नेपाली कांग्रेसका सभापति एवं पूर्वप्रधानमन्त्री शेरबहादुर देउवाले लोकतान्त्रिक मूल्य मान्यताप्रतिको अविचलित निष्ठा, जनतासँगको निरन्तर एवं अटुट सम्बन्धका कारणले नै कांग्रेसले जन्मकालदेखि नै राष्ट्रका लागि महत्वपूर्ण भूमिका निर्वाह गर्दै इतिहास निर्माण गरेको बताउनुभएको छ।
ललितपुरको गोदावरीस्थित सनराइज सभाहलमा फागुन ७ गतेदेखि सुरु भएको पार्टीको महासमिति बैठकको उद्घाटन समारोहलाई सम्बोधन गर्दै सभापति देउवाले लोकतन्त्रको स्थापना, पुनःस्थापनाका लागि भएका शृङ्खलाबद्ध क्रान्ति, सङ्घर्ष आन्दोलनदेखि दशवर्षे सशस्त्रद्वन्द्वलाई शान्तिमा रुपान्तरण गर्ने कार्यमा नेतृत्व प्रदान गरेको उल्लेख गर्नुभयो। “अन्तरिम संविधानदेखि वर्तमान संविधान निर्माण र संविधानको कार्यान्वयनको कार्यमा नेतृत्व प्रदान गरेका सबै काम कांग्रेसको महत्वपूर्ण भूमिकाका उदाहरण हुन्,” उहाँले भन्नुभयो।
नेपालको वर्तमान संविधान कांग्रेसको नेतृत्वमा निर्माण भएको उल्लेख गर्दै सभापति देउवाले संविधानले बहुलवादमा आधारित बहुदलीय प्रतिस्पर्धात्मक सङ्घीय लोकतान्त्रिक गणतन्त्रात्मक संसदीय शासन प्रणाली सुनिश्चित गरेको र यो शासकीय स्वरुप कांग्रेसको मान्यता अनुकूल रहेको बताउनुभयो। संविधानको रक्षा र सार्थक कार्यान्वयन फागुन ७ गतेका मुख्य ‘एजेन्डा’ भएको भन्दै उहाले कांग्रेस संविधानको सुरक्षा र कार्यान्वयनका पक्षमा दृढ रहेको र यो हाम्रो दायित्व पनि भएको स्पष्ट पार्नुभयो।
कांग्रेस आफ्नो इतिहासमा गर्व गर्दै वर्तमान र भविष्यमा जिम्मेवारीपूर्वक आफ्नो कर्तव्य निर्वाह गर्ने उल्लेख गर्दै सभापति देउवाले कांग्रेसका सैद्धान्तिक मान्यता, नीति कार्यक्रम र व्यवहार सबै लोकतान्त्रिक मान्यताबाट निर्देशित रहेको बताउनुभयो। पार्टीको १४औँ महाधिवेशनमा समय अभावका कारण नीतिगत विषयमा दस्तावेज प्रस्तुत गरी छलफल गर्न नपाएका कारण पार्टीका नीतिगत विषयमा छलफल गर्ने उद्देश्यले महाधिवेशनको निर्णयअनुसार महासमिति बैठक बोलाइएको उहाँले बताउनुभयो।
सभापति देउवाले बैठकमा विभिन्न दस्तावेज प्रस्तुत हुने र सबै सहभागीलाई ती विषयमा राम्ररी अध्ययन गरी आफ्ना विचार राख्न आग्रह गर्दै सहभागीका विचार, सुझाव र धारणा समेटेर नीतिगत दस्तावेज परिमार्जन गरी पारित गरिने उल्लेख गर्नुभयो। उहाँले भन्नुभयो, “कांग्रेसले देशमा लोकतन्त्र स्थापना, पुनःस्थापना र संरक्षणका लागि लामो सङ्घर्ष गरेको इतिहास सबैमा विदितै छ। हाम्रो इतिहास लोकतन्त्रका लागि जनताको हकअधिकार र स्वतन्त्रताका लागि त्याग तपस्या र बलिदानका गाथाले भरिपूर्ण छ। मुलुकमा जहिले पनि सङ्कट उत्पन्न भएका बेला कांग्रेसले आफ्नो नेतृत्वमा समाधान दिएको छ।”
