आशुतोष अधिकारी 
आशुतोष अधिकारी
नेदरल्याण्डस्लाई ८१ रनले पराजित गर्दै पाकिस्तानले विश्वकप २०२३ को सुखद सुरुवात गरेको छ । तर डच टोलीविरुद्ध प्राप्त जीतमा पाकिस्तानको प्रदर्शन भने औसत भन्दा माथि रहन सकेन । खेलमा टस हारेर पहिले ब्याटिङ गरेको पाकिस्तानले ४९ ओभरमा अलआउट हुनु अघि २८६ रनको सम्मानजनक योगफल तयार गर्यो । जवाफमा नेदरल्याण्डस् मात्र ४१ ओभरमा २०५ रनमा अलआउट हुन पुग्यो । नेदरल्याण्डस्का बास डे लेडेले बलिङ र ब्याटिङ दुवैमा शानदार प्रदर्शन गरे पनि पाकिस्तानविरुद्ध विजय हात पार्न भने उनको टोली असफल रह्यो ।
संक्षिप्त स्कोर बोर्ड :
| स्थान : राजीव गान्धी इन्टरनेशनल स्टेडियम, उप्पल, हैदरावाद (म्याच नं.२)
टस : नेदरल्याण्डस्, बलिङ गर्ने निर्णय |
|
| पाकिस्तान : २८६ (४९.० ओभर)
साउद शकिल– ६८ (५२) मोहम्मद रिजवान– ६८ (७५) मोहम्मद नवाज– ३९ (४३) बास डे लेडे– ९–०–६२–४ कोलिन एकरम्यान– ८–१–३९–२ |
नेदरल्याण्डस् : २०५ (४१.० ओभर)
बास डे लेडे– ६७ (६८) विक्रम जीत सिंह– ५२ (६७) लोगान भान विक– २८ (२८) ह्यारिस रउफ– ९–०–४३–३ हसन अली– ७–१–३३–२ |
| पाकिस्तान ८१ रनले विजयी |
पाकिस्तानको औसत प्रदर्शन
२०११ पछि पहिलो पटक विश्वकपमा स्थान बनाउन सफल एशोसिएटस् टोली नेदरल्याण्डस्विरुद्ध पाकिस्तानको प्रदर्शन औसत रह्यो । टस हारेर पहिले ब्याटिङको निम्तो पाएको पाकिस्तानले नेदरल्याण्डस्विरुद्ध सोचेअनुरूप ब्याटिङ त गर्न सकेन नै, टोलीको बलिङ समेत उसको स्तरअनुरूपको देखिएन । पाकिस्तानको सुरुवात नै खराब रह्यो । प्रारम्भिक ब्याटर फाखर जमान केवल १२ रन बनाएर भान विकको बलमा कट एन्ड बोल्ड हुन पुगे भने अर्का ओपनर इमाम उल हक पनि केवल १५ रन बनाउँदै भान मेकेरनको बलमा क्याच आउट भए । दोस्रो नम्बरमा ब्याटिङ गर्न आएका कप्तान बाबर आजम समेत केवल ५ रनमा आउट भएपछि पाकिस्तान ८.३ ओभरमा ३८–३ को दयनीय अवस्थामा पुगेको थियो ।
विकेटकिपर ब्याट्सम्यान मोहम्मद रिजवान र युवा ब्याटर साउद सकिई दुवैले अर्ध शतक पूरा गर्दै चौथो विकेटका लागि १२० रनको साझेदारी गरेपछि मात्र पाकिस्तानको अवस्थामा सुधार आएको थियो । आक्रामक ब्याटिङ गरेको सकिलले ५२ बलको सामना गर्दै ९ चौका र १ छक्काको सहयोगमा आकर्षक ६८ रन बनाए भने रिजवानले १०५ बलमा ८ चौकासहित ६८ रन प्रहार गरे । मध्य क्रममा मोहम्मद नवाजले ३९ रन र सादाव खानले ३२ रनको उपयोगी पारी खेल्दै सातौँ विकेटका लागि ६४ रनको महत्त्वपूर्ण साझेदारी निभाएपछि मात्र पाकिस्तान सम्मानजनक योगफलतर्फ बढेको थियो । इनिङको अन्त्यमा ह्यारिस उरफले १६ रन र शाहिन शाह अफ्रिदीले अविजित १२ रन बनाए पनि पाकिस्तानी टोली नेदरल्याण्डस् विरुद्ध पूरा ५० ओभर पनि टिक्न सकेन र ४९ ओभरमै अलआउट हुन पुग्यो ।
