टी-२० विश्वकप २०२६ को उपाधि भारतलाई: फाइनलमा न्युजिल्यान्डमाथि ९६ रनको शानदार जित

भारतले आइसिसी पुरुष टी-२० विश्वकप २०२६ को फाइनलमा न्युजिल्यान्डलाई ९६ रनले पराजित गर्दै कीर्तिमानी तेस्रो पटक उपाधि जितेको छ। अहमदाबादस्थित नरेन्द्र मोदी रङ्गशालामा आइतबार भएको भव्य फाइनल भिडन्तमा भारतले घरेलु दर्शकमाझ इतिहास रच्दै लगातार दोस्रो पटक विश्वकपको ट्रफी आफ्नो कब्जामा पारेको हो।

न्युजिल्यान्डले टस जितेर पहिले बलिङ रोजेपछि ब्याटिङमा उत्रिएको भारतले निर्धारित २० ओभरमा ५ विकेट गुमाउँदै २५५ रनको विशाल योगफल तयार पारेको थियो। यो टी-२० विश्वकप फाइनलको इतिहासमा अहिलेसम्मकै उच्च स्कोर हो।

ब्याटिङमा भारतीय टोलीको आक्रामक प्रदर्शनभारतका लागि ओपनर सन्जु सामसनले विस्फोटक ब्याटिङ गर्दै ४६ बलमा ८९ रनको योगदान दिए, जसमा ८ छक्का सामेल थिए। अर्का ओपनर अभिषेक शर्माले १८ बलमै अर्धशतक प्रहार गर्दै २१ बलमा ५२ रन बनाए। पहिलो विकेटका लागि सामसन र शर्माले मात्र ४३ बलमा ९८ रनको साझेदारी गर्दै भारतलाई आक्रामक सुरुवात दिलाएका थिए।

त्यस्तै, ईशान किशनले २५ बलमा ५४ रनको महत्त्वपूर्ण इनिङ खेले भने अन्त्यमा शिवम दुबेले ८ बलमा २६ रन जोड्दै टोलीको स्कोर २५० पार गराए। न्युजिल्यान्डका जेम्स नीशमले ३ विकेट लिए पनि भारतीय ब्याटरहरूलाई रोक्न सकेनन्।

न्युजिल्यान्डको जवाफी ब्याटिङ र भारतीय बलिङ२५६ रनको कठिन लक्ष्य पछ्याएको न्युजिल्यान्डको टोली भारतीय बलरहरूको सटिक बलिङसामु टिक्न सकेन। न्युजिल्यान्ड १९ ओभरमा १५९ रनमै अलआउट भयो। टोलीका लागि टिम सिफर्टले ५२ रन र मिचेल सान्टनरले ४३ रन जोडे पनि अन्य ब्याटरले उल्लेख्य प्रदर्शन गर्न सकेनन्।

भारतका लागि अनुभवी तीव्र गतिका बलर जसप्रित बुमराहले घातक बलिङ गर्दै ४ ओभरमा मात्र १५ रन खर्चेर ४ विकेट लिए। उनलाई अक्षर पटेलले ३ विकेट लिएर राम्रो साथ दिए। उत्कृष्ट प्रदर्शनका लागि बुमराहलाई ‘प्लेयर अफ द म्याच’ घोषित गरियो भने पुरै प्रतियोगिताभर सानदार प्रदर्शन गरेका सन्जु सामसन ‘प्लेयर अफ द टुर्नामेन्ट’ बने।

ऐतिहासिक उपलब्धिहरू

यो ऐतिहासिक जितसँगै भारतले विश्व क्रिकेटमा कयौँ अतुलनीय कीर्तिमानहरू आफ्नो नाममा लेखाउन सफल भएको छ। सन् २०२४ को च्याम्पियन भारतले यस पटक पनि उपाधि हात पार्दै टी-२० विश्वकपको इतिहासमा सफलतापूर्वक उपाधि रक्षा गर्ने पहिलो राष्ट्र बनेर नयाँ इतिहास रचेको छ। यसका साथै, आफ्नै घरेलु मैदानमा टी-२० विश्वकपको ट्रफी उचाल्ने पहिलो टोली बन्ने सौभाग्य पनि भारतलाई नै मिलेको छ। सन् २००७ र २०२४ पछि यो तेस्रो उपाधि जित्दै भारत तीन पटक टी-२० विश्वकप जित्ने विश्वकै एक मात्र टोली बनेको छ। कप्तान सूर्यकुमार यादवको कुशल र चतुर नेतृत्वमा प्राप्त यो सफलताले भारतीय क्रिकेटको प्रभुत्वलाई विश्व मञ्चमा थप मजबुत बनाएको छ

अहमदाबादको यसै मैदानमा सन् २०२३ को एक दिवसीय विश्वकप फाइनलमा अस्ट्रेलियासँग बेहोरेको पराजयको पीडालाई भारतले यस जितमार्फत भुलाएको छ। खेल सकिएसँगै रङ्गशालामा उपस्थित ८६,००० भन्दा बढी दर्शक र देशभरका प्रशंसकहरूले उत्सव मनाएका छन्।