लोकतान्त्रिक मूल्यमान्यतासँग कहिल्यै पनि सम्झौता नगर्ने कांग्रेसको दृढताका कारणले नै यो पार्टी राष्ट्रिय र अन्तर्राष्ट्रियस्तरमा एकमात्र लोकतान्त्रिक पार्टीका रुपमा पहिचान बनाउन सफल भएको सभापति देउवाको भनाइ थियो। “संविधानको रक्षाका लागि कांग्रेसकै पहलमा गठबन्धन बनेको हो। अहिले हामी गठबन्धनको अभ्यासमा छौँ। अहिलेको गठबन्धन सरकार गठनका लागि मात्र बनेको होइन। केही समय पहिले प्रतिनिधिसभालाई पहिल्यै विघटन गर्ने, मुलुकमा राजनीतिक अस्थिरता ल्याउने, संविधानलाई जोखिममा पार्ने र सङ्घीय लोकतान्त्रिक गणतन्त्रलाई कमजोर बनाउने गतिविधि भए,” सभापति देउवाले भन्नुभयो, “संविधानको रक्षाका लागि कांग्रेसकै पहल, प्रयत्न र अग्रसरतामा तत्काल नै गठबन्धन बनेको हो। गत निर्वाचन पूर्वको गठबन्धन र वर्तमान सरकार त्यसैको निरन्तरता हो। फागुन ७ गते पनि हामीले संविधानको रक्षालाई प्राथमिक एजेन्डाका रुपमा लिएका छौँ। महासमितिमा प्रस्तुत हुने सबै दस्तावेजले यस विषयलाई उल्लेख गरेको छ।”
कांग्रेसले संविधानमा मिश्रित निर्वाचन प्रणाली अपनाएको उल्लेख गर्दै सभापति देउवाले मिश्रित निर्वाचन प्रणालीका गुणदोष दुवै भए पनि निर्वाचन प्रणालीमा कुनै एकमात्र पार्टीको स्पष्ट बहुमत आउने सम्भावना कम हुने बताउनुभयो। आगामी दिनमा तीनै तहमा कांग्रेसले बहुमत ल्याउन सक्ने गरी पार्टी सङ्गठनलाई सुदृढ बनाउने काममा लाग्न उहाँले आग्रह गर्नुभयो।
“हाम्रो पार्टी देशको सबैभन्दा ठूलो पार्टी बनेको छ। देशका सबै गाउँबस्ती सबै वर्ग समुदायमा बलियो सङ्गठन छ। गत निर्वाचनमा सङ्घ, प्रदेश र स्थानीय तहमा सबैभन्दा बढी जननिर्वाचित प्रतिनिधि हाम्रा छन्,” सभापति देउवाले भन्नुभयो, “कांग्रेस नेपाली जनताको सबैभन्दा बढी आशा, भरोसा र विश्वास गरेको पार्टी हो। जनताको यो विश्वासलाई खण्डित हुन दिनु हुँदैन। कांग्रेसका साथीहरुले उच्च मनोबल र आत्मविश्वासको साथ राष्ट्रसेवामा समर्पित हुनुपर्दछ। हामीले शिर झुकाउनुपर्ने, मन सानो गर्नुपर्ने कुनै कारण छैन।”
विश्वभरि नै आर्थिक मन्दीको अवस्था रहेको र कोभिड–१९ को महामारी, अन्तर्राष्ट्रियस्तरमा केही मुलुकबीच युद्ध वा अशान्तिका कारण हाम्रो अर्थतन्त्रमा पनि प्रतिकूल प्रभाव परेको भन्दै सभापति देउवाले त्यसो हुँदाहुँदै पनि आर्थिक क्षेत्रमा सकारात्मक प्रभाव देखिन थालेको जानकारी दिनुभयो। आर्थिक प्रतिकूलताका कारण चाहेजस्तो काम गर्न नसकिएको उहाँको भनाइ थियो। लोकतन्त्रको विकल्प लोकतन्त्र नै हो भन्ने कुरामा आफूहरु दृढ रहेको उल्लेख गर्दै उहाँले लोकतान्त्रिक व्यवस्थाले नै सबै समस्यालाई सम्बोधन गरेर देशलाई विकासको बाटोमा लैजान सक्ने बताउनुभयो।
सभापति देउवाले भन्नुभयो, “कांग्रेसले सदैव संवाद, सहमति र सहकार्यको नीति अवलम्बन गरेको छ। देशमा विद्यमान राजनीतिक दलमा प्रतिस्पर्धा हुनु स्वाभाविक हो तर कतिपय हाम्रा साझा विषय छन्। देशको सार्वभौमिकता, अखण्डता, लोकतन्त्र, विकास, परराष्ट्र नीति र शान्ति प्रक्रियाका बाँकी काम सङ्क्रमणकालीन न्यायजस्ता विषयमा हाम्रा समान धारणा हुनुपर्दछ।” यसका निम्ति संवाद, सहमति र सहकार्यको संस्कारलाई प्रोत्साहित गर्नुपर्ने र पार्टीभित्र वा सबै पार्टी बीचमा पनि निरन्तर संवाद र सहमतिको अभ्यास गर्नुपर्ने सभापति देउवाको भनाइ थियो।
