एजेन्सी 
कब्जा गरिएको पश्चिम बैङ्कको कुसरा गाउँमा इजरायली बस्ती विस्तारक (सेट्लर्स) लाई हटाउन भन्दै चलाइएको सैन्य अभियानका क्रममा कम्तीमा एक दर्जन प्यालेस्टिनी परिवारलाई आफ्नै घर-जग्गा छाड्न आदेश दिइएको छ।
स्थानीय अधिकारीहरूका अनुसार, आइतबारदेखि नै इजरायली सेट्लर्सहरूले सो क्षेत्रका तीन वटा प्यालेस्टिनी घरहरूलाई घेराबन्दीमा राख्दै बिजुली र पानीको आपूर्ति पूर्ण रूपमा ठप्प पारिदिएका थिए।
कुसराका मेयर अब्देल अजिम वादीले बिबिसीलाई दिएको जानकारीअनुसार इजरायली सेनाले उनको गाउँलाई ‘निषेधित सैन्य क्षेत्र’ (क्लोज्ड मिलिटरी जोन) घोषणा गरेको छ। साथै, खाली गराइएका केही प्यालेस्टिनी घरहरूलाई इजरायली फौजले आफ्नै ब्यारेकका रूपमा प्रयोग गरिरहेको छ। यता इजरायली सेनाले भने स्थानीय बासिन्दाको सुरक्षार्थ यस्तो कदम चालिएको दाबी गरेको छ।
इजरायली सरकारका एक प्रवक्ता डेभिड मेन्सरले सेट्लर्सहरूको यो कार्यलाई “निन्दनीय” र “अस्वीकार्य” भन्दै घटनाको छानबिन गरी दोषीलाई पक्राउ र कारबाही गरिने प्रतिबद्धता जनाएका छन्।
वर्तमान इजरायली सरकारको नेतृत्वमा बस्ती विस्तार तीव्र भएसँगै सेट्लर्सहरूको मनोबल बढेको र उनीहरूले प्यालेस्टिनीहरूलाई आफ्नै जमिनबाट विस्थापित गराउन हिंसात्मक गतिविधि बढाउँदै लगेका छन्। अन्तर्राष्ट्रिय कानुनअनुसार कब्जा गरिएका क्षेत्रमा बनाइएका सबै इजरायली बस्तीहरू गैर कानुनी मानिन्छन्।
कुसरामा घेराबन्दीमा परेका अबू रिदी र हस्सान परिवारका तीन घरमध्ये दुई घरका बासिन्दालाई बिहीबार घर खाली गर्न भनिएको थियो। ती बासिन्दाहरू हाल तेस्रो घरमा शरण लिएर बसेका छन्। गाउँका अन्य ११ भन्दा बढी घरपरिवारलाई पनि सेनाले हट्न आदेश दिएको छ।
बिहीबार बिहान २० भन्दा बढी सशस्त्र सैन्य टोली घरमा पसेर ढोका फुटाएको स्थानीय काहेर ओदेहले बताए। “हामी सुतिरहेका थियौँ, उनीहरूले ढोका तोडफोड गर्दै बाहिर निस्कन भने,” ओदेहले भने, “धेरै मानिसलाई यसै गरी घरबाट निकालियो।”
करिब १० घण्टापछि केही परिवारलाई फर्किन दिइए पनि उनीहरूका घरभित्रका सामान अस्तव्यस्त पारिएका थिए। एक स्थानीयले सेनाले फ्रिजको खानेकुरा फ्याँकिदिएको र १,५०० अमेरिकी डलर नगदसमेत चोरी गरेको आरोप लगाएका छन्। इजरायली रक्षा बल (आईडीएफ) ले यी आरोपहरूबारे कुनै प्रतिक्रिया दिएको छैन। आईडीएफका अनुसार उनीहरूले दुई वटा गैर कानुनी आउट पोस्ट हटाइसकेका छन् र थप अप्रिय घटना हुन नदिन स्थानीय नेतृत्वसँग समन्वय गरिरहेका छन्।
