प्रयोगकर्ताका तस्बिरमा अनधिकृत पहुँच पुर्‍याएको आरोपमा इटालीद्वारा मेटालाई ८० करोड ५० लाख युरो जरिवाना

६० दिनभित्र उक्त फिचर स्वतः निष्क्रिय पार्न र छुट्टै अनुमति लिन नियामक निकायको कडा निर्देशन

इटालीको डेटा सुरक्षा नियामक निकाय (ग्यारान्ते) ले प्रयोगकर्ताको स्पष्ट अनुमतिबिना एन्ड्रोइड स्मार्टफोनमा रहेका व्यक्तिगत तस्बिर र भिडियोहरूमा पहुँच पुर्‍याएको भन्दै सामाजिक सञ्जाल कम्पनी मेटालाई ८० करोड ५० लाख युरो जरिवाना तोकेको छ। फेसबुक एपको एक विशेष फिचरमार्फत करिब २ करोड इटालियन एन्ड्रोइड प्रयोगकर्ताको निजी ग्यालरीमा पहुँच राखेको ठहर गर्दै नियामकले यो ऐतिहासिक कारबाही गरेको हो।

नियामक निकायका अनुसार सन् २०२३ देखि फेसबुकको एन्ड्रोइड एपमा उपलब्ध ‘गेट सजेसन्स फ्रम योर ग्यालरी ह्वेन यु ब्राउज फेसबुक’ (फेसबुक चलाउँदा ग्यालरीबाट सुझाव प्राप्त गर्ने) नामक फिचरमाथि प्रश्न उठेको हो। यो फिचरले प्रयोगकर्ताको फोन ग्यालरीमा रहेका तस्बिर तथा भिडियोहरू स्क्यान गरी पोस्ट गर्नका लागि सुझाव दिने गर्दछ। बोलजानोस्थित उपभोक्ता तथा प्रयोगकर्ता संरक्षण केन्द्रको उजुरीपछि सन् २०२५ को जुलाईमा नियामकले यस विषयमा प्राविधिक अनुसन्धान सुरु गरेको थियो।

अनुसन्धानका क्रममा फेसबुकले एपका लागि एकमुष्ट सामान्य अनुमति (ब्रोड पर्मिसन) मागेर प्रयोगकर्ताको फोन ग्यालरीमा स्थायी पहुँच बनाएको पाइएको छ। नियामकले उक्त अनुमति लिने क्रममा ग्यालरीका तस्बिरहरू विश्लेषण गरी पोस्टको सुझाव दिनसमेत प्रयोग गरिनेछ भन्नेबारे प्रयोगकर्तालाई स्पष्ट जानकारी नदिइएको ठहर गरेको छ। इटालीको गोपनीयता संहिताको धारा १२२ अनुसार व्यक्तिको निजी क्षेत्र मानिने स्मार्टफोनमा भण्डारण गरिएका विवरणहरूमा पहुँच पुर्‍याउन सूचित र छुट्टै सहमति अनिवार्य हुन्छ।

इटालीको कुनै पनि निकायले प्रविधि कम्पनीमाथि लगाएको यो हालसम्मकै सबैभन्दा ठुलो जरिवानामध्ये एक हो, जुन मेटाको विश्वव्यापी वार्षिक आम्दानीको करिब ०.४७ प्रतिशत बराबर हुन आउँछ। नियामकले मेटालाई आगामी ६० दिनभित्र उक्त फिचरलाई पूर्वनिर्धारित (डिफल्ट) रूपमा बन्द गर्न र सो फिचर प्रयोग गर्न चाहने प्रयोगकर्तासँग छुट्टै स्पष्ट अनुमति लिन आदेश दिएको छ। साथै, निर्णय कार्यान्वयनको प्रगति विवरण ३० दिन र ९० दिनभित्र बुझाउनसमेत निर्देशन दिइएको छ।

जरिवानाको रकम निर्धारण गर्दा प्रभावित प्रयोगकर्ताको विशाल सङ्ख्या, एप अपडेट नगरेका तथा पहिले नै अनुमति दिइसकेका प्रयोगकर्तामा अझै पनि यो समस्या कायम रहेको अवस्था, सन् २०१९ मा मेटाविरुद्ध भएको यस्तै कारबाही र अनुसन्धानका क्रममा मेटाको असहयोगी व्यवहारलाई मुख्य आधार मानिएको नियामकले जनाएको छ। यसबाहेक, सन् २०२६ मा सुरु गरिएको क्लाउडमार्फत ग्यालरीका सामग्री प्रशोधन गर्ने अर्को नयाँ फिचरमाथि पनि छुट्टै अनुसन्धान गर्न सकिने अधिकार नियामकले सुरक्षित राखेको छ।

यता, मेटाले भने इटालियन नियामकको निर्णयप्रति कडा असहमति जनाउँदै यसविरुद्ध अपिल गर्ने घोषणा गरेको छ। मेटाका प्रवक्ताले बिबिसीसँग कुरा गर्दै नियामकको तथ्यगत मूल्याङ्कन, कानुनको व्याख्या र तोकिएको जरिवानाको आकार अत्यन्तै असमानुपातिक रहेको दाबी गरेका छन्।

मेटाको स्पष्टोक्ति छ, “यो प्रयोगकर्तालाई फेसबुकमा तस्बिर र भिडियो पोस्ट गर्न सहज बनाउने एक साधारण फिचर मात्र हो। यो फिचर सञ्चालन हुनुअघि प्रयोगकर्ताले आफ्नो डिभाइसमा अनिवार्य अनुमति दिनुपर्छ र उनीहरूले चाहेका बेला सेटिङमा गएर उक्त अनुमति फिर्ता लिन सक्छन्।”

इन्स्टाग्राम र ह्वाट्सएपको समेत स्वामित्व रहेको मेटा पछिल्लो समय प्रयोगकर्ताको गोपनीयता र डेटा सुरक्षाको विषयलाई लिएर विश्वभर कडा कानुनी निगरानीमा परेको छ। केही साताअघि मात्र अमेरिकाको न्यु मेक्सिकोस्थित एक अदालतले फेसबुक प्रयोगकर्ताको डेटा व्यवस्थापनबारे वर्षौँसम्म जनतालाई झूट बोलेको ठहर गर्दै मेटालाई २५ अर्ब अमेरिकी डलर (करिब १८.६ अर्ब पाउन्ड) क्षतिपूर्ति तिर्न आदेश दिएको थियो।

श्रोत: आइएनएस-स्वतन्त्र समाचार

एजेन्सी का अन्य पोस्टहरु:
Independent News Service (INS)

सम्पर्क
आदर्श मार्ग, थापाथली, काठमाडौ
इमेल : freedomnews2022@gmail.com

सोसल मिडिया

© 2021 Freedom News Service Pvt Ltd. All rights reserved

Copy link