उद्घाटन समारोहलाई सम्बोधन गर्दै पार्टी उपसभापति धनराज गुरुङले केही कमीकमजोरी भए महासमितिले सच्याएर अघि बढ्नुपर्ने बताउनुभयो। पार्टीको साङ्गठनिक संरचना सुधार गर्ने अधिकार महासमितिले राख्ने उल्लेख गर्दै उहाँले भन्नुभयो, “भद्दा संरचनालाई हटाएर चुस्त बनाउनु पर्दछ। मुसाले धेरै बच्चा जन्माउँछ तर हात्तीले एउटा जन्माउँछ र पनि त्यही एउटा शक्तिशाली हुन्छ।” त्यसैगरी उहाँले आर्थिक, सामाजिक, अन्तर्राष्ट्रियलगायत नीतिहरु बैठकमा प्रस्तुत हुने भन्दै आर्थिक नीति प्रजातान्त्रिक समाजवाद हुनुपर्ने र झुपडी र महलमा बस्नेलाई जोड्ने किसिमको हुनुपर्ने बताउनुभयो।
सहमहामन्त्री महालक्ष्मी उपाध्याय डीनाले पार्टीको केन्द्रीय समितिका तर्फबाट महासमिति सदस्यलाई स्वागत गर्दै पार्टीमा न्याय नपाएको आवाज बढेको भन्दै न्याय पाउने र न्याय दिने नीति अवलम्बन गराउनका लागि महासमितिले ठोस निर्णय गरेर जानुपर्ने बताउनुभयो। उहाँले भन्नुभयो, “हामीले विभिन्न प्रस्ताव ल्याएका छौँ। यी प्रस्तावमा गहन छलफल र बहस गरी जिम्मेवारीका साथ पारित गर्नुपर्ने हाम्रो दायित्व हो।”
महासमिति बैठक आयोजक जिल्लाका तर्फबाट ललितपुर जिल्लाका पार्टी सभापति जितेन्द्रकुमार श्रेष्ठले महासमिति सदस्यलाई स्वागत गर्दै बैठकबाट पार्टीलाई एकताबद्ध भएको सन्देश प्रवाह गर्नुपर्ने बताउनुभयो। पार्टीको महासमिति बैठक उद्घाटन समारोहको समापन मन्तव्य बागमती प्रदेश सभापति इन्द्रबहादुर बानियाँले दिनुभएको थियो। यही फागुन १० गतेसम्म चल्ने महासमिति बैठकमा फागुन ८ गतेदेखि विभिन्न समूहमा रहेर पार्टीका विभिन्न प्रस्तावमाथि छलफल थालिएको पार्टीको सूचना, सञ्चार तथा प्रचार विभागका प्रमुख मीन विश्वकर्माले जानकारी दिनुभयो।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- मानव बेचबिखनको शैली फेरियो : ‘कहाँ जाने बहिनी भनेर सोध्यो भने दार्जिलिङ घुम्न जान हिँडेको भन्छन् ’
- केन्याको विद्यालयमा आगलागी हुँदा १७ बालबालिकाको मृत्यु
- आशा जगाउँदैछ कृषि औजार कारखाना
- हेर्ने कथाका पात्र ‘प्रकाश तामाङ’ को घर निर्माण सुरु
- प्रतिद्वन्द्वी ट्रम्पसँग हुने बहसको तयारीमा ह्यारिस
- दलालको फन्दामा परेर बेचिएका चेलीहरु जो उद्धारपछि बन्दैछन् आत्मनिर्भर
- यातायात कार्यालय झापाद्वारा ९३ करोड राजस्व सङ्कलन
- इराकको कुर्द क्षेत्रमा ड्रोन आक्रमण, तीन जनाको मृत्यु
- मेलम्ची बाढिपीडितले पाएका छैनन् अनुदानबापतको रकम
- मासिँदै कालीगण्डकीको जलसभ्यता
![](https://ins.news/wp-content/uploads/2024/02/KB-KTM-IMG_9148.jpg)