बास डे लेडेको अलराउण्ड प्रदर्शन
नेदरल्याण्डस्का खेलाडी बास डे लेडे ब्याटिङ र बलिङ दुवैमा चम्किए पनि टोलीको हार टार्न भने त्यो पर्याप्त रहेन । पाकिस्तानलाई २८६ रनमा अलआउट गर्ने क्रममा डे लेडेले ९ ओभर बलिङ गर्दै ६२ रन खर्चिएर ४ विकेट लिए । उनले मोहम्मद रिजवान, इफ्त्तिखार अहमद, सादाव खान र हसन अलीलाई पेवेलियनको बाटो देखाए । बलिङमा टोलीका लागि उत्कृष्ट प्रदर्शन गरेका डे लेडेले ब्याटिङतर्फ पनि नेदरल्याण्डस्का लागि सबैभन्दा धेरै रनको योगदान दिए । डे लेडेले ६८ बलको सामना गर्दै ६ चौका र २ छक्का हानेर ६७ रन बनाए । डे लेडेसँगै टोलीका प्रारम्भिक ब्याटर विक्रम जीत सिंहले पनि डच टोलीका लागि अर्धशतकीय इनिङ खेले । विक्रमजीतले ६७ बलमा ५२ रन बनाए जसमा ४ चौका र १ छक्का सामेल छ । यी दुईबाहेक अन्य कुनै ब्याटरले नेदरल्याण्डस्का लागि गतिलो प्रदर्शन गर्न नसकेपछि टोली ४१ ओभरमा २०५ रन बनाउँदै अलआउट हुन पुगेको थियो । इनिङको अन्त्यतिर नेदरल्याण्डस्का लोगान भान विकले २८ बलमा २८ रन बनाए पनि टोलीको हार टार्न त्यो पर्याप्त भएन ।
पाकिस्तानका ह्यारिस रउफले ३ र हसन अलीले २ विकेट हात पारे भने शाहिन शाह अफ्रिदी, शादाव खान, इफ्त्तिखार अहमद र मोहम्मद नवाजका नाममा १–१ विकेट रह्यो ।
शनिवार विश्वकपका दुई खेलहरू खेलिनेछन् जसमा अफगानिस्तानविरुद्ध बङ्गलादेशको खेल हिमाञ्चल प्रदेशको धर्मशाला क्रिकेट मैदानमा र दक्षिण अफ्रिका र श्रीलङ्का बीचको खेल दिल्लीको फिरोजशाह कोटाला मैदानमा आयोजना गरिनेछन् ।
श्रोत: आइएनएस-स्वतन्त्र समाचार
आशुतोष अधिकारी का अन्य पोस्टहरु:
- धमाधम बनिरहेको छ विश्वकपमा स्कोर र ब्याटिङ रेकर्ड
- लो स्कोरको म्याचमा अस्ट्रेलियालाई जित्यो भारतले
- दक्षिण अफ्रिकाको जीतमा कीर्तिमान नै कीर्तिमान
- विश्वकप क्रिकेटमा न्युजिल्याण्डको विजयी सुरुवात
- आजबाट क्रिकेटको महाकुम्भ सुरु, को हुन् जितका बलिया दाबेदार?
- नेपाली क्रिकेटको एसियाड यात्रा टुंगियो
- भारतविरुद्धको नेपालको बहादुरीपूर्ण ब्याटिङ
- परम्परागत कमजोरी: ब्याटिङले फेरि डुबायो
- एउटा महान् गोलरक्षकको बिदाइ
- आर्सनलको ‘डाउनफल’, सिटीको नजर ‘तेहरो उपाधि’ माथि
