्षेत्रमा सल्किएको डढेलोले दोस्रो विश्वयुद्धपछिकै भयानक रूप लिएको छ। डढेलोका कारण आकाशमा विशाल ‘पाइरोक्युमुलोनिम्बस’ अर्थात् आगोको हावा र चट्याङसहितको भयानक बादल उत्पन्न भएको छ।

संस्थाका प्रवक्ता एरिक ब्रोकार्डीले अवस्थाको गम्भीरताबारे टिप्पणी गर्दै भन्नुभयो, “हामीले असमान युद्ध लडिरहेका छौँ। डढेलोको अगाडि सिधा लड्न सम्भव छैन। यसलाई नियन्त्रणमा लिन कि त लगातार तीन दिनसम्म ठुलो वर्षा हुनुपर्छ, कि त आगो आफैँ शान्त हुने समुद्र वा खुला क्षेत्रतर्फ लैजानुपर्छ।”

दक्षिण-पश्चिमी फ्रान्समा मात्रै करिब ४२ हजार हेक्टर वन क्षेत्र डढेलोले नष्ट गरिसकेको छ भने वर्षको सुरुवातदेखि हालसम्म देशभर ९८ हजार हेक्टरभन्दा बढी जग्गा प्रभावित भएको छ। स्थिति नियन्त्रण बाहिर जाँदा दक्षिण-पश्चिम क्षेत्रबाट २ लाख २० हजारभन्दा बढी मानिसलाई सुरक्षित स्थानमा सारिएको छ।

स्पेनको अवस्था पनि भयावह: ३ लाख ३० हजारभन्दा बढी विस्थापित

युरोपभर फैलिएको यो डढेलोको असर स्पेनमा पनि उत्तिकै भीषण छ। दुवै देश गरी हालसम्म ३ लाख ३० हजारभन्दा बढी मानिसहरू विस्थापित भइसकेका छन्।

स्पेनको पूर्वी तटीय सहर भ्यालेन्सिया (Valencia) नजिकै नयाँ डढेलो सल्किएपछि १५ हजारभन्दा बढी मानिस घर छाड्न बाध्य भएका छन्। म्याड्रिड र आभिला क्षेत्रमा डढेलो नियन्त्रण बाहिर गएपछि ९० हजारभन्दा बढी नागरिकलाई सुरक्षित स्थानमा सारिएको छ।

स्पेनका प्रधानमन्त्री पेड्रो सान्चेजले आभिला क्षेत्रको निरीक्षण गर्दै भन्नुभयो, “आगामी घण्टाहरू निकै कठिन र चुनौतीपूर्ण हुनेछन्। जलवायु आपत्काल सम्बोधन गर्न विश्वव्यापी र व्यापक सार्वजनिक प्रतिबद्धता आवश्यक भइसकेको छ।”

त्यस्तै स्पेनका राजा फेलिप छैटौँले डढेलोले देशको प्राकृतिक सम्पदामा ‘अकल्पनीय’ क्षति पुर्‍याएको बताउनुभएको छ। स्पेनकी मन्त्री सारा आगेसेनका अनुसार हालसम्म ७७ हजार हेक्टरभन्दा बढी क्षेत्रफल डढेलोबाट प्रभावित भइसकेको छ।

४० डिग्री सेल्सियससम्म पुग्ने मौसम पूर्वानुमान

मौसमविद्हरूले मङ्गलबारदेखि केही क्षेत्रमा तापक्रम बढेर ४० डिग्री सेल्सियस सम्म पुग्न सक्ने चेतावनी दिएका छन्। हावाको तीव्र गति र अत्यधिक तापक्रमका कारण आगामी केही दिन डढेलो नियन्त्रण टोलीका लागि थप जोखिमपूर्ण हुने अनुमान गरिएको छ।

फ्रान्सेली राष्ट्रपति म्याक्रोनले प्रभावित क्षेत्रको पुनरुत्थानका लागि सरकार पूर्ण रूपमा प्रतिबद्ध रहने र जस्तोसुकै परिस्थितिमा पनि नागरिकको साथमा उभिने प्रतिबद्धता जनाउनुभएको छ। परिस्थिति नियन्त्रणका लागि फ्रान्स र स्पेन दुवै देशले युरोपेली युनियनका अन्य सदस्य राष्ट्रहरूसँग आपत्कालीन सहायता र अग्निनियन्त्रक विमानहरूको माग गरेका छन्।