उक्त घेराबन्दीमा परेका एक प्यालेस्टिनी-अमेरिकी व्यवसायीका भाइ कुसाय अबू रिदीले घटनाबारे अमेरिकी दूतावासमा उजुरी गरेका थिए। यसपछि इजरायलका लागि अमेरिकी राजदूत माइक हकाबीले सेट्लर्सको यो कार्यलाई “भीषण आतङ्ककारी कृत्य” (होरिफिक एक्ट अफ टेरर) भन्दै कडा शब्दमा भर्त्सना गरेका छन्। उनले सामाजिक सञ्जाल एक्समा लेख्दै भनेका छन्, “परिवारलाई धम्क्याउने र सताउने उद्देश्यले गरिएको यो कृत्य घृणास्पद छ। यस्तो गुण्डागर्दीको कुनै बहाना हुन सक्दैन।”
संयुक्त राष्ट्रसङ्घको तथ्याङ्कअनुसार यसै वर्ष मात्र पश्चिम बैङ्कमा इजरायली सेना र सेट्लर्सको आक्रमणबाट १८ बालबालिकासहित ७६ जना प्यालेस्टिनीको मृत्यु भइसकेको छ। सोही अवधिमा प्यालेस्टिनीहरूको आक्रमणमा परी ३ जना इजरायलीको ज्यान गएको छ।
सन् २०२३ को जनवरीयता १२७ वटा प्यालेस्टिनी समुदायहरू पूर्ण वा आंशिक रूपमा विस्थापित भइसकेका छन्, जसबाट ६,३९० भन्दा बढी प्यालेस्टिनी प्रभावित भएका छन्। सन् २०२६ मा मात्रै सेट्लर्सको हिंसा, तोडफोड र जबरजस्ती उठीबासका कारण करिब ३,८०० प्यालेस्टिनीहरू विस्थापित भइसकेका छन्, जसमा आधा सङ्ख्या बालबालिकाको रहेको छ।
यद्यपि, संयुक्त राष्ट्रसङ्घको बैठकमा बोल्दै संयुक्त राष्ट्रसङ्घका लागि इजरायली राजदूत ड्यानी डानोनले इजरायली बस्तीहरू शान्तिको बाधक नभएको दाबी गरेका छन्। उनले आफ्नो देशको ऐतिहासिक, धार्मिक र कानुनी अधिकार रहेको भन्दै इजरायली बस्तीहरू अझ विस्तार हुने र इजरायल कतै नजाने स्पष्ट पारे।
श्रोत: आइएनएस-स्वतन्त्र समाचार
एजेन्सी का अन्य पोस्टहरु:
- अमेरिका–हुथी द्वन्द्व र ट्याङ्कर आक्रमणपछि कच्चा तेलको मूल्य प्रति ब्यारेल १०० डलर पुग्यो
- ठुला प्रविधि कम्पनीहरूलाई नियन्त्रण गर्न अदालतलाई धौ-धौ !
- तुकाराम मुण्डे: सामाजिक सञ्जालमा भाइरल बनेका भारतको महाराष्ट्रका खाद्य सुरक्षा अधिकारी
- प्रतीकात्मकताले भरिएको शान्ति वार्ता: रुस र युक्रेनबिचका आधारभूत मतभेद अझै कायम
- रुस-युक्रेन युद्ध: शान्ति वार्ताका लागि अमेरिकी टोलीले भेट्यो पुटिनलाई
- रसिया-युक्रेन युद्ध रोक्ने अमेरिकी प्रयास: ट्रम्पका दूत कुश्नर र विटकाफ मस्को र किभ भ्रमण गर्दै
- इरान युद्धमा सहयोग नगरेको भन्दै फकल्यान्ड टापु विवादमा बेलायतलाई साथ नदिने ट्रम्पको सङ्केत
- जर्मनीको लाइपजिगमा ‘विस्फोटक ड्रोन’ आक्रमणको प्रयासपछि रुसविरुद्ध कडा कदम चाल्न युरोपेली सङ्घ र नेटो प्रतिबद्ध
- अमेरिकाद्वारा इरानमा बमबारी, जवाफमा मध्यपूर्वका अमेरिकी सैन्य अखडामा क्षेप्यास्त्र प्रहार
- रसियाद्वारा तीव्र गतिको जेट-ड्रोन प्रहार: किभमा घण्टौँसम्म हवाई आक्रमणको चेतावनी, ३८ को मृत्यु
