स्वतन्त्र समाचार सेवा / INS 
युक्रेनको राजधानी किभ नजिकै रहेको सैन्य हतियार तथा गोलाबारुद भण्डार (डिपो) मा रुसले गरेको ड्रोन आक्रमणमा परी कम्तीमा ३७ जनाको मृत्यु भएको छ भने करिब ४०० जनालाई सुरक्षित स्थानमा सारिएको छ। आवासीय क्षेत्र नजिकै रहेको उक्त हतियार डिपोमा शुक्रबार अबेर आक्रमण भएपछि गोलाबारी, माइन र ड्रोनहरू विस्फोट भएका थिए। विस्फोटको धक्काले वृद्ध तथा अपाङ्गता भएका व्यक्तिहरूको स्याहार केन्द्रसहित आसपासका करिब १३० भन्दा बढी घरहरूमा क्षति पुर्याएको छ।
युक्रेनी राष्ट्रपति भोलोडिमिर जेलेन्स्कीले आवासीय क्षेत्र नजिकै विस्फोटक पदार्थ राख्नु “पूर्ण रूपमा अस्वीकार्य” भएको बताउँदै घटनाको अनुसन्धान सुरु गरिएको जानकारी दिएका छन्। मानिसहरू बसोबास गर्ने बस्ती नजिकै विस्फोटक पदार्थ भण्डारण गर्ने अधिकारीहरूको “गम्भीर लापरबाही” माथि फौजदारी मुद्दा दर्ता गरी अनुसन्धान अघि बढाइएको छ।
आवासीय क्षेत्र नजिक हतियार राख्दा जनआक्रोश
बुचा जिल्लाको मिला गाउँमा भएको यस विस्फोटमा परेर चार बालबालिकासहित ४२ जना घाइते भएका छन्। रुसी रक्षा मन्त्रालयले युक्रेनको लामो दूरीका ड्रोनका पछाडिका पाटपुर्जा तथा बूस्टरहरू भण्डारण गरिएको डिपोलाई लक्षित गरी आक्रमण गरेको दाबी गरेको छ।
घटनापछि स्थानीयवासी आक्रोशित बनेका छन्। किभ नजिकै हतियार डिपोमा विस्फोट भएको यो पछिल्ला केही महिनाभित्रको दोस्रो घटना हो। यसअघि गत जुलाईमा भिस्नेभेस्थित हतियार भण्डारमा भएको विस्फोटमा परी नौ जनाको मृत्यु हुनुका साथै २८० भन्दा बढी घरहरूमा क्षति पुगेको थियो।
युक्रेनका प्रधानमन्त्री सर्गी कोरेत्स्कीले अघिल्लो घटनाबाट पाठ नसिक्नु गम्भीर गल्ती भएको बताएका छन्। उनले भने, “पूर्ण मात्रामा युद्ध सुरु भएको पाँचौँ वर्षमा पनि उही गल्ती दोहोर्याउनु आपराधिक लापरबाही हो। यस्ता घटना दोहोरिन नदिन दोषी जो-कसैलाई कडा कारबाही गरिनुपर्छ।”
देशभर रुसी आक्रमण जारी
शुक्रबार र शनिबार भएका अन्य पृथक आक्रमणहरूमा परि बोरिस्पिल जिल्लामा एक १४ वर्षीय किशोर र ओबोलन्स्कीमा एक दुई वर्षीय बालकको मृत्यु भएको छ। शनिबार बिहान किभमा भएका नयाँ आक्रमणहरूमा १८ वर्षीय किशोरीसहित पाँच जना घाइते भएका छन्। युक्रेनी सेनाका अनुसार पछिल्लो २४ घण्टामा ओडेसा, निप्रोपेत्रोभस्क, सुमी र जापोरिजियालगायतका क्षेत्रमा रुसले आक्रमण गरेको छ भने युक्रेनले २३३ वटा रुसी ड्रोन खसालेको दाबी गरेको छ।
रुसी क्षेत्र र अनलाइन रिटेलरमा युक्रेनको प्रहार
यसैबिच, युक्रेनले पनि रुसका आर्थिक तथा सैन्य पूर्वाधारहरूलाई लक्षित गरी हवाई आक्रमण तीव्र पारेको छ। रुसका बेलगोरोड र रोस्तोभ क्षेत्रमा भएका युक्रेनी आक्रमणमा दुई जनाको मृत्यु हुनुका साथै २५ जना घाइते भएका छन्।
युक्रेनले रुसको ठुलो अनलाइन रिटेलर ‘वाइल्डबेडिज’ र ‘ओजोन’ का लजिस्टिक सेन्टरहरूलाई लक्षित गरी ड्रोन प्रहार गरेको छ। युक्रेनले ती व्यावसायिक प्रतिष्ठानहरूले रुसी सेनालाई आवश्यक सामग्री र पाटपुर्जा आपूर्ति गर्ने भएकाले आक्रमण गरिएको जनाएको छ। आक्रमणका कारण ओजोनले आफ्ना केही लजिस्टिक केन्द्रहरूको काम रोकेर कर्मचारीहरूलाई सुरक्षित स्थानमा सारेको छ।
श्रोत: आइएनएस-स्वतन्त्र समाचार
स्वतन्त्र समाचार सेवा / INS का अन्य पोस्टहरु:
- वीपी राजमार्ग पुनःनिर्माणले तीव्रता: जाइकाले सुरु गर्यो बर्खेखोला–पिप्ले खण्डको काम
- काग तिहार पर्व आज: यमराजका दूत कागको पूजा
- एनपीएल आज: अपराजित लुम्बिनी लायन्स र काठमान्डु गोर्खाजबिच खेल
- आजको लागि विदेशी मुद्राको विनिमय दर
- आजको मौसम: पहाडी तथा हिमाली भू-भागमा आंशिक बदली, बाँकी ठाउँमा मौसम सामान्यतया सफा रहने
- बाढीले मध्यकालीगण्डकी जलविद्युत् आयोजनामा ठूलो क्षति, तिहारलगत्तै पुनर्निर्माण सुरु गरिने
- हिन्दु र बौद्ध धर्मावलम्बीको साझा तीर्थस्थल पार्वतीकुण्ड
- एनपीएल २०२६: लुम्बिनी र काठमाडौँको जित, आज सुदूरपश्चिम र कर्णाली भिड्दै
- आजका लागि विदेशी मुद्राको विनिमय दर
- आजको मौसम पूर्वानुमान: हिमाली भू-भागका एक-दुई स्थानमा हल्का वर्षा
