सीमा सुरक्षामा ‘संयुक्त कदम’ चाल्न युरोपेली आयोगकी अध्यक्षको आह्वान

स्पेनको क्षेत्र सेउटामा हजारौँ आप्रवासीहरूको अनियन्त्रित प्रवेशपछि युरोपेली आयोगकी अध्यक्ष उर्सुला भोन डे लेयनले सीमा सुरक्षा सुदृढ बनाउन युरोपेली सङ्घ बिच संयुक्त कदमको आवश्यकतामा जोड दिएकी छन्।

मोरक्कोबाट सेउटातर्फ भएको आप्रवासीहरूको प्रवेशपछि उत्पन्न सङ्कटबारे छलफल गर्न युरोपेली सङ्घका आन्तरिक मन्त्रीहरूले मंगलबार आपतकालीन भिडियो कन्फरेन्स आयोजना गर्दै छन्।

स्पेनिस अधिकारीहरूका अनुसार हालसम्म करिब ६९,५०० आप्रवासीहरू मोरक्को फर्किसकेका छन्, जुन सुरुवाती अनुमान (५०,०००) भन्दा बढी हो। यस सङ्कटका क्रममा स्पेनतर्फ ७२ जना र मोरक्कोतर्फ ११ जना गरी कुल ८३ जनाको ज्यान गएको आधिकारिक पुष्टि भएको छ।

सेउटा घटनाका कारण युरोपेली सङ्घका २७ सदस्य राष्ट्रहरूबिचको कूटनीतिक सम्बन्धमा ठुलो तनाव उत्पन्न भएको छ। यसै क्रममा इटालीले स्पेनसँगको ‘सेन्गेन सम्झौता’ अस्थायी रूपमा निलम्बन गरेको छ भने उक्त कदमलाई फिनल्यान्ड र डेनमार्कले समेत समर्थन गरेका छन्।

अर्कोतर्फ, चेक प्रधानमन्त्री आन्द्रेज बाबिसले त स्पेनको सेन्गेन सदस्यता नै अस्थायी रूपमा रद्द गर्न आग्रह गरेका छन्। युरोपका २९ देश र ४५ करोडभन्दा बढी नागरिकहरूलाई बिना भिसा तथा बिना सीमा जाँच सहज आवतजावतको सुविधा दिने यो विशेष सम्झौतामाथि परेको असरप्रति स्पेनका प्रधानमन्त्री पेद्रो साञ्चेजले गम्भीर चिन्ता व्यक्त गरेका छन्। सेउटा क्षेत्र सेन्गेन सीमाभित्र नपर्ने स्पष्ट पार्दै उनले अधिकांश देशले भ्रातृत्व र सहयोग देखाए पनि केही युरोपेली सरकारहरूले पूर्वाग्रह, असत्य सूचना र राजनीतिक स्वार्थका आधारमा स्पेनमाथि प्रहार गरिरहेको आरोप लगाएका छन्।

सेन्गेन सम्झौता युरोपका २९ देश र ४५ करोडभन्दा बढी नागरिकहरूबिच बिना भिसा र बिना सीमा जाँच आवतजावत गर्न पाइने एक विशेष युरोपेली सम्झौता हो।

स्पेनिस प्रधानमन्त्री साञ्चेजलाई पठाइएको पत्रमा युरोपेली आयोगकी अध्यक्ष भोन डे लेयनले स्पेन सरकारले सङ्कट व्यवस्थापनमा देखाएको तदारुकताको प्रशंसा गरेकी छन्। तर, उनले संवेदनशील क्षेत्रहरूमा सीमा सुरक्षा थप कडा पार्नुपर्ने र भौतिक बारहरूको प्रयोग गर्न सकिने उल्लेख गरेकी छन्।

युरोपेली आयोगकी अध्यक्ष भोन डे लेयनका अनुसार मंगलबार बस्ने आपतकालीन बैठकमा सेउटा घटनाबाट पाठ सिक्दै पाँच प्रमुख क्षेत्रहरूमा विशेष ध्यान केन्द्रित गरिनेछ। यसअन्तर्गत साझेदार राष्ट्रहरूसँगको सहकार्यमार्फत अनधिकृत बसाइँ सराइ रोक्ने, बाह्य सीमा सुरक्षालाई थप सुदृढ बनाउने र जोखिम व्यवस्थापनका लागि पूर्व-सूचना प्रणाली लागू गर्ने रणनीति बनाइनेछ। साथै, मानव तस्करीका सञ्जालहरूलाई पूर्ण रूपमा ध्वस्त पार्दै गैर कानुनी रूपमा भित्रिएका आप्रवासीहरूलाई स्वदेश फिर्ता पठाउने प्रक्रियालाई अझ सशक्त र प्रभावकारी बनाउने विषयलाई प्रमुख प्राथमिकतामा राखिनेछ।

स्पेनका प्रधानमन्त्री साञ्चेजले सर्वोच्च अदालतको हालैको फैसला (जसले समुद्री मार्गबाट आउनेहरूलाई तुरुन्तै देश निकाला गर्ने सरकारी अधिकारलाई सीमित गरेको थियो) को फाइदा मानव तस्करहरूले उठाएको आरोप लगाएका छन्।

यसैबिच स्पेनका गृहमन्त्री फर्नान्डो ग्रान्दे-मार्लास्काका अनुसार सेउटाको स्थिति अहिले लगभग सामान्य भइसकेको छ। पानीको बाटो हुँदै हुने गैर कानुनी प्रवेश रोक्न स्पेन सरकारले हाल पानीमा तैरिने विशेष प्रकारको बार निर्माणको काम गरिरहेको जनाइएको छ।