धरहरा चैत मसान्तसम्म निर्माण सम्पन्न गर्ने लक्ष्य, नयाँ साल देखि सर्वसाधरणका लागि खुला गर्ने तयारी

तत्कालीन प्रधानमन्त्री केपी शर्मा ओलीले २०७८ सालमै हतार हतार उद्घाटन गरेको धरहरा निर्माण अझै पनि सकिएको भने छैन । निर्माणको काम ९० प्रतिशत मात्रै भएको छ । जबकि ०७५ असोज १४ मा बनाउन सुरु गरिएको धरहराको निर्माण सकिने म्याद पाँच पटकसम्म थपिएको छ ।

सुरुमा ठेक्का सम्झौता अनुसार सकिनुपर्ने अवधि २०७७ असोज १४ थियो । तर आगामी चैत मसान्तसम्ममा पनि काम नसकिने हो कि भन्नेमा अझै अन्योलमा छ ।

६/६ महिनाको दरले म्याद थप गर्दै आए पनि यसको निर्माण कार्यमा स्थानीयको रोक तोक, निर्माण कम्पनीको कमजोरी तथा भूकम्पका कारण काम रोकिएको जस्ता अनेक बनिरहेका छन् । यस धरहरा निर्माणको ठेक्का जीआईईटीसी–रमण जेभीले पाएको हो । धरहरा  निर्माणका लागी ३ अर्ब ४८ करोड १६ लाख रुपैयाँ ठेक्का मा उक्त कम्पनीलाई दिइएको हो । अहिलेसम्म २ अर्ब भन्दा बढी रकम भुक्तानी भइसकेको छ ।

२०७८ वैशाख ११ मै उद्घाटन भइसकेको भएता पनि धरहरा सर्वसाधारणका लागि भने अझै पनि खुल्ला भएको छैन । निकै फुर्ती र तामझामका साथ तत्कालीन प्रधानमन्त्री केपी ओलीले उद्घाटन गर्दा समग्रमा आयोजनाको काम ४० देखि ४५ प्रतिशत मात्रै सम्पन्न भएको थियो ।

काम ढिला हुनुको मुख्य कारण सुरुमा कोभिडको आतङ्क भएको ठेकेदार कम्पनीको दाबी छ । काम पनि नगरेको होइनौँ, सुरुमा ठेक्का निकाल्दा पाँच रोपनी जग्गाभित्र निर्माणको काम उल्लेख थियो । पछि काम गर्दै जाँदा ४२ रोपनी पुराइदिए । ठाउँ थपिएपछि त्यसकालागि नक्सा, सामान, दक्ष जनशक्तिको व्यवस्थापन त्यस्तै साना ठुला बाधाहरूले गर्दा पनि निर्माण ढिला हुन पुगेको आयोजनाका एक इन्जिनियरले बताउनुभयो ।

अहिले निर्माण भएको धरहरा दुई तल्ला अन्डरग्राउन्डसहित २२ तल्लाको छ । जसमा तीन तले छुट्टै अन्डरग्राउन्ड पार्किङको व्यवस्था छ । पार्किङमा चार सय गाडी र सात सय मोटरसाइकल पार्किङ गर्न सकिन्छ । पहिले ९ तले धरहरा अहिले २२ तले बनेको छ । जसको उचाइ भूमिगत तलासहित ९२ मिटर रहेको एक इन्जिनियरले जानकारी दिए । 

लगभग ९० प्रतिशत काम सम्पन्न भयो । बाँकी रहेको काम त्यही  फिनिसिङ, म्युजियममा मार्बल, फलसिलीङ, बिजुलीको काम मात्रै बाँकी छ । चैतसम्ममा केही बाधा अर्चन नआए सक्ने लक्ष्य राखेको एक इन्जिनियरले बताउनुभयो ।

कहिले टाइममा निर्णय नदिने, कहिले नक्सा थप्नुपर्ने, कहिले सामनहरुको समस्याका कारण निर्माण लम्बिएको हो । ठुला सामानहरू चीन र भारतबाट ल्याउनुपर्ने हुँदा भन्सार बोर्डर गर्दा केही सामान ल्याउनै ३८ दिन जति लाग्ने हुँदा पनि काम मा  ढिला भएको एक इन्जिनियरले जानकारी दिए ।

धरहरा अवलोकन गर्न नपाउँदा सर्वसाधारणहरू भने निराश छन् । धरहरा छेउमै रहेको पुलमा बसेर फोटो खिचेरै भए पनि चित्त बझाइरहेका एक युवक भन्छन् ‘अब नयाँ वर्षमा धरहरा चढेर नयाँ सालको सुरुवात गर्न मन छ । निर्माण गर्न ढिला भएता पनि पक्की र दीर्घकालीन बने राम्रो हुने उहाँले बताउनुभयो ।

धरहरा बन्नलाई पाँच वर्ष भन्दा पनि बढी समय लागिसक्यो । नेपालीहरूले निकै प्रतीक्षा गरिसक्यौ तर पनि निर्माण सम्पन्न होला र अवलोकन गर्न पाइएला भनेर यतिका वर्ष कुर्नु परेको एक युवक बताउँछन् । आफूलाई धरहरा चढ्न र धरहराको टुप्पोमा पुगेर भिडियो र फोटो खिच्न हतार भएको एक युवती बताउँछिन् । तर नयाँ साल देखि धरहरा चढ्न पाउने कुरामा भने उहाँ खुसी हुनुहुन्छ ।