चन्द्रकान्त खनाल/रूपन्देही 
रुपन्देही जिल्ला शिक्षा समन्वय इकाइको सरकारी गाडी शनिबार दुरूपयोग गरेको भेटिएको छ। शिक्षा समन्वय इकाइका प्रमुख दिपेन्द्र ढकालले सार्वजनिक बिदाकाे दिन सरकारी गाडीको दुरुपयोग गर्नुभएको हो।
ढकालले शनिबार पनि जिल्ला प्रशासन कार्यालयको अनुमतिबिना सरकारी गाडी लिएर घुमफिर र खानपानमा हिँडेको भेटिएको छ। शनिबार बिहान बुटवलबाट केवलकार चढेर वसन्तपुर घुमेका ढकाल दिउँसो पाल्पाको नुवाकोटमा पुगेर दारु पार्टीमा सहभागी हुनुभएको थियो। घुमफिरमा ढकालले बा२झ १०१० नम्बरको सरकारी गाडी प्रयोग गर्नुभएको थियो।
आफ्ना केही साथीहरु तथा निजी विद्यालयका सञ्चालकलाई बोकेर नुवाकोट पुगेका उहाँले स्कुलको अनुगमनमा निस्किएको र खाजा खानका लागि नुवाकोट पुगेको प्रतिक्रिया दिनुभयो।
शनिबारको दिन बुटवलका केही निजी विद्यालय निरीक्षण गरेको बताउने ढकाललाई यसअघि पनि पटक–पटक सरकारी गाडीको दुरुपयोग गरेको आरोप लाग्ने गरेको छ। रुपन्देहीका प्रमुख जिल्ला अधिकारी भरतमणि पाण्डेले कुनै पनि सरकारी गाडी शनिबार वा सार्वजनिक बिदाको दिन प्रयोग गर्नुपरेमा अनुमति जारी गर्नुपर्ने हुन्छ। तर साउन ६ गते शनिबारका लागि कुनै पनि पास वा अनुमति जारी नगरिएको स्पष्ट पार्नुभयो।
ढकाल अघिल्लो शनिबार बिनापास नै बुटवल सुक्खानगरमा निजी कन्सल्टेन्सी उद्घाटन कार्यक्रममा सरकारी गाडीसहित पुग्नुभएको थियो। रुपन्देही जिल्ला शिक्षा समन्वय इकाइका प्रमुख ढकाल सवार सरकारी गाडीलाई ट्राफिक प्रहरीले नियन्त्रणमा लिएको छ।
विद्यालय अनुगमनको बहानामा प्रशासनको पासबिना गाडीमा सवार भएको अवस्थामा ट्राफिक प्रहरीले गाडी नियन्त्रणमा लिइएको राजमार्ग सुरक्षा तथा ट्राफिक व्यवस्थापन कार्यालय बुटवलका प्रहरी नायव उपरीक्षक होमबहादुर थापाले बताउनुभयो। उहाँले नियन्त्रणमा लिएको गाडी जिल्ला प्रशासनमा बुझाइदिने र सरकारी दुरुपयोगको अभियोगमा प्रशासनबाटै कारबाही हुने जानकारी दिनुभयो।
श्रोत: आइएनएस-स्वतन्त्र समाचार
चन्द्रकान्त खनाल/रूपन्देही का अन्य पोस्टहरु:
- तिलोत्तमामा ‘एक्स्ट्राटेक लिजेन्ड कप’ हुने
- दूध उत्पादनको क्षेत्रमा लुम्बिनी प्रदेशको २० प्रतिशत योगदान
- ६ अर्ब १८ करोडको लगानीमा लुम्बिनी प्रादेशिक अस्पताल बन्ने
- लुम्बिनीमा सबैभन्दा बढी मातृ मृत्युदर
- ‘भ्यालेन्टाइन डे’ सप्ताहमा लुम्बिनी केबलकारमा ५० प्रतिशत छुट
- गुल्मीको धुर्कोट गाउँपालिका जिल्लाकै उत्कृष्ट
- धार्मिक तथा पर्यटकीय तीर्थस्थल ‘गौमुखी’ जहाँ भक्तजन जोडी जुराउन पुग्दछन्
- लुम्बिनीमा १६ प्रतिशत बालबालिकामा ख्याउटेपना
- लुम्बिनी सरकार गठनयता अख्तियारमा तीन सय २२ वटा उजुरी
- लुम्बिनीमा पर्यटक बढे पनि कोरोना अघिको लयमा फर्किनै